ކަރަންޓީނު ނުވެ އިޓަލީން ދަތުރު ކުރެވޭ ގައުމުތަކުގެ ތެރޭގައި ރާއްޖެ
ކޮވިޑް-19 ބަލިމަޑުކަމުގެ ހާލަތުގައި އިޓަލީގައި އަޅައިފައިވާ ބައެއް ފިޔަވަޅުތަކަށް ލުއިދީފައިވާއިރު ބައެއް ގައުމުތަކަށް ދަތުރު ކުރުމުގައި ކަރަންޓީނު ނުވެ ދަތުރު ކުރެވޭ ގޮތަށް ބަދަލުކޮށްފިއެވެ.
އިޓަލީއިން ކަރަންޓީނު ނުވެ ދަތުރުކުރެވޭ ގޮތަށް ލުއި ދީފައި ވަނީ ހަ ގައުމަކަށެވެ. އެއީ ރާއްޖެ، ސީޝެލްސް، މޮރިޝަސް، މިސްރު، ޑޮމެނިކަން ރިޕަބްލިކް އަދި އަރުބާއެވެ.
މި ބަދަލާއެކު މި ހަ ގައުމަށް ދަތުރު ކުރާ މީހުން އިޓަލީއަށް ގޮސް ކަރަންޓީން ވާކަށް ނުޖެހޭނެއެވެ. ނަމަވެސް މި ގައުމުތަކަށް ދަތުރު ކުރާއިރު އިޓަލީ ސަރުކާރުން ދޫކޮށްފައިވާ "ގްރީން ފާސް" އޮންނަން ޖެހޭނެ އެވެ. މި އުސޫލާ އެކު އިޓަލީން ދަތުރު ކުރާ މީހުން ގައުމުން ފުރުމުގެ ކުރިން 48 ގަޑިއިރުގެ ނައްސި ނަތީޖާއެއް ބޭނުން ވާނެއެވެ.
އިޓަލީން ރާއްޖެއަށް މި ދިން ލުއިއާ އެކު ރާއްޖެއަށް އަންނަ ޓޫރިސްޓުން އިތުުރުވާނެކަމަށް ވަނީ އަންދާޒާ ކުރެވިފައެވެ.
ރާއްޖެ ހިމެނޭހެން 12 ގައުމެއް ޔޫކޭގެ ރެޑް ލިސްޓުން ނަގައިފައި ވަނީ ވެސް މި މަހުގެ ތެރޭގައެވެ. އިނގިރޭސި ސަރުކާރުން ކޮވިޑުން ރައްކާތެރިވުމަށް އަޅަމުންދާ ފިޔަވަޅުތަކުގެ ތެރެއިން އެ ޤައުމަށް އެތެރެވުން މަނާ ޤައުމުތައް ކަނޑައަޅާ "ރެޑް ލިސްޓް"ގެ ނަމުގައި ލިސްޓެއް ވަނީ އެކުލަވައިލައިފައެވެ. އަދި މި ލިސްޓުގައި ހިމެނޭ ޤައުމުތަކުން އިނގިރޭސި ވިލާތަށް އެތެރެވުމުގައި ކުރަން ޖެހޭ ބައެއް ކަންކަން ވަނީ ހިމަނައިފައެވެ.
