ވެރިކަމުގެ 3 އަހަރު، 30 ބިލިއަން ރުފިޔާއިން ދަރުވައިލައިފި: އައްބާސް
މި ސަރުކާރުގެ ވެެރިކަމުގެ ތިން އަހަރުގެ ތެރޭގައި ދިވެހި ރައްޔިތުންގެ ބޮލުގައި 30 ބިލިޔަން ރުފިޔާގެ ދަރަނި އަޅުވައިފައިވާކަމަށް ޕީޕީއެމްގެ މެމްބަރު އައްބާސް އާދިލް ރިޒާ ވިދާޅުވެއްޖެއެވެ.
"މިނިވަން ކަމުގެ ދިފާއުގައި ދިވެހިން"ގެ ނަމުގައި އިދިކޮޅު ފަރާތްތަކުން ކުރިއަށް އޮތް ދުވަސްތަކުގައި ހިންގާނެ ސިލްސިލާ ސިޔާސީ ހަރަކާތުގައި، ކާނިވާ ސަރަޙައްދުގައި މިރޭ ބޭއްވި ޖަލްސާގައި އައްބާސް ވިދާޅުވީ ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ތަރައްޤީގެ ރަން ފަސް އަހަރުގެ ވެރިކަން ނިންމައިލިއިރު ދަރައިފައި ވަނީ 17 ބިލިޔަން ރުފިޔާއިން ކަމަށެވެ. ނަމަވެސް މިއަދު ތަރައްޤީގެ އެއްވެސް ކުލަވަރެއް ނުފެނި ދިވެހި ޤައުމު މިވަނީ 30 ބިލިޔަން ރުފިޔާއިން ދަރުވައިލައިފައި ކަމަށް އައްބާސް ވިދާޅުވިއެވެ. އަދި މިއީ ދިވެހި ރައްޔިތުންނަށް މިސަރުކާރުން ވެފައިވާ ވަރަށް ބޮޑު ޚިޔާނާތެއްކަމަށް ވެސް އޭނާ ވިދާޅުވިއެވެ.
"އަޅުގަނޑުމެންގެ ރަން ފަސް އަހަރުގައި ރައީސް ޔާމީން ވެރިކަން ނިންމައިލިއިރު ދަރަނި 17 ބިލިޔަން. ވެރިކަމުގެ މިވީ 3 އަހަރު މިސަރުކާރުން ދަރަނި 30 ބިލިޔަނަށް އަރުވައިލައިފި. އެޅުނު ބުރިޖެއް، ލިބުނު ތަރައްޤީއެއް ނެތް. ކޮވިޑުން ރައްކާތެރިވުމަށް އަޅާނެ މާސްކެއް ވެސް ނުލިބުނު." އައްބާސް ވިދާޅުވިއެވެ.
މިރޭގެ އެ ޖަލްސާގައި ވާހަކަ ދައްކަވަމުން އައްބާސް ވިދާޅުވީ، މިއަދު ދިވެހި ރައްޔިތުންނަށް މިދިމާވާ ހުރިހާ ދަތިކަމުގެ އަޑީގައި އޮތީ އިންޑިއާ ކަމަށާއި މިސަރުކާރުން އިންޑިއާއަކީ މާގާތް އެކުވެރިއެއް ކަމުގައި ދުށްއިރު މިވީ ތިން އަހަރުގައި އިންޑިއާއިން ދިވެހި ޤައުމުގެ ލާބަޔާއި މަންފާއަށް ކޮށްދިން އެއްވެސް ކަމެއް ނެތް ކަމަށެވެ.
