ކުޑަކުދިންގެ ހައްގުތަކާ ގުޅޭ ޕްރޮގްރާމެއް ފަށައިފި
ފުލުހުންނަށް އަމާޒުކޮށްގެން ކުރިއަށް ގެންދާ ސެންސިޓައިޒޭޝަން ޕްރޮގްރާމް އޮން ޗައިލްޑް ރައިޓްސް އެންޑް ޗައިލްޑް ޕްރޮޓެކްޝަން ޕްރޮގްރާމް ސައުތު ޕޮލިސްގައި ފަށައިފިއެވެ.
މި ޕްރޮގްރާމަކީ މޯލްޑިވްސް ޕޮލިސް ސަރވިސްގެ ފެމިލީ އެންޑް ޗައިލް ޕްރޮޓެކްޝަން ވިންގާއި، ޖުވެނައިލް ޖަސްޓިސް ޔުނިޓާއި، ޔުނިސެފް މޯލްޑިވްސްއާއި، ޕްރޮސެކިއުޓަރ ޖެނެރަލް އޮފީސް އަދި އާކް ގުޅިގެން ކުރިއަށް ގެންދާ ސިލްސިލާ ޕްރޮގްރާމްތަކުގެ ދަށުން ކުރިއަށް ގެންދާ ޕްރޮގްރާމެކެވެ.
މި ޕްރޮގްރާމްގައި، ކުޑަކުދިންގެ ހައްގުތަކުގެ ގާނޫނާއި ކުޑަކުދިންގެ އަދުލުގެ ގާނޫނާއި ޖިނާއީ އިޖުރާތުގެ ގާނޫނާ ގުޅޭގޮތުން މައުލޫމާތު ދޭނެއެވެ. އަދި އަނިޔާ ލިބޭ ކުދިން ހިމެނޭ މައްސަލަތަކާއި ކުށްކުރާ ކުޑަކުދިން ހިމެނޭ މައްސަލަތަކުގައި ކުށުގެ ވެށީގައި މަސައްކަތްކުރާއިރު އަމަލުކުރަން ޖެހޭ އުސޫލުތަކާއި ވިސްނަން ޖެހޭ ކަންތައްތަކާ ގުޅޭގޮތުން ވެސް މައުލޫމާތު ހިއްސާކުރާނެއެވެ.
އޭގެ އިތުރުން، މި ދާއިރާގައި އެކުގައި މަސައްކަތްކުރާ ފަރާތްތަކާ އެކު މަސައްކަތްކުރާނެ ގޮތްތަކާއި އެގޮތަށް މަސައްކަތް ކުރުމުގެ ތެރޭގައި ދިމާވާ ދަތިތަކާއި އެކަންކަން ހައްލުކުރުމަށް މަސައްކަތްކުރާނެ ގޮތްތަކާ ގުޅޭގޮތުން ވެސް މައުލޫމާތު ދޭނެއެވެ.
ސެންސިޓައިޒޭޝަން ޕްރޮގްރާމް އޮން ޗައިލްޑް ރައިޓްސް އެންޑް ޗައިލްޑް ޕްރޮޓެކްޝަން ޕްރޮގްރާމަކީ ކުޑަކުދިންނާއި އާއިލާތަކާއެކުގައި މަސައްކަތްކުރާ ފުލުހުންނަކީ މި ދާއިރާއަށް ހޭލުންތެރިވެފައިވާ ފުލުހުން ކަމުގައި ވުމާއެކު މި ދާއިރާއާ ގުޅުން ހުރި ގާނޫނުތަކާއި ގަވާއިދުތަކަށް އަހުލުވެރި ބަޔަކަށް ހެދުމަށާއި ފުލުހުންގެ މަސައްކަތުގައި ގާބިލުކަން އިތުރުކުރުމަށް ކުރިއަށް ގެންދާ ޕްރޮގްރާމެކެވެ.
މި އޮކްޓޯބަރ މަހުގެ 3އިން 7އަށް ގަމު އީކުއޭޓަރ ވިލެޖް ރިސޯޓުގައި ކުރިއަށް ގެންދާ މި ޕްރޮގްރާމުގައި ސައުތު ޕޮލިސް ޑިވިޜަންގެ 78 މުވައްޒަފުން ބައިވެރިވެފައިވެއެވެ.
Ads by STO
