ކުށްވެރިން ލައްވައި މުޖުތަމައުއަށް ހިދުމަތް ކުރުމުގެ އަދަބު ދޭން ފަށައިފި
ކުށްވެރިން ޖަލަށްލުމުގެ ބަދަލުގައި މުޖްތަމައުއަށް ހިދުމަތް ކުރުމުގެ އަދަބު، ކްރިމިނަލް ކޯޓުން ފުރަތަމަ ފަހަރަށް ދޭން ފަށައިފިއެވެ.
މި ފަދައިން އެންމެ ފުރަތަމަ އަދަބު ދީފައި ވަނީ ގެއަކަށް ވަދެ ވައްކަން ކުރި ބިދޭސީއަކަށެވެ. މިދިޔަ އާދީއްތަ ދުވަހު އޭނާއަށް އަދަބު ދީފައި ވަނީ، އެއް މަސް ދުވަހަށް ޖަލަށް ލުމާއެކު 137 ގަޑިއިރަށް މުޖްތަމައުއަށް ހިދުމަތް ކުރުމަށެވެ.
ކުށްވެރިން ޖަލަށްލުމުގެ ބަދަލުގައި މުޖްތަމައުއަށް ހިދުމަތް ކުރުވަން ލާޒިމް ކުރާ އަދަބު ކޯޓުތަކުން ކަނޑައެޅޭނެ އުސޫލުތައް މިދިޔަ ސުޕްރީމް ކޯޓުން ކަނޑައެޅީ މިދިޔަ ޖުލައި މަހުގައެވެ. އެގޮތުން އެ ކޯޓުން ހަމަޖައްސައިފައިވާ ގޮތުގައި، އެފަދަ ކުށްވެރިން ލައްވައި ކުނި އުކުމާއި ފާހާނާއާއި މިސްކިތްތަކާއި އާންމު ތަންތަން ސާފުކުރުން ފަދަ މަސައްކަތް ވެސް ކުރުވިދާނެއެވެ.
އެ ފަދަ އަދަބުތައް ތަންފީޒު ކުރުމާބެހޭ އުސޫލުތައް 60 ދުވަސް ތެރޭގައި ކަރެކްޝަނަލް ސާވިސްއިން ހަދަންޖެހޭ ގޮތަށް ސުޕްރީމް ކޯޓުގެ އުސޫލުގައި ލާޒިމް ކޮށްފައިވެެއެވެ. ނަމަވެސް އެ މުއްދަތު މިދިޔަ މަހު ހަމަވިއިރު ވެސް އެފަދަ އުސޫލެއް ކަރެކްޝަންސްއިން ހަދައިފައެއް ނުވެއެވެ.
