ދައުވާ ކުރަން ޖެހޭ ވަރުގެ ކަމެއް ކޮށްފައެއް ނުވާނެ: މޭޔަރު މުޢިއްޒު
ކުރީ ސަރުކާރުގައި ހައުސިން މިނިސްޓަރުގެ މަގާމުގައި ހުންނެވިއިރު، ކުރެއްވި އެއްވެސް މަސައްކަތެއްގެ ތެރެއިން ދައުވާ އުފުލަން ޖެހޭ ވަރުގެ ކަމެއް ހިންގަވައިފައި ނޯންނާނެ ކަމަށް މާލޭ ސިޓީގެ މޭޔަރު ޑރ. މުހައްމަދު މުޢިއްޒު މިއަދު ވިދާޅުވެއްޖެއެވެ.
ޑރ. މުޢިއްޒު މިހެން ވިދާޅުވެފައި ވަނީ، ލޮނުޒިޔާރަތް ކޮޅުގައި ހުންނަ ބްރިޖް ވިއުއިން ޕްލެޓްފޯމާއި ފުޑް އައުޓްލެޓް ކުއްޔަށް ދިނުމުގައި ނިއު ޕޯޓް ހިންގި ސްޓްރާޑާ ކުންފުންޏަށް ފައިދާވާ ގޮތަށް ދިން ކަމަށް ބުނާ މައްސަލައިގެ ތަހުގީގު ނިންމައި، އޭސީސީން އެ މަނިކުފާނާ ދެކޮޅަށް ދައުވާ ކޮށްދިނުމަށް އެދި އިއްޔެ ފޮނުވުމާ ގުޅިގެންނެވެ.
މިކަމާ ގުޅިގެން ޑރ. މުޢިއްޒު ވިދާޅުވީ، ހުރިހާ ކަމެއް ގެންދަވައިފައި އޮންނާނީ ގާނޫނީ އިމުގެ ތެރެއިން އުސޫލްތަކާ އެއްގޮތަށް ކަމަށާއި އެ މަސައްކަތްތަކާ ގުޅުވައި މިނިވަން މުއައްސަސާތަކުން ކުރިއަށް ގެންދަވަން ޖެހޭ ކަންކަން ކުރެއްވުމަކީ މައްސަލައެއް ކަމަށް ދެކެވަޑައިނުގަންނަވާ ކަމަށެވެ.
"އަޅުގަނޑު ޔަގީންކަން އަރުވަން ދައުވާއެއް އުފުލާނެ ފަދަ ކަމެއް ކޮށްފައި ނުވާނެ ކަމަށް،" ޑރ. މުޢިއްޒު ވިދާޅުވިއެވެ.
މި މައްސަލައިގައި އޭސީސީން ނިންމައިފައި ވަނީ ދައުލަތަށް ފައިދާއެއް ލިބެން އޮތް ކަމެއްގެ ފައިދާ ރައްޔިތުންނަށް ނުވަތަ ދައުލަތަށް ނުލިބޭ ގޮތަށް އަމަލުކުރުމުގެ ދައުވާއާއި ރަސްމީ ހައިސިއްޔަތު ، ނަހަމަ ގޮތުގައި ބޭނުންކޮށްގެން ނާޖާއިޒު ފައިދާ ހޯދައިދިނުމުގެ ކުށުގެ ދައުވާ ޑރ. މުޢިއްޒުގެ މައްޗަށް ކުރުމަށެވެ. އެ މަނިކުފާނުގެ އިތުރުން އޭރު ހައުސިން މިނިސްޓްރީގެ ޑެޕިއުޓީ މިނިސްޓަރުގެ މަގާމުގައި ހުންނެވި އަހުމަދު ހަބީބުގެ މައްޗަށް ވެސް އެ ދައުވާތައް ކުރަން އޭސީސީން ވަނީ ފޮނުވައިފައެވެ.
ބަލައިދިކޮޅުމމީހުން އެމީހުނައްވުރެ ގާބިލުވީމ ބިރުގަނެޖެހިލުންވާ އެހެއްވެ ހަދާގޮތެއްއެއީ