"ވާނުވާ" ޖެހުމަށް ފަހު، ޖަލަށް ލާ މީހުންނަށް ވާނުވާއެއް އަދިވެސް ނޭނގޭ!
މިއަދުގެ ރައްޔިތުންގެ މަޖިލީހުގެ ޖަލްސާގައި އެންމެ ފުރަތަމަ ބަހުސް ކުރަން އެޖެންޑާ ކުރީ، "ވާނުވާ" މުއްދަތު ޖަހައިފައި ޖަލުތަކުގައި ބަންދު ކޮށްފައިވާ ފަރާތްތަކުގެ ޝަރީޢަތް ކުރިއަށް ނުގެންގޮސް ލަސްވުމާއި އެ ފަރާތްތަކުގެ ބޭސް ފަރުވާގެ ކަންކަން ވެސް ރަނގަޅަށް ބަލަހައްޓަމުން ނުދާކަމުގެ ކަންބޮޑުވުމާ އެކު، ފޮނަދޫ ދާއިރާގެ މެންބަރު މޫސާ ސިރާޖު ހުށަހަޅުއްވައިފައިވާ މައްސަލައެވެ.
މިއަދުގެ މަޖިލީހުގައި ބައިވެރިވި 49 މެންބަރުންގެ ތެރެއިން 47 މެންބަރުންގެ ވޯޓާ އެކު މި މައްސަލައަށް މަޖިލީހުގެ ތަޅުމުގައި ބަހުސް ކުރުމަށް ފާސްވިއެވެ.
މި މައްސަލައާ ގުޅިގެން މަޖިލީހުގެ ގިނަ މެންބަރުންގެ ވާހަކަތަކެއް ހުރި އިރު، މި މައްސަލަ ހުށަހަޅުއްވަމުން މޫސާ ސިރާޖު ވެސް ވަނީ ގިނަ ނުކުތާތަކެއް ފާހަގަ ކުރައްވައިފައެވެ.
މެންބަރު ސިރާޖުގެ ވާހަކަފުޅުގައި އެންމެ ފުރަތަމަ ވެސް ފާހަގަ ކުރެއްވީ، މިވަގުތު އެތައް ބަޔަކު ފާހަގަ ކުރައްވަމުން އަންނަ ކަމެކެވެ. އެއީ ރައީސް ޢަބްދުﷲ ޔާމީން ޢަބްދުލްޤައްޔޫމް ވެރިކަމުގައި ހުންނެވިއިރު (މިހާރުގެ ސަރުކާރުން އިދިކޮޅުގައި ތިބިއިރު) އެންމެ ބޮޑަށް ވަކާލާތު ކުރެއްވި އެއްކަމަކީ ޖަލުތަކުގައި ވާނުވާގައި ތިބި ފަރާތްތަކަށް ހައްލު ހޯދައިދީ، ޖަލުތަކުގައި ތިބި ފަރާތްތަކަށް ބޭސް ފަރުވާގެ އިންތިޒާމުތައް ހަމަޖައްސައިދޭނެ ވާހަކައެވެ.
ނަމަވެސް މިހާރު ވެސް ޖަލުގައި "ވާނުވާ"ގައި 370އަށް ވުރެ ގިނަ މީހުން ތިބި އިރު، އޭގެ ތެރޭގައި ޝަރީޢަތް ނިމެންދެން ބަންދު ކޮށްފައި ތިބި އެތައް ބަޔަކު ވެސް އެބަތިއްބެވެ. އަދި އެ ފަރާތްތަކުގެ ޝަރީޢަތް ކުރިއަށް ނުގޮސް އެތައް ދުވަހެއް ވެފައިވާކަން ވެސް ފާހަގަ ވެފައިވެއެވެ.
ޖަލު ބަންދުގައި ތިބޭ މީހުންނަށް ލިބެން ޖެހޭ ޙައްޤުތަކުން އެމީހުން މަަހްރޫމު ކޮށްފައިވާކަމީ އެފަދަ އެތައް ބަޔަކު ކުރަމުންދާ ޝަކުވާއެކެވެ. އެ ފަރާތްތަކުގެ އާއިލާތަކުން ވެސް މިކަމާ ކަންބޮޑުވުން ފާޅުކޮށް، އިންސާފުވެރިކަމާ އެކު ކަންކަން ކޮށްދެއްވުމަށް ކަމާ ބެހޭ ފަރާތްތަކުގައި އެދެމުން ދާކަން ވެސް ވަނީ އެނގިފައެވެ.
ނަން ހާމަ ނުކުރުމަށް އެދި "ދެން"އާ ވާހަކަ ދައްކަމުން "ވާނުވާ" ބަންދެއްގައި ޝަރީއަތް ނިމެންދެން ބަންދު ކޮށްފައި ހުރި ފަރާތެއްގެ ކޮއްކޮއެއް ބުނީ، އޭނާގެ ބޭބެ މިހާރު އެފަދައިން ބަންދުގައި ބަހައްޓައިފައި ހުންނަތާ ދެ އަހަރު ވެއްޖެ ކަމަށެވެ.
"މިދިޔަ އޯގަސްޓު މަހަށް ދެ އަހަރު ވީ. ޝަރީޢަތް ބޭއްވުނު ދުވަހަށް ވުރެ ގިނައީ ކެންސަލު ކޮށްފައިވާ ދުވަސް. ކޮންމެވެސް ސަބަބެއް އަބަދު ވެސް ބުނޭ. އެގޮތުން ބޭބެގެ މައްސަލަ ބައްލަވާ ގާޒީ ޗުއްޓީއަށް ދިޔައ އޭ، ބަލިވެ އުޅެނީ އޭ، އަޑުއެހުން އޮތް ދުވަހު ޕްރޮސެކިޝަންގެ ވަކީލަކު ބަލިވެގެން ނާދެވެން އޮތީއޭ، މިކަހަލަ އެތައް ބައިވަރު ޝަކުވާއެއް. ބޭބެއަކީ ވަރަށް ބަލިވެސް މީހެއް. ކިޑްނީގައި ހިލަ ހުރޭ، ޔޫރިން އިންފެކްޝަން ވެސް ހުރޭ. އެހެންވެ އެތަނަށް ޝަކުވާ ފޯމު ވެސް ވަރަށް ގިނައިން ހުށަހެޅި ކަމަށް މިދިޔަ މަހު ލިބުނު އާއިލީ ކޯލުގައި ބުނި. އާއިލީ ކޯލު ވެސް ހަގީގަތުގައި ލިބެން ހަމަޖެހިފައި އިންނަ ގޮތަށް ނުލިބޭ. އަހަރުމެން ގިނަ ފަހަރަށް ހުންނަން މި ޖެހެނީ އެއްވެސް ބޭބެގެ އެއްވެސް ޚަބަރެއް ނުލިބިފައި" ވަރަށް އަސަރާ އެކު އޭނާ ކިޔައިދީފައި ވެއެވެ.
އޭނާ އިތުރަށް ބުނީ، އޭނާގެ ބޭބެގެ ޝަރީޢަތް އަވަސް ކޮށްދިނުމަށާއި ބޭސް ފަރުވާގެ ކަންކަން އަވަހަށް ކޮށްދިނުމަށް އެދި ވަރަށް ގިނަ އިދާރާއަށް އެ އާއިލާގެ ފަރާތުން ސިޓީލި ކަމަށެވެ.
"ބައްޕަ ސިޓީލި ކަރެކްޝަންސްއަށާއި، ހޯމް މިނިސްޓްރީއަށާއި އެޗްއާރްސީއެމްއަށް ވެސް. ސިޓީ ލީ ފަހުން އެއް ޝަރީއަތް ބާއްވައިފައި މި މަހުގެ ދެ ދުވަހަކަށް އިތުރު އަޑުއެހުން ތާވަލު ކުރި. ބޭބެއަށް މިދިޔަ މަހު އޭގެ ފަހުން އާއިލީ ކޯލް ބައްދަލުވުން ވެސް ހަމަޖައްސައި ދިން. އެކަމަކު އޭގެ ފަހުން މި މަހު އަޑުއެހުން ތާވަލު ކުރި ދެ ދުވަހު ވެސް އަނެއްކާ ވެސް ކެންސަލް ކުރީ. ކެންސަލްވި ސަބަބެއް ވެސް ނޭނގޭ. ހޯމް މިނިސްޓްރީން ސިޓީގެ ޖަވާބުގައި، ކުރިން ކޮށްދިން ކަންތައްތަކުގެ ތާރީޚު ޖަހާފައި ބުނެފައި ވަނީ އެކަންކަން ކޮށްދިން ކަމަށް. އެކަމަކު މިހާރު އަނެއްކާ ވެސް އާއިލީ ކޯލު ނުލިބުމާ ބޭބެ ޑޮކްޓަރަށް ނުދެއްކުމުގެ މައްސަލައަށް ހައްލެއް ލިބިފައެއް ނުވޭ." އޭނާ ބުންޏެވެ.
މިއީ އެންމެ އާއިލާއެއްގެ ވާހަކަ ވިޔަސް، މިއީ މިފަދަ އެންމެ އާއިލާއެއްގެ އަޑެއް ނުވަތަ މައްސަލައެއް ނޫނެވެ. މިފަދަ ކިތަންމެ އާއިލާއަކާއި ޖަލުގައި މިފަދައިން ބަންދު ކުރެވިފައިވާ ފަރާތެއް، އިންސާފެއް ނުލިބި އެބަ ތިއްބެވެ.
މި މައްސަލައާ ބެހޭގޮތުން މިއަދުގެ މަޖިލިސް ތަޅުމުގައި މެދު ހެންވޭރު ދާއިރާގެ މެންބަރ އަލީ އާޒިމް ވެސް ވަނީ ވާހަކަ ދައްކަވައިފައެވެ. އެގޮތުން އެމަނިކުފާނު ވިދާޅުވީ މިއީ ވަރަށް ވެސް ސީރިއަސް މައްސަލައެއް ކަމަށާއި މި ދައްކަނީ "ވާނުވާ" ނޭނގި މީހަކު އަނދިރީގައި ޝަރީއަތުގެ މަޖިލިސް ނިމެންދެން ބަހައްޓާ ވާހަކަ ކަމަށެވެ. އަދި ވާނުވާ ޖަހާފައި މިހާރު ވެސް 370އަށް ވުރެ ގިނަ މީހުން ޖަލުތަކުގައި ތިބުމަކީ ޝަރީޢަތްތައް ކުރިއަށްދާ ސްޕީޑާ މެދު ވިސްނަން ޖެހޭ ކަމެއް ކަމަށް ވެސް ވިދާޅުވެފައިވެއެވެ.
ވާނުވާ ޖަހައިފައި ޝަރީޢަތް ނިމެންދެން ބަންދުގައި ބަހައްޓާފައި ތިބޭ ކޮންމެ މީހަކީ ކުށްވެރިއެއް ނޫން ކަމަށް އަލީ އާޒިމް ވެސް ވަނީ ވިދާޅުވެފައެވެ. އެހެންކަމުން އުންމީދަކީ، މި މައްސަލައިގެ ސީރިއަސްކަން ވިސްނި ރާއްޖޭގެ ޝަރުޢީ ދާއިރާ ދެން މިއަށް ވުރެ އިސްލާހުވެ މިކަންކަމަށް ޙައްލެއް ލިބިގެންދާނެ ކަމަށެވެ.
