ލޯންޗެއް ބަންޑުން ޖަހާލައި ކުޑަކުއްޖަކު ގެއްލިއްޖެ
ރާއްޖެއަށް މިހާރު ކުރަމުން ދާ ވިއްސާރައިގައި އޮޅުވެލި ފުށީ ކައިރީގައި ކަނޑުމަތީ ހާދިސާއެއް ހިނގައިގެން ސިފައިން ހަރަކާތްތެރިވާން ފަށައިފިއެވެ.
އެމްއެންޑީއެފުން ވިދާޅުވީ އެ ލޯންޗުން ދަތުރު ކުރަމުން ދިޔައީ 2 ކުޑަކުދިންނާ އެކު 12 މީހުން ކަމަށެވެ. އަދި އޭގެ ތެރެއިން ކުޑަ އެއް ކުއްޖަކު ނުފެންނަ ކަމަށް އެމްއެންޑީއެފްއިން ވިދާޅުވިއެވެ.
މަޢުލޫމާތު ލިބިފައިވާ ގޮތުގައި ގެއްލުނު ކުއްޖަކީ އެ ލޯންޗަށް ޖެހި ރާޅަކާ އެކު ކަނޑަށް ވިއްސައިގެން ދިޔަ އުމުރުން 4 އަހަރުގެ ކުއްޖެކެވެ.
އެމްއެންޑީއެފްގެ ކޯސްޓް ގާޑުން މިހާރު ވަނީ އެ ސަރަހައްދަށް ދިއުމަށް ދަތުރު ފަށައިފައެވެ.
މި ހާދިސާއާ ގުޅިގެން ފުލުހުން ވިދާޅުވީ މާލެއިން ވ. އަތޮޅަށް ދަތުރުކުރަމުން ދިޔަ ލޯންޗެއް އޮޅުވެލި ރިސޯޓް ކައިރިން ނެގި ރާޅެއްގައި ޖެހި 3 މީހަކު މޫދަށް ވެއްޓިފައިވާ ކަމުގެ މަޢުލޫމާތު މިއަދު 17:30 ލިބިފައިވާކަމަށެވެ.
އަދި މި ހާދިސާގައި އެ ލޯންޗުން މޫދަށް ވެއްޓުނު 3 މީހުންގެ ތެރެއިން 2 މީހުން މިހާރު ފެނިފައިވާ ކަމަށާއި 4 އަހަރުގެ ކުޑަކުއްޖާ އަދިވެސް ނުފެންނަ ކަމަށް ފުލުހުން ވިދާޅުވިއެެވެ.
