ފުލުހުންގެ ހިދުމަތުގެ ގާނޫނުން ވަޒީރަށް މިހާރު ހަވާލު ކުރެވިފައި ވަނީ ސިޔާސަތު ކަނޑައެޅުން: މަޖިލީހުގެ ރައީސް
ދިވެހި ފުލުހުންގެ ހިދުމަތުގެ ގާނޫނުން ހޯމް މިނިސްޓަރ އިމްރާން ޢަބްދުﷲއަށް މިހާރު ހަވާލު ކުރެވިފައިވާ މަސައްކަތަކީ ސިޔާސަތު ކަނޑައެޅުމުގެ މަސައްކަތް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު ވިދާޅުވީ ގާނޫން އަސާސީގެ 242ވަނަ މާއްދާގައި, ސަލާމަތީ ކޮންމެ ހިދުމަތެއްމެ ހިންގަން ވާނީ ވަޒީރުންގެ މަޖިލީހުގެ މެމްބަރެެއްގެ ބެލުމުގެ ދަށުން ކަމަށް ބަޔާންކޮށްފައިވާ ކަމަށެވެ. އަދި އެ ވަޒީރެއްގެ ބެލުމުގެ ދަށުން ހިންގާ ސަލާމަތީ ހިދުމަތެއްގެ ކަންކަމާ ގުޅިގެން ރައީސުލްޖުމްހޫރިއްޔާ އަށާއި ރައްޔިތުންގެ މަޖިލީހަށް އެ ވަޒީރެއް ޖަވާބުދާރީ ވާން ޖެހޭނެ ކަމަށް ވިދާޅުވިއެވެ.
ނަޝީދު މިފަދައިން ވިދާޅުވީ ފުހުންގެ އާ ގާނޫނަށް އަމަލުކުރަން ފެށުމާ ގުޅިގެން ހޯމް މިނިސްޓްރީގެ ދަށުން ފުލުހުންގެ މުއައްސަސާ އިއްޔެއިން ފެށިގެން ވަކިކުރުމާ ގުޅިގެން، އެއީ ހޯމް މިނިސްޓަރަށް އޮތް ގާނޫނީ ޒިންމާ އަދާކުރުމަށް ވުރެން ބަލިކަށި ވެގެން ދިއުން ކަމަށް އިދިކޮޅު ޕީއެންސީގެ ނައިބުރައީސް އަދި ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އާދަމް ޝަރީފް ވިދާޅުވުމާ ގުޅިގެންނެވެ.
ނަޝީދު ވިދާާޅުވީ ފުލުހުންގެ ގާނޫނު އިސްލާހު ކުރުމުގެ ކުރީގައި މޯލްޑިވްސް ޕޮލިސް ސާރވިސް ހިނގަމުންދަނީ ރައީސުލްޖުމްހޫރިއްޔާ ކަނޑައަޅާ މިނިސްޓްރީއެއްގެ ދަށުން ކަމަށް ބަޔާންކޮށްފައިވާ ކަމަށެވެ. އެހެން ނަމަވެސް އެ ގާނޫނަށް އިސްލާހު ގެނައުމާ އެކު ފުހުންގެ ހިދުމަތާ ގުޅޭ ކަންތައްތަކުގައި ރައީސުލްޖުމްހޫރިއްޔާއަށާއި ރައްޔިތުންގެ މަޖިލީހަށް ޖަވާބުދާރީ ވާން ޖެހޭނެ ވަޒީރަކު ހުންނަން ޖެހޭނެ ކަމަށް ބަޔާންކޮށްފައިވާ ކަމަށެވެ. އަދި ވަޒީރުންގެ މަސްޢޫލިއްޔަތުތަކަށް ބަލައިލުމުން އެނގެނީ މިހާރު ހަވާލު ކުރެވިފައިވާ މަސައްކަތަކީ ސިޔާސަތު ކަނޑައެޅުމުގެ މަސައްކަތްކަން ކަމަށް ވިދާޅުވިއެވެ.
" އިއްޒަތްތެރި މެމްބަރަށް އެނގިވަޑައިގަންނަވާނެ ދާދި ފަހުން އިއްޒަތްތެރި މެމްބަރު އިސްލާހު ކުރައްވައިފި ފުލުހުންގެ ގާނޫނު. އެ ގާނޫނު އިސްލާހު ކުރުމުގެ ކުރީގައި މޯލްޑިވްސް ޕޮލިސް ސާރވިސް ހިނގަމުންދަނީ ރައީސުލްޖުމްހޫރިއްޔާ ކަނޑައަޅާ މިނިސްޓްރީއެއްގެ ދަށުން ކަމަށް ބަޔާންކޮށްފައި އެބަވޭ. އެހެން ނަމަވެސް އިއްޒަތްތެރި މެމްބަރުން ގާނޫނަށް އިސްލާހު ގެންނަވާ, މިހާރު އެކަމާ ގުޅޭ ގޮތުން ވިދާޅުވެފައި ވަނީ ފުލުހުންގެ ހިދުމަތާ ގުޅޭ ކަންތައްތަކުގައި ރައީސުލްޖުމްހޫރިއްޔާއަށާއި ރައްޔިތުންގެ މަޖިލީހަށް ޖަވާބުދާރީ ވާން ޖެހޭނެ ވަޒީރަކު ހުންނަން ޖެހޭނެ ކަމަށް. ދެން އެވަޒީރުންގެ މަސްޢޫލިއްޔަތުތަކުގެ ތެރޭގައި ވަރަށް ތަފްސީލްކޮށް ލިޔުއްވާފަ އެބަވޭ. އެ މަސްޢޫލިއްޔަތުތަކަށް ރަނގަޅަށް ބަލާލީމާ އެބަ އެނގޭ މިހާރު ހަވާލު ކުރެވިފައިވާ މަސައްކަތަކީ ސިޔާސަތު ކަނޑައެޅުމުގެ މަސައްކަތްކަން. ފުލުހުންގެ ގާނޫނަށް ގެނެވުުނު އިސްލާހާ ގުޅިގެން އަޅުގަނޑު ހިތުން މިއީ ގެނެވުނު ބަދަލަކީ" ނަޝީދު ވިދާޅުވިއެވެ.
ފުލުހުންގެ ހިދުމަތުގެ އައު ގާނޫނަށް އަމަލު ކުރަން ފެށުމުން ހޯމް މިނިސްޓްރީގެ ދަށުން އެ މުއައްސަސާ ވަކިކޮށްފައި ވަނީ ރޭގެ ވަގުތެއްގައެވެ. ފުލުހުން މީގެ ކުރިން އަމަލު ކުރި ގާނޫނުގައިވާ ގޮތުން، އެ މުއަައްސަސާއާ ގުޅޭގޮތުން ރައްޔިތުންގެ މަޖިލީހަށް ޖަވާބުދާރީ ވާން ޖެހޭނީ އެއިރެއްގައި ހުންނަ ހޯމް މިނިސްޓަރެވެ. ނަމަވެސް ފުލުހުންގެ ހިދުމަތުގެ މިހާރުގެ ގާނޫނުގައިވާ ގޮތުގައި، ކަމާ ގުޅުން ހުރި ހުރިހާ އިދާރާއަކަށް ޖަވާބުދާރީ ވާން ޖެހޭނީ އެއިރެއްގައި ހުންނަ ކޮމިޝަނަރ އޮފް ޕޮލިސްއެވެ.
