ކަންކަން ރަނގަޅު ކުރަން އުޅޭއިރު ގޮންޖެހުންތަކާ ކުރިމަތިވާނެ: އިމްރާން
ކަންކަން ރަނގަޅު ކުރަން އުޅޭއިރު ގޮންޖެހުންތަކާ ކުރިމަތިވާނެ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
އިމްރާން މިހެން ވިދާޅުވެފައި ވަނީ ހޯމް މިނިސްޓްރީގެ ބެލުމުގެ ދަށުން ފުލުހުން ވަކި ކުރަން ނިންމަވައި އެކަން އެ ހޯމް މިނިސްޓްރީއަށް އަންގަވައިފައި ވަނިކޮށެވެ.
މިއަދު ކުރެއްވި ޓްވީޓެއްގައި އިމްރާން ވިދާޅުވީ، ކަންކަން ރަނގަޅު ކުރަން މަސައްކަތް ކުރާއިރު ގޮންޖެހުންތަކާ ކުރިމަތިވުމަކީ ތަބީއީ ކަމެއް ކަމަށެވެ. އަދި ކާމިޔާބު ވާނީ ހިތްވަރާއެކު މަސައްކަތް ކުރި ބަޔަކަށް ކަަމަށް ވެސް ވިދާޅުވިއެވެ.
ހޯމް މިނިސްޓްރީގެ ދަށުން ފުލުހުންގެ މުއައްސަސާ ވަކި ކޮށްފައިވާކަން އަންގައި، ރައީސް އޮފީހުން ހޯމް މިނިސްޓަރ އިމްރާން ޢަބްދުﷲއަށް މިދިޔަ ހަފްތާގެ އަންގާރަ ދުވަހު ފޮނުއްވި ސިޓީއެއްގައި ވިދާޅުވެފައި ވަނީ، ދިވެހި ފުލުހުންގެ ހިދުމަތުގެ ގާނޫނުގެ ދަށުން އުފައްދައިފައިވާ "ދިވެހި ފުލުހުންގެ ހިދުމަތް"އަކީ ވަކި މިނިސްޓްރީއެއްގެ ދަށުން ހިނގަމުންދާނެ އިދާރާއެއް ކަމަށް ކަނޑައަޅައިފައި ނުވާތީ، ހޯމް މިނިސްޓްރީގެ ދަށުން ހިނގަމުންދާ ތަނެއްގެ ގޮތުގައި ފުލުހުންގެ އިދާރާ ހިނގަމުންދާ ގޮތަށް އޮތްއޮތުން ބަދަލުކޮށްފައިވާ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެފައިވާ ކަމަށެވެ.
ރައީސް އޮފީހުގެ ޗީފް އޮފް ސްޓާފް އަލީ ޒާހިރު ފޮނުއްވި އެ ސިޓީގައި އިތުރަށް ވިދާޅުވެފައި ވަނީ މިގޮތަށް ހަމަޖެއްސުމާ ގުޅިގެން 2021 މާރިޗް 27ވަނަ ދުވަހުން ފެށިގެން ހޯމް މިނިސްޓްރީއާއި އެ މިނިސްޓްރީގެ ދަށުން ހިނގަމުންދާ ތަންތަނުގެ މަސައްކަތްތައް ހަމަޖައްސަވާފައިވާ ގޮތުގެ ލިޔުން ވެސް އެ ސިޓީއާ އެކު ފޮނުއްވާފައިވާނެ ކަމަށެވެ.
