ކަނޑު ދަތުރުފަތުރު ކުރުމުގެ އުސޫލު ހަރުކަށިކޮށް 2022 ގެ ކުރިން އަމަލު ކުރަން އަންގައިފި
ކަނޑު ދަތުރުފަތުރު ކުރުމުގެ އުސޫލު ހަރުކަށިކޮށް އަންނަ އަހަރުގެ ޖެނުއަރީ މަހުގެ 16 ވަނަ ދުވަހުގެ ކުރިން އަމަލު ކުރަން ޓްރާންސްޕޯޓް މިނިސްޓްރީން އަންގައިފިއެވެ.
އެ މިނިސްޓްރީން ނެރުނު ގަވާއިދުގައިވާ ގޮތުން، އޮއިލް ޕޮލިއުޝަން އެންޑް ޕްރިވެންޝަން ސެޓްފިކެޓް، ނުރައްކާތެރި މުދަލާއި ފަސޭހައިން އަލިފާން ހިފާ މުދާ އުފުލުމާ ބެހޭ ސެޓްފިކެޓް އަދި ސުވޭޖް ސެޓްފިކެޓް ފުރިހަމަކުރަން ޖެހެއެވެ.
މީގެ އިތުރުން އުޅަނދުފަހަރު މަރާމާތު ކުރުމަށް އެހެލުމަށް ފަހު ދޫކުރާ ލިޔުން އޮންނަން ވާނެއެވެ. އަދި ކެޕްޓަނުންނާއި، ފަޅުވެރިން އަދި މެރިން މެކޭނިކުންގެ އަތުގައި މޯލްޑިވްސް ޓްރާންސްޕޯޓް އޮތޯރިޓީއިން ޤަބޫލު ކުރާ ލައިސަންސް އަދި ސަނަދުތައް އޮންނަން ޖެހޭނެ ކަމަށް އެ ގަވާއިދުގައި ބަޔާންކޮށްފައިވެއެވެ.
މަތީގައި ދެންނެވުނު ކަންތައްތަކުގެ އިތުރުން ބޮޔަންޓް އެޕަރޭޓަސް ހުރުން، ވެސެލް ޓްރެކިންގ ޑިވައިސް ހަރުކުރުން، އުޅަނދުގެ މެނިފެސްޓް އެނގެން އޮތުން، ކެޕްޓަނާއި ފަޅުވެރިންގެ މެޑިކަލް އަދި ވަޒީފާގެ އެއްބަސްވުން ހުށަހެޅުން، އަދި ދުއްވާ އުޅަނދުތަކުގައި މުއާސަލާތީ އާލާތްތައް ހުރުން އަދި މިންގަޑުތަކާ އެއްގޮތަށް ލައިފް ޖެކެޓް އަދި ލައިފް ބޮއި ހުރުން ހިމެނެއެވެ.
ޓްރާންސްޕޯޓް މިނިސްޓްރީން ވިދާޅުވީ މި ދެންނެވި ކަންކަން ފުރިހަމަ ކޮށްފައިނުވާ ނަމަ އުޅަނދަށް ދޫކޮށްފައިވާ ސީވާދިނަސް ސެޓްފިކެޓް ބާތިލް ކުރެވޭނެ ކަމަށެވެ.
