100ކިލޯގެ މަސްތުވާތަކެތީގެ މައްސަލަ: ތިން މީހުންގެ ބަންދުގެ މުއްދަތު އިތުރުކޮށްފި
މި މަހުގެ 13ވަނަ ދުވަހު ފުލުހުން ހިންގި ޑްރަގް އޮޕަރޭޝަނެއްގެ ތެރެއިން 100 ކިލޯގެ މަސްތުވާތަކެއްޗާ އެކު ހައްޔަރުކުރި މީހުންގެ ތެރެއިން ތިން މީހެއްގެ ބަންދުގެ މުއްދަތު އިތުރުކޮށްފިއެވެ.
ފުލުހުން ހިންގި މި ހާއްސަ އޮޕަރޭޝަންގެ ތެރެއިން ހައްޔަރު ކޮށްފައި ވަނީ ލ. ކަލައިދޫ/ ޖަނަވަރީމާގެ މުހައްމަދު އަހްމަދު (34އ) އަދި ނ. ވެލިދޫ/ ބީޗްހެވެން ޖުމާން މުސްތަފާ (19އ)ގެ އިތުރުން ގއ. ކޮލަމާފުށި/ ސޯސަންގެ އިބްރާހިމް ޒައިދު ހަބީބް(25އ) އެވެ. އޭގެ ތެރެއިން މުޙައްމަދު އަޙްމަދާއި ޖުމާން މުސްތަފާގެ ބަންދަށް ކްރިމިނަލް ކޯޓުން ވަނީ އިތުރު 15 ދުވަސް ޖަހައިފައެވެ. އަދި އިބްރާހިމް ޒައިދުގެ ބަންދަށް އިތުރު ފަސް ދުވަސް ވަނީ އިތުރުކޮށްފައެވެ.
މި މައްސަލައިގައި ފުލުހުން ޖުމްލަ 10 މީހަކު ހައްޔަރު ކުރިއެވެ. މި މަހުގެ 14 ވަނަ ދުވަހު އެމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން އޭގެ ތެރެއިން ދެ މީހަކު ވަނީ ދޫކޮށްލައިފައެވެ. އެހެންކަމުން އެ ދެމީހުންގެ މައުލޫމާތު ފުލުހުން ހާމަ ކުރައްވައިފައެއް ނުވެއެވެ. ނަމަވެސް ކޯޓުން ދޫކޮށްލި ދެ މީހުންނަކީ 100 ކިލޯގެ މަސްތުވާތަކެތި ރާއްޖެ އެތެރެ ކުރުމުގައި އެންމެ އިސްކޮށް އުޅުނު ދެމީހުން ކަމަށް ފުލުހުން ކުރިން ވިދާޅުވެފައިވެއެވެ.
