ގަލޮޅު މަދަރުސާގައި ހަތަރު އަހަރުގެ ކުއްޖާއަށް ޖިންސީ ގޯނާކުރި މައްސަލަ މަޖިލީހަށް

ގަލޮޅު މަދްރަސާގައި ހަތަރު އަހަރުގެ ކުއްޖަކަށް ޖިންސީ ގޯނާކުރި މައްސަލައިގެ ފުރިހަމަ ތަޙްޤީޤެއް ހިންގައި އެކަމުގައި އިހުމާލުވި ފަރާތްތަކަށް ފިޔަވަޅުއެޅުމަށް ގޮވައިލައި މަޖިލީހަށް މައްސަލައެއް ހުށަހަޅައިފިއެވެ.

Ads by Sosun Fihaara

މިމައްސަލަ މަޖިލީހަށް ހުށަހެޅުއްވީ އިދިކޮޅު ޕީޕީއެމްގެ ނައިބު ރައީސް އަހުމަދު ޝިޔާމްއެވެ.

ޝިޔާމް ހުށަހެޅި މި މައްސަލައިގައި ބުނެފައި ވަނީ ގަލޮޅު މަދަރުސާގައި ކިޔަވަމުންދާ 4 އަހަރުގެ ކުއްޖަކަށް ޖިންސީ ގޯނާކުރި މައްސަލައެއް ފެންމަތިވެ އެ ތުއްތުކުއްޖާއަށާއި މުޅި ޢާއިލާއަށް ފޫނުބެއްދޭވަރުގެ ހިތާމައާ ކުރިމަތިލާން ޖެހިފައިވާއިރު، މި ޙާދިސާއާ ގުޅިގެން އެންމެ ފުރަތަމަ ވެސް ސްކޫލުން ޢަމަލުކޮށްފައި ވަނީ ވަރަށް ޒިންމާދާރުކަން ކުޑަކޮށްކަމަށެވެ. އަދި، ކުދިން ސްކޫލްގައި ހޭދަކުރާ ވަގުތަކީ އެކުދިންގެ ރައްކާތެރިކަމާއި ސަލާމަތްތެރިކަމުގެ ޒިންމާ ސްކޫލްތަކުން ފުރިހަމައަށް ނަގަންޖެހޭ ވަގުތުތަކެއް ކަމަށްވީ ނަމަވެސް ގަލޮޅު މަދަރުސާގައި އެ ދަރިވަރު ހަވާލުވެގެން ހުރި ޓީޗަރަށް ވެސް ދަރިވަރު ހަވާލުކުރެވުނީ ކާކާކަން ވެސް ނޭނގި އަދި ސްކޫލްގައި ކަން ހިނގައިދިޔަގޮތް ބެލޭނެ ކެމެރާތަކެއް ވެސް ނެތި، މިކަމުގެ ޒިންމާއިން ރެކެން ސްކޫލްގެ މެނޭޖްމަންޓުން މަސައްކަތްކޮށްފައިވާ ކަމަށެވެ.

އަދި މިފަދަ ހައްސާސީ މައްސަލަތަކުގައި މެޑިކަލް ރިޕޯޓް އަވަހަށް ހެދޭނެ އިންތިޒާމުތަކެއް އެކުލަވައިލުމަކީ ވަރަށް މުހިންމު ކަމެއް ކަމަށްވީ ނަމަވެސް އެކަން ވެސް ކުރެވުނީ ވަރަށް ލަހުން ކަމަށްވާތީއާއި ރިޕޯޓު ހެދުން ލަސްވުމަކީ މިފަދަ މައްސަލަތަކުގައި ލިބޭ އަނިޔާގެ މިންވަރު ދެނެގަތުމަށް އެޅޭ ހުރަހެއް ކަމަށާއި، މިމައްސަލައާ ގުޅިގެން އެޑިއުކޭޝަން މިނިސްޓްރީއާއި ޖެންޑަރ މިނިސްޓްރީން ނިންމަންޖެހޭ ނިންމުންތައް ލަސްކަމަށް އެ މައްސަލައިގައި ފާހަގަކޮށްފައިވެއެވެ.

މީގެ އިތުރުން މިމައްސަލައަށް ސަމާލުކަމެއް ލިބުނީ މީޑިއާއިން މިކަމާ ގުޅޭ ގޮތުން ރިޕޯޓުތައް ގެނެސްދޭން ފެށުމުން ކަމަށް ވާތީ، މިމައްސަލައިގައި ޝާމިލުވާ ހުރިހާ ފަރާތްތަކުން ވެސް ޢަމަލުކޮށްފައި ވަނީ ވަރަށް ޒިންމާދާރުކަން ކުޑަކޮށް ކަމަށް ފާހަގަކުރެވިފައިވާ ކަމަށާއި، އެތައް ސަތޭކަ ދަރިވަރުން ތަޢުލީމު ހާސިލްކުރަމުންދާ ސްކޫލަކުން ދަރިވަރަކަށް މިފަދަ އަނިޔާއެއް ލިބިގެން ދިއުމަކީ ސްކޫލްގެ ނިޒާމަށް ސްކޫލްތަކަށް ބެލެނިވެރިންގެ ހިތުގައި އޮތް ޔަގީންކަން ކުޑަވެ މުސްތަގްބަލުގެ ޖީލުތަކަށް މިކަމުގެ ސަބަބުން ނުހަނު ބޮޑެތި ގޮންޖެހުންތަކާ ކުރިމަތިލާން ޖެހިދާނެ ކަމެއް ކަމަށް ވެސް މައްސަލައިގައި ބުނެފައި ވެއެވެ.

ހަމަ އެހެންމެ މިކަމުގެ ސަބަބުން ބެލެނިވެރިންނާއި ދަރިވަރުންގެ ހިތްތަކުގައި ބިރުވެރިކަން އުފެދިފައިވާތީ ސްކޫލްތަކުގައި މިހާރަށް ވުރެ ބޮޑަށް ދަރިވަރުންނަށް ރައްކާތެރިކަން ކަށަވަރުކޮށްދިނުމަކީ ސަރުކާރުން ކޮންމެހެން ކުރަން ޖެހޭ ކަމެއް ކަމަށާއި ގަލޮޅު މަދަރުސާގައި 4އަހަރުގެ ކުއްޖަކަށް ޖިންސީ ގޯނާކުރި މައްސަލައިގެ ފުރިހަމަ ތަޙްޤީޤެއް ހިންގައި އެކަމުގައި އިހުމާލުވި ފަރާތްތަކަށް ފިޔަވަޅު އަޅައި މިފަދަ ކަންކަން ތަކުރާރު ނުވާ ފަދަ ގޮތަކަށް ސްކޫލްތަކުގެ ނިޒާމު އިތުރަށް ހަރުދަނާ ކުރަން ޖެހޭ ކަމަށް ވެސް މައްސަލައިގައި ބަޔާންކޮށްފައި ވެއެވެ.

މީގެ އިތުރުން ސްކޫލްތަކުގައި ދަރިވަރުންނަށް ރައްކާތެރިކަން ކަށަވަރުކޮށްދިނުމަށާއި، މިފަދަ މައްސަލަތަކުގައި
ކަމާބެހޭ މުއައްސަސާތަކުން އަވަސް ފިޔަވަޅު އެޅުމަށް ސަރުކާރަށް ގޮވައިލާކަމަށް އެ މައްސަލަގައި ބަޔާންކޮށްފައި ވެއެވެ.