ރައީސް ނަޝީދު ޗައިނާއަށް: ރާއްޖެ ނެތި ގޮސްފި ނަމަ ލޯނެއް ނުދެެއްކޭނެ، ލޯނުން ބައެއް ތިމާވެއްޓަށް ޚަރަދު ކުރަން ފުރުސަތުދީ

ރާއްޖެއިން ބޭރު ޤައުމުތަކަށް ދަރައިފައިވާ ދަރަނި އަދާކުރުމުގެ ބަދަލުގައި އެ މިންވަރުގެ ތެރެއިން ކޮންމެ ވެސް މިންވަރެއް. މޫސުމަށް އަންނަ ބަދަލުތަކުގެ ސަބަބުން ލިބޭ ގެއްލުމުން ސަލާމަތްވުމަށް ހިންގާ މަޝްރޫއުތަކަށް ޚަރަދުކުރެވޭ ފައިސާކަމުގައި ކަނޑައަޅައިދިނުމަށް ކޮޕް26ގައި އެދޭނެ ކަމަށް، މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވިއެވެ.

Ads by Sosun Fihaara

ރައީސް ނަޝީދު މިވަގުތު ހުންނެވީ ކޮޕް26ގައި ބައިވެރިވެ ވަޑައިގަތުމަށް ސްކޮޓްލެންޑުގެ ގްލާސްގޯގައެވެ. ގްލާސްގޯގައި ހުންނަވާ ބީބީސީއަށް ދެއްވި އިންޓަރވިއުއެއްގައި ރައީސް ނަޝީދުވަނީ މޫސުމީ ބަދަލުތަކުގެ ސަބަބުން ދިވެހި ރާއްޖެއަށް ކުރިމަތިވާ ގެއްލުންތަކާ ބެހޭ ގޮތުން ވާހަކަފުޅު ދައްކަވައިފައެވެ. މިގޮތުން، މޫސުމީ ބަދަލުތަކަށް ނުވިސްނާ، ކުރިޔަށް އޮތްތާންގައި މިހާރު ދުނިޔޭގެ ޤައުމުތަކުން ކަންތައް ކުރަމުންދާ އުސޫލަށް ބަދަލު ނުގެނެސްފި ނަމަ، ރާއްޖެ އަނޑިޔަށް ހިނގައިދާނެ ކަމަށް ރައީސް ނަޝީދު ވިދާޅުވިއެވެ.

މޫސުމީ ބަދަލުގެ އަސަރުތައް އެންމެ ބޮޑަށް ކުރާ ގައުމުތައް ހިމެނޭ ކްލައިމެޓް ވަލްނަރަބަލް ފޯރަމް (ސީވީއެފް)ގެ އެމްބިޝަން އެމްބެސެޑަރުގެ މަޤާމު ވެސް ފުރުއްވަމުންދާ ނަޝީދު ވިދާޅުވީ، ރާއްޖެއިން ކޮޕް26ގައި ދަރަނި ސްވެޕް ކުރުމަށް އެދޭނެ ކަމަށެވެ. މިގޮތުން ރާއްޖެ އެންމެ ބޮޑަށް ދަރައިފައި އޮތީ ޗައިނާއަށްކަން ފާހަގަ ކުރަމުން ރައީސް ނަޝީދު ވިދާޅުވީ ޗައިނާ ފަދަ ބޮޑެތި ޤައުމުތަކުން ނެގި ދަރަނިތައް ދައްކަން ޖެހޭތީ ތިމާވެށީގެ ކަންކަމަށް ކުރާ ޚަރަދު ކުޑަ ކުރަން ޖެހޭ ކަމަށެވެ. ރައީސް ނަޝީދު ވިދާޅުވީ، މޫސުމަށް އަންނަ ބަދަލުތަކުން ރައްކާތެރިވުމަށް ވެސް ބަޖެޓުގެ 30 އިންސައްތަ ހޭދަކުރަން ޖެހިފައިވާކަމަށާއި ލޯނުގެ އަނބުރާ ދެއްކުމަށް ބަޖެޓްގެ 20 އިންސައްތަ ހޭދަ ކުރަން ޖެހޭ ކަމަށެވެ.

"މީގަ އެންމެ ދެރަވާ ތަންކޮޅަކީ، ލޯނު ބޭނުންކޮށްގެން އުފެއްދި އެސެޓްތައް މިވަނީ ތިމާވެށީގެ ބަދަލުތަކުގެ ސަބަބުން ނުރައްކަލަށް ހުށަހެޅިފައި. ހެދި މަގުތަކާއި، ބްރިޖްތަކާއި ހޮސްޕިޓަލްތައް މޫސުމީ ސަބަބުތަކާ ހެދި ހަލާކު އެބަވޭ. އަދި ބައެއް އެސެޓްތައް ހިމާޔަތް ކުރަން، މިސާލަށް މަގުތައް ހިމާޔަތް ކުރަން އެބަ ޖެހޭ އިތުރު ޚަރަދުކޮށްގެން ގައު ޖަހާ ނުގިރާ ގޮތަށް ހަދަން" ރައީސް ނަޝީދު ވިދާޅުވީ މިފަދަ ކަންކަމަކީ ގިިނަ ޚަރަދުތައް ހިނގާ ކަންކަން ކަމަށެވެ.

ލޯނު ސްވެޕް ކުރުމުގެ މުހިންމު ކަމަށް އަލި އަޅުވައިލައްވަމުން ރައީސް ނަޝީދު ވިދާޅުވީ، ތިމާވެށީގެ މައްސަލަތަކުން އަރައިގަތުމަށް ލޯނުގެ ބައެއް ތިމާވެށީގެ މަޝްރޫއުތަކަށް ޚަރަދު ކުރެވޭ ފައިސާ ކަމަށް ކަނޑައެޅޭނެ ގޮތެއް މުހިންމު ކަމަށެވެ. އަދި މިފަދަ ގޮތަކަށް ކަންތައް ނުކުރެވިއްޖެ ނަމަ، ރާއްޖެ ފަދަ ކަނޑުގެ ލޮނުގަނޑު އުފުލިއްޖެ ނަމަ އަޑިއަށް ގޮސްފާނެކަމުގެ ބިރު އޮންނަ ޤައުމުތަކުން، ލޯނު އަނބުރާ ނުދެއްކޭނެ ކަމަށްވެސް ވިދާޅުވިއެވެ.

"ރާއްޖެ ނެތް ނަމަ، ލޯނެއް ވެސް ނުދެއްކޭނެ. ލޯނު ދެއްކުން ފަސްކޮށްދީ، އެ ފައިސާ ތިމާވެށީގެ ކަންކަމަށް ޚަރަދު ކުރުމަކީ ބުއްދިވެރި ގޮތް. އެއީ ދެކޮޅަށް ވެސް ވިންއެއް." ރައީސް ނަޝީދު ވިދާޅުވިއެވެ.

ކޮޕް ސަމިޓަކީ މޫސުމަށް އަންނަ ބަދަލުތަކާ ބެހޭ މުއާހަދާ ޔުނައިޓެޑް ނޭޝަންސް ފްރޭމްވޯކް ކޮންވެންޝަން އޮން ކްލައިމެޓް ޗޭންޖް (ޔޫއެންއެފްސީސީސީ)ގެ ދަށުން ކޮންމެ އަހަރަކު އެއްފަހަރު ބާއްވާ ސަމިޓެކެވެ. ކޮޕްއަކީ މި މުއާހަދާ ތަންފީޒު ކުރާނެ ގޮތަކާ މެދު މަޝްވަރާ ކުރުމަށް އެއްމޭޒެއްގެ ދޮށަށް އަންނަ އެންމެ މަތީ ނިންމުންތައް ނިންމާ ސަމިޓެވެ. މިއީ މިފަދަ 26 ވަނަ ބައްދަލުވުމެވެ. މި ބައްދަލުވުމުގައި ރާއްޖޭގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވެސް ބައިވެރިވެ ވަޑައިގަންނަވައެވެ.