މާލޭ އެތެރޭގެ ޓެކްސީ ދަތުރުތައް ނުނަގާ މައްސަލަ ބޮޑުވެއްޖެ

މާލޭ ސަރަހައްދުގެ އެތެރޭގެ ދަތުރުތަކަށް ޓެކްސީ ނުލިބޭ މައްސަލަ ބޮޑުވެއްޖެއެވެ.

Ads by Hajj Corporation

ހިޔާ ފްލެޓަށް މީހުން ބަދަލުވާން ފެށުމާ އެކު، ހުޅުމާލޭ ދެވަނަ ފިޔަވެއްސަށް ކުރާ ދަތުރުތައް ވަނީ އިތުރުވެފައެވެ. ޓްރާންސްޕޯޓް މިނިސްޓްރީން މާލޭގެ އެކި ސަރަހައްދުތަކަށް ދަތުރު ކުރެވޭ އަގުތައް ކަނޑައެޅި ނަމަވެސް، ހުޅުމާލޭ ދެވަނަ ފިޔަވެއްސަށް ކުރާ ދަތުުރުތަކަށް އަގު ކަނޑައަޅައިފައެއް ނުވެއެވެ. މިއާއެކު ޑްރައިވަރުން އަމިއްލަ އަގުތަކެއްގައި ދަތުރުތައް ކުރެއެވެ.

މިގޮތުން ހުޅުމާލޭ ދެވަނަ ފިޔަވައްސަށް ކުޑަ ޕިކަޕަކުން 300ރ. އާއި 400ރ. އާ ދެމެދުގެ އަގެއް ނަގާ އިރު ބޮޑު ޕިކަޕަކުން 600ރ. އާއި 700ރ. އާ ދެމެދުގެ އަގެއް ނަގައެވެ. ކާރު ޑްރަވަރުން ނަގަމުންދަނީ އެވަގުތަކު ހިތަށް އެރި އަގެކެވެ. މިހެންވެ، ހުރިހާ ޓެކްސީ ޑްރައިވަރުން ވެސް ބޭނުން ވަނީ ބޮޑެތި އަގުތަކުގައި ހުޅުމާލޭ ދަތުރުތައް ނަގާށެވެ.

މިކަމާ ގުޅިގެން ރާއްޖޭގައި އެޕް މެދުވެރިކޮށް ޓެކްސީ ޚިދުމަތް ދެމުން އަންނަ "އަވަސް ރައިޑް"އާ ސުވާލު ކުރުމުން ބުނެފައި ވަނީ، ޓްރާންސްޕޯޓް މިނިސްޓްރީން ވަކި އަގުތަކެއް ކަނޑަނާޅާ ހިނދަކު، އަގުތައް އެއްވަރެއްގައި ހިފެހެއްޓުމަށް ދަތިވާނެ ކަމަށެވެ. އަދި ހަމައެކަނި ދިގު ދަތުރުތައް ނަގާ ޓެކްސީ ޑްރައިވަރުން ހުއްޓުވޭނެ ގޮތެއް ނެތް ކަމަށާއި، އެއް ޑްރައިވަރަކު ދަތުރު ނަގަން ބޭނުންނުވާ ނަމަ ޓެކްސީކުރަން އިތުރު ހާހެއްހާ ޑްރައިވަރުން ތިބޭނެ ކަމަށް އަވަސް ރައިޑްގެ ސީއޯއޯ އިސްމާއިލް އަޒްމީ އަދުނާން ވިދާޅުވިއެވެ.

"އަޅުގަނޑުމެންގެ ދަތުރުތަކުގެ 88 އިންސައްތަ އެއީ މާލޭގެ އެތެރޭގެ ދަތުރުތައް. މާލޭގެ އެތެރޭގެ ދަތުރުތަކަށް ޑިމާންޑް ވަރަށް ބޮޑު، ބައެއް ފަހަރު ދަތުރު ލިބުމުގައި ލަސްތަކެއް ދިމާވާ ކަމަށް ޤަބޫލު ކުރަން" އަޒްމީ ވިދާޅުވީ އެއް ޑްރައިވަރަކު ޓެކްސީ ދަތުރު ނަގަން ބޭނުން ނޫން ނަމަ އެންމެ ކައިރީގައި ދެން އޮތް ޑްރައިވަރަކަށް ދަތުރު ޕާސް ކުރެވޭނެ ކަމަށެވެ.

މީގެ އިތުރުން ޓެކްސީ ދަތުރު ކުރުމުގެ ހުއްދަ ލިބިފައިވާ ފަރާތްތައް ނޫން އެހެން ފަރާތްތައް ވެސް ޓެކްސީ ކުރަމުންދާ ކަމުގެ މައްސަލަތައް މީސްމީޑިއާގައި ދައުރުވެފައި ވެއެވެ. މިކަމާ ގުޅިގެން ސުވާލު ކުރުމުން އަޒްމީ ވިދާޅުވީ، އެފަދަ ޝަކުވާ ވަރަށް މަދު ފަހަރަކު އަންނަ ކަމަށާއި ޝަކުވާއެއް އައިސްފިނަމަ އެކަން ހިނގިގޮތް ބަލައި ފިޔަވަޅު އަޅާ ކަމަށެވެ.

އެޕް މެދުވެރިކޮށް ޓެކްސީތައް ނަގާއިރު، ޓެކްސީ ޑްރައިވަރަކީ ކޮބައިކަން އެނގޭ ގޮތަށް ހުންނަން ޖެހެއެވެ. އެހެން ނަމަވެސް ބައެއް ފަހަރު ޓެކްސީ ހުއްދަދިން ފަރާތް ނޫން އެހެން ފަރާތަކަށް ޓެކްސީ ކުރަން ދިނުމަށް ފަހު، ޓެކްސީ އެޕްގެ ފޮޓޯ ނަގައެވެ. އަދި ބައެއް ފަހަރު ލައިސެންސް ނެތް ފަރާތްތަކުން ވެސް ޓެކްސީ ކުރާކަަމަށް މީސްމީޑިއާގައި ބައެއް ފަރާތްތަކުން ރިޕޯޓްކުރެއެވެ. އަޒްމީ ވިދާޅުވީ، އެފަދަ ކަންކަން ކުރޭތޯ އަބަދުވެސް މޮނިޓަރ ކުރާ ކަމަށެވެ.