އަބޫޖަހުލަށް ހަދާލި ގޮތް ރައީސް ނަޝީދަށް ހަދާނެ ކަމަށް ބުނި މީހާގެ މައްޗަށް 3 ދައުވާއެއް
އަބޫޖަހުލަށް ހަދާލި ގޮތް، ރައްޔިތުންގެ މަޖިލީހުގެ ރައީސް މުޙަައްމަދު ނަޝީދަށް ހަދާނެ ކަމަށް ބުނި މީހާގެ މައްޗަށް 3 ދައުވާއެއް ކޮށްފިއެވެ.
މި މައްސަލައިގައި ހައްޔަރު ކޮށްފައި ވަނީ އިސްމާއިލް ޔާސިފް ކިޔާމީހެކެވެ.
ޔާސިފްގެ މައްޗަށް އުފުލައިފައި ވަނީ ޓެރަރިޒަމްގެ އަމަލެއް ކުރަން ހިތްވަރު ދިނުމުގެ ދައުވާއާއި ޓެރަރިޒަމްގެ އަމަލެއް ހިންގާނެކަމުގެ އިންޒާރު ދިނުން ނުވަތަ ބިރު ދެއްކުމުގެ ކުށުގެ ދައުވާއާއި ޓެރަރިސްޓް ޖަމާއަތަކަށް ތާއީދުކުރުމުގެ ދައުވާއެވެ. މި ދައުވާތައް ސާބިތުވެއްޖެ ނަމަ އޭނާގެ މައްޗަށް 26 އަހަރުގެ ޖަލު ހުކުމެއް އަންނާނެއެވެ.
ޔާސިފް ހައްޔަރު ކުރީ ރ. މީދޫގައި ހުއްޓާ އޮގަސްޓް 23 ވަނަ ދުވަހުއެވެ. އޭނާ ހައްޔަރު ކުރީ ފޭސްބުކް ޕޯސްޓެއްގައި ކުރި ކޮމެންޓެއްގައި ރައީސް ނަޝީދު ދެން ރާއްޖެ އަތުވެއްޖެ ނަމަ "ބަދުރު ދުވަހު އަބޫޖަހުލަށް ހެދިގޮތް ހަދާނަން" ކަމަށް ބުނެ އިންޒާރު ދިނުމުންނެވެ. ރައީސް ނަޝީދު އެއިރު ހުންނެވީ، އެ މަނިކުފާނު އަވަހާރަކޮށްލަން ދިން ހަމަލާއަށް ފަހު ފަރުވާ ހޯއްދަވަން ރާއްޖެއިން ބޭރުގައެވެ.
އުމުރުން 40 އަހަރުގެ ޔާފިސް ހައްޔަރުކޮށްގެން ބަންދު ޖަހަން ފުރަތަމަ ގެންދިޔައީ އުނގޫފާރު ކޯޓަށެވެ. އެ ދުވަހު އެ ކޯޓުގެ ހުރުމަތް ކަނޑާލައިގެން އޭނާ 15 ދުވަހަށް ޖަލަށް ލާން ހުކުމް ކުރިއެވެ.
