ސެޓެލައިޓް ސުކޫލް ހުޅުވުން އަނެއްކާ ވެސް ފަސްކޮށްފި
ބ. ފެހެންދޫ، ވ. ރަކީދޫ އަދި ވ. ތިނަދޫގައި ހަދަމުންދާ ސެޓެލައިޓް ސުކޫލުތައް ހުޅުވުން ފަސްކޮށްފިއެވެ.
މިމަހުގެ 24ވަނަ ދުވަހު ސެޓްލައިޓް ސުކޫލުތައް ހުޅުވުމަށް ކުރިން ގަސްތުކޮށްފައިވީ ނަމަވެސް ޓެސްޓު ކައިރިވެފައިވާތީ އެ ސުކޫލުތައް ހުޅުވުން ފަސްކުރުމުގެ ވިސްނުމެއް އެބަހުރި ކަމަށް އެޑިއުކޭޝަނުން ވިދާޅުވިއެވެ.
"ދެން"އަށް މައުލޫމާތު ދެއްވަމުން އެޑިއުކޭޝަން މިނިސްޓްރީގެެ މީޑިޔާ އޮފިޝަލު ވިދާޅުވީ އެފަދަ ވިސްނުމެއް ހުރި ނަމަވެސް އެ ސުކޫލުތައް ހުޅުވާނެ ވަކި ތާރީހެއް ނުނިންމާ ކަމަށެވެ.
ސެޓެލައިޓް ސުކޫލްތައް ހުޅުވަން ނިންމީ ސުކޫލަށް ދާނެ ދަރިވަރުން މަދު ރަށްރަށުގައި ރަނގަޅު ޓީޗަރުން މެދުވެރިކޮށް ހަރަދު ކުޑަކަމާ އެކު ކިޔަވައި ދިނުމަށް ޓަކައެވެ.
ސެޓެލައިޓް ސްކޫލު ހަދާ ރަށްތަކުގައި ދަރިވަރުން ސްކޫލަށް ހާޒިރުވެ ކިޔަވައިދޭން ފަށާއިރު ވަސީލަތްތަކާއި މުދައްރިސުން ތިބޭނެ ކަމަށް މިނިސްޓްރީން ވިދާޅުވިއެވެ. އަދި އެހެން ރަށްތަކުގެ ސްކޫލުތަކާ ގުޅިގެން ދަރިވަރުންނަށް އިތުރު ހަރަކާތްތަކުގައި ބައިވެރިވެވޭނެ އިންތިޒާމުތައް ހަަމަޖެއްސުމަށް ވެސް އެޑިޔުކޭޝަން މިނިސްޓްރީން ދަނީ މަސައްކަތް ކުރައްވަމުންނެވެ.
އެޑިއުކޭޝަނުން ވިދާޅުވީ، މި ސުކޫލުތަކުގައި ކިޔަވަން ބޭނުންވާ ދަރިވަރުން ބޭނުންކުރަމުން ގެންދާނީ އެ ދަރިވަރަކު މިހާރު ކިޔަވަމުންދާ ސްކޫލެއްގެ ޔުނިފޯމު ކަމަށެވެ. އެޑިއުކޭޝަނުން ވަނީ ކޮންމެ ދަރިވަރަކަށް ބޭނުންވާނެ އިންޓަނެޓާއި، ކޮމްޕިއުޓަރުގެ ވަސީލަތްތައް ހަމަޖެހިގެންދާނެކަމަށް ވެސް ވިދާޅުވެފައެވެ.
