ރައްޔިތުން ބާރުވެރި ކުރުވުމަށް މި 3 އަހަރު ތެރޭ ބޮޑެތި ބަދަލުތަކެއް ގެނެވިއްޖެ: އެމްޑީޕީ
މި ސަރުކާރަށް މިވީ ތިން އަހަރުގެ ތެރޭގައި ރައްޔިތުން ބާރުވެރިކުރުވުމަށާއި ލާމަރުކަޒުކުރުމަށް ބޮޑެތި އިސްލާހީ ބަދަލުތަކެއް ގެނެސްފައިވާ ކަމަށް ސަރުކާރު ހިންގާ ކޯލިޝަނުގެ މައި ޕާޓީ، އެމްޑީޕީން ބުނެފިއެވެ.
އެމްޑީޕީން ނެރުނު ބަޔާނެއްގައި ، މި ސަރުކާރުގެ 3 އަހަރު ދުވަހުގެ މުއްދަތުގެ ތެރޭގައި ގިނަ، ބޮޑެތި ބަދަލުތަކެއް ރައްޔިތުންނަށާއި ރާއްޖެއަށް ގެނެސްދެއްވާފައިވާކަން ފާހަގަކޮށް ރައީސް އިބްރާހިމް މުހައްމަދު ޞާލިޙަށާއި ސަރުކާރަށް ވަނީ މަރުހަބާ ކިޔައިފައެވެ.
އެމްޑީޕީން އިތުރަށް ބުނީ މި ސަރުކާރުގެ ތިން އަހަރު ތެރޭގައި، ސަރުކާރުން ރައްޔިތުންނަށް ބިރު ދެއްކުމާއި އަނިޔާވެރިކަން އިސްކުރުން ނިމުމަކަށް ގެނެސްފައިވާ ކަމަށެވެ. އަދި ޑިމޮކްރެސީއާއި ގާނޫނުގެ ވެރިކަމަށް އަހުމިއްޔަތުކަން ދެވި، ހެޔޮ ވެރިކަމުގެ ނިޒާމެއް ގާއިމުކޮށްފައިވާ ކަމަށާއި ޖުޑިޝަރީ އިސްލާހު ކުރެއްވުމުގެ މަސައްކަތުގެ ތެރެއިން އައު ސްޕްރީމް ކޯޓެއް އައްޔަނުކޮށް، ހެޔޮ ބަދަލުތަކެއް ގެންނަމުންދާ ކަމަށެވެ.
ހަމައެއާ އެކު މިނިވަން މުވައްސަސާތަކަށް ނުފޫޒުފޯރުވުމުގެ ސަގާފަތް ބަދަލުކޮށް، އެ ތަންތަން މިނިވަންކަމާއި މުސްތަގިއްލުކަމާ އެކު މަސައްކަތްކުރުމަށް ސަރުކާރު ހުރަހަކަށް ނުވާ ގޮތަށް ބައްޓަން ކޮށްފައިވާކަމަށް އެމްޑީޕީން ބުނެއެވެ. އެމްޑީޕީން ބުނީ މި ސަރުކާރާއެކު ސިޔާސީ ހަރަކާތްތަކަށާއި މީޑިއާގެ މިނިވަންކަމަށް ޖާގަދެވި، އެކަންކަން ކަށަވަރުކޮށްދެމުންދާ ކަމަށެވެ.
އެމްޑީޕީގެ މި ސަރުކާރުގައި އދގެ 76 ވަނަ އާންމު މަޖިލީހުގެ ރިޔާސަތަށް ރާއްޖޭގެ ޚާރިޖީ ވަޒީރު އަބްދުﷲ ޝާހިދު އިންތިޚާބުވެ ވަޑައިގެންފައިވާކަން އެ ޕާޓީން ވަނީ ފަޚުރުވެރިކަމާ އެކު ފާހަގަކޮށްފައެވެ. އަދި މި 3 އަހަރުގެ ތެރޭގައި ރާއްޖެއާއި ބައިނަލްއަގްވާމީ ދުނިޔެއާ ގުޅުން ވަރަށް ބޮޑަށް ބަދަހިވަމުން ގޮސްފައިވާކަމަށް ވެސް އެމްޑީޕީގެ ބަޔާނުގައިވެއެވެ.
