ނަފުރަތާއި ބަދަލުހިފުމާއި ގޮތްދޫނުކުރުން ރައީސް ޞާލިޙްގެ ފަރާތަކުން ނުފެނޭ: އެމްޓީޑީ

ނަފުރަތާއި ބަދަލު ހިފުމާއި، ގޮތް ދޫނުކުރުން ރައީސް ޞާލިޙްގެ ފަރާތުން ނުފެނުމަކީ މި ސަރުކާރުން ވައުދުވި ހެޔޮވެރިކަން ރައްޔިތުންނަށް ކޮށްދެއްވަމުން ދާކަމުގެ ފުރިހަމަ މިސާލެއް ކަމަށް މޯލްޑިވްސް ތާޑްވޭ ޑިމޮކްރެޓްސް (އެމްޓީޑީ)އިން ބުނެފިއެވެ.

Ads by Hajj Corporation

ސަރުކާރަށް މިއަދު ތިން އަހަރު ފުރުމާ ގުޅިގެން އެމްޓީޑީން ނެރުނު ނޫސްބަޔާނެއްގައި ބުނެފައި ވަނީ ކޮވިޑް-19 ހާލަތުގައި ވެސް ދިވެހިރާއްޖެ 2020ވަނަ އަހަރުގެ މެދުތެރޭ ކެރިގެން ހުޅުވައިލައި ޓުއަރިޒަމްއާއި އިގްތިސާދީ ހަރަކާތްތައް ހިންގި މަދު ގައުމުތަކުގެ ތެރޭގައި ރާއްޖެ ހިމެނުމަކީ މިހައި އަވަހަށް ރާއްޖޭގެ ހާލަތު ރަނގަޅުވި ސަބަބެއް ކަމަށެވެ.  އަދި ދިވެހިރާއްޖެ މުޅި ދުނިޔެއާ ގުޅުން ބަދަހިކޮށް މުޅި ގައުމަށް ބޭނުންވާ ވެކްސިން ހޯދާ ހުރިހާ ރައްޔިތުންނަށް ވެކްސިން ހިލޭ ޖަހައިދީފައިވާ ކަމަށާއި އިންސާނިއްޔަތުކަން އިސްކޮށް، ރާއްޖޭގައި މަސައްކަތް ކުރާ ބިދޭސީން ވެސް އިސްތިސްނާނުކޮށް ވެކްސިން ހިލޭ ޖަހައިދީ މުޅި އިގްތިސާދު ހަމަޔަކަށް އަޅައިދިނީ ވެސް މި ސަރުކާރުން ކަމަށް އެ ބަޔާނުގައި ބުނެފައި ވެއެވެ.

މީގެ އިތުރުން ކޮވިޑްގެ ހާލަތާއި، އަތޮޅުތެރޭގައި މީގެ ކުރިން ތަރައްގީގެ ޕްރޮޖެކްޓްތައް ނުހިންގާ ވަރަށް ހިންގާ، އެއްވެސް އަސާސީ ކަމަކަށް ބުރޫ އެރިޔަ ނުދީ ދައުލަތުގެ ވަޒީފާތަކުން ރައްޔިތުން ވަކި ނުކޮށް، އާބޮޑު ބްރިޖެއް އަޅަމުން ކުރިއަށް ވަޑައިގަތުމަކީ ރައީސް ސޯލިހުގެ ލީޑަރޝިޕްކަމަށް އެމްޓީޑީން ބުނެއެވެ.

“ހަގީގަތަކީ 2012އިން 2019އާ ހިސާބަށް ދުނިޔޭގެ އިގްތިސާދުގައި އޮތް ހަމަޖެހުމާއި މިދިޔަ ދެއަހަރުގެ ދުނިޔެއަށް ދިމާވި ސިއްހީ ނުރައްކަލާ، އިގްތިސާދީ ހަލަބޮލިކަމާ ނާޒުކުކަން އަޅައެއް ނުކިޔޭނެ. ފުރިހަމައަށް ދުވާ ފްލައިޓެއް އެތައް ބައެއްގެ މަސައްކަތުން ގޭގައި ތާސްކުޅެން އިންދާ ރައީސް ޔާމީނަށް ލިބުމުން އޮޓޯ ޕައިލެޓްގައި ދުއްވުމާއި ދެއިންޖީނު ފެއިލްވުމުން ވެސް ސާބިތުކަމާ އެކީ ކެޕްޓަން ރައީސް ސޯލިހު ހާސް ނުވެ ހަމަޖެހިލައިގެން އަޅަން ޖެހުނު ހުރިހާ ފިޔަވަޅުތަކެއް އަޅައިގެން އެންމެން ސަލާމަތުގެ އައްސޭރިއަށް ގެންދިއުމަކީ އަޅާކިޔޭނެ ދެ ކަމެއް ނޫން. އެހެންކަމުން މިފަދަ ބޮޑު ކާރިސާއެއް މެނޭޖް ކުރައްވަމުން ، އަތޮޅުތެރޭގައި މީގެން ޒަމާނެއްގައި ތަރައްގީގެ ޕްރޮޖެކްޓްތައް ނުހިންގާ ވަރަށް ހިންގާ، އެއްވެސް އަސާސީ ކަމަކަށް ބުރޫ އެރިޔަ ނުދީ ދައުލަތުގެ ވަޒީފާތަކުން ރައްޔިތުން ވަކި ނުކޮށް، އާ ބޮޑު ބްރިޖެއް ވެސް އަޅަމުން ހިތްވަރާ އެކީ ކުރިއަށް ވަޑައިގަތުމަކީ ރައީސް ސޯލިހުގެ ލީޑަރޝިޕް” އެ ބަޔާނުގައި ބުނެފައިވެއެވެ.

މީގެ އިތުރުން ހިލޭ ޑިގްރީ ޕްރޮގޮރާމްތަކާއި އިންސާނީ ހައްގުތަކަށް އިސްކަން ދިނުމާއި ޖުޑީޝަލް އަދި ލީގަލް ރިފޯރމް މަޑުޖެހުމެއް ނެތި ގެނެސްދެއްވަމުން ދާ ކަމަށް ވެސް އެމްޓީޑީން ފާހަގަކުރެއެވެ.