މާލޭގެ މިސްކިތްތައް މަރާމާތުކުރަން 14 މިލިއަން ބޭނުންވޭ، ސަރުކާރުން ދިނީ އެއްމިލިއަން

މާލެ ސަރަހައްދުގެ 28 މިސްކިތެއްގެ މަރާމާތަށް 14 މިލިއަން ރުފިޔާ ބޭނުންވާ ކަމަށާއި އެހެން ނަމަވެސް ސަރުކާރުން އެކަމަށް ދޭން ނިންމީ އެއް މިލިއަން ރުފިޔާގެ ބަޖެޓެއްކަމަށް މާލެ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.

Ads by MWSC

މިއަދު އޮތް ނޫސްވެރިންގެ ބައްދަލުވުމެއްގައި ޑރ. މުއިއްޒު ވިދާޅުވީ އަންނަ އަހަރުގެ ރަމަޟާން މަސް އައުމުގެ ކުރިން މިސްކިތްތައް މަރާމާތު ކުރުމުގެ މަސައްކަތް ނިންމަން ބޭނުންވާ ކަމަށެވެ. ބަޖެޓުގެ ދަތިކަން ކުރިމަތިވެފައި ވާތީ މިސްކިތްތަކުގެ މަރާމާތަށް ވަގުފު ފަންޑުން ވެސް ފައިސާ ހޯދަން ހުށަހަޅައިފައިވާނެ ކަމަށާއި އުއްމީދު ކުރައްވަނީ އެ ފައިސާ ހަމަޖެހިގެންދާނެކަމުގައި ކަމަށް މުއިއްޒު ވިދާޅުވިއެވެ.

"އެކަމަކު އަޅުގަނޑުމެންނަށް މަޑުކުރެވޭކަށް ނެތް ، ވަގުފް ފަންޑުން އެކަނި ފައިސާ ލިބޭނެކަމަށް ބަލައިގެން. އިރާދަކުރެއްވިއްޔާ ލިބޭނެ. އެކަމަކު ރޯދަމަސް އަންނަންވާއިރަށް މާލެ ސިޓީ ކައުންސިލުން ބޭނުން މާލެ ސިޓީގައި ހުރި ހުރިހާ މިސްކިތެއް މަރާމާތުކޮށް ނިންމަން" މުއިއްޒު ވިދާޅުވިއެވެ.

ބޮޑެތި މަރާމާތުތަކެއް ކުރަން ޖެހިފައިވާ ބައެއް މިސްކިތްތަކުގެ ތަފްސީލު ވެސް މުޢިއްޒު ދެއްވިއެވެ. ތަފްސީލުކޮށް ސާވޭއެއް ތައްޔާރުކޮށްފައިވާ ކަމަށާއި މާލޭގައި ހުރި ހުރިހާ މިސްކިތެއްގެ މަރާމާތަށް 14 މިލިއަން ރުފިޔާ ބޭނުންވާކަމަށް ވެސް މުއިއްޒު ވިދާޅުވިއެވެ.

ސިޓީ ކައުންސިލްގެ މި ދައުރު ފެށުނުއިރު މާލޭގެ މިސްކިތްތަކުގެ މަރާމާތުތައް މިހައި ބޮޑަށް އިތުރުވެފައި ހުރުމުން ޑރ. މުއިއްޒު ކަންބޮޑުވުން ފާޅުކުރެއްވިއެވެ. މިސާލު ނަންގަވަމުން މޭޔަރު ވިދާޅުވީ ފުރުގާން މިސްކިތް އޮތީ ބޮލަށް ވެއްޓޭ ހާލަތުގައޭ ދެންނެވިޔަސް ދޮގަކަށް ނުވާނެ ކަމަށާއި ހުޅުމާލޭގައި ހުރި ބޮޑު މިސްކިތުގެ ހާލަތު ވެސް ވަރަށް ދަށްކަމަށެވެ.

"އެހެންވީމަ އަޅުގަނޑުމެން ބޭނުން ވަނީ، މިސްކިތްތަކަށް ހަރަދު ކުރުމަކީ ދީނީގޮތުން ވެސް ވަރަށް މާތް ކަމަކަށް ވާތީވެ، ރައްޔިތުންގެ ތެރެއިން ވަރަށް ގިނަ މީހުން ބޭނުންވޭ މިސްކިތްތަކަށް އެހީވާން." މުއިއްޒު ވަނީ މާލެ ސިޓީ ކައުންސިލުން މިސްކިތްތައް މަރާމާތުކުރުމަށް ބޭނުންވާ ފައިސާ ހޯދަން ހާއްސަ ޓެލެތޯންއެއް އަންނަ މަހު ފަށާނެކަން އިއުލާން ކުރައްވައިފައެވެ.

މޭޔަރު ވިދާޅުވީ ޓެލެތޯން އޮންނާނީ އަންނަ ޑިސެމްބަރު މަހުގެ 10 އަދި 11ވާ ހަފްތާ ބަންދުގައި ސަލްޓަން ޕާކުގައި ކަމަށެވެ. މިޓެލެތޯންއަށް ވިޔަފާރިވެރިންނަށް ވެސް ދައުވަތު ދެއްވާނެކަމަށާއި، އާންމުކޮށް ހުރިހާ ރައްޔިތުންނަށް ޓެލެތޯންގައި ބައިވެރިވެވޭނެކަމަށް މުއިއްޒު ވިދާޅުވިއެވެ.

އެ ޓެލެތޯންގައި މަރާމާތުކުރަންޖެހޭ ކޮންމެ މިސްކިތަކަށް ސްޓޯލެއް ބަހައްޓައި ބޭނުންވާ މަރާމާތުތަކުގެ ތަފްސީލު އެ ސްޓޯލްތަކުން ލިބޭނެ އިންތިޒާމު ހަމަޖައްސާނެކަމަށް މުއިއްޒު ވިދާޅުވިއެވެ. އަދި އެ ތަފްސީލުތަކުގެ މައުލޫމާތު ހޯދައި ވަކިވަކި މަސައްކަތްތަކާ ވެސް ހަވާލުވެވޭނެކަމަށް ވިދާޅުވިއެވެ. ފައިސާގެ އެހީ ދިނުމުގެ ބަދަލުގައި މަސައްކަތް ވެސް ކޮށްދެވިދާނެކަމަށް ޑރ. މުއިއްޒުގެ ވާހަކަފުޅުގައި ވިދާޅުވިއެވެ.

"މުޅި މުޖުތަމައު ބައިވެރިވެގެން އަޅުގަނޑުމެން ބޭނުން މާލޭގެ ހުރިހާ މިސްކިތެއް މަރާމާތުކޮށް ނިންމައިލާން އިރާދަކުރެއްވިއްޔާ ރަމަޟާން މަސް އަންނަންވާއިރަށް" މުއިއްޒު ވިދާޅުވިއެވެ.

މުޅިން އަލަށް މިފަދަ މަސައްކަތެއް ކުރުމަށް ރާއްޖޭގައި އިއުލާންކުރި އިރު މުއިއްޒު ވިދާޅުވީ މިއީ އިންވެސްޓަރުންނަށް ފުރުސަތު ހުޅުވައިލުން ފަދަ ކަމެއްކަމަށާއި މިއީ ދެ ދުނިޔޭގައި ވެސް އޭގެ މަންފާ ލިބެނިވި އިންވެސްޓްމެންޓަކަށް ވެގެންދާނެ ކަމަށެވެ.