"ރައީސް ޔާމީނަށް ކުރި ހުކުމާ އެކު ރާއްޖޭގެ ތާރީޚް ބަދަލުކޮށްލައިފި"
ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ޝަރީއަތް މިއަދު ނިމިގެންދިޔަ ގޮތާއެކު ރާއްޖޭގެ ތާރީޚް ބަދަލުކޮށްލައިފިކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުން އިންތިޒާމު ކޮށްގެން މިރޭ ބޭއްވި "އާސްކް ސްޕީކާ" ޕްރޮގުރާމުގައި ހުސެއިން ރަޝީދު ކިޔާ މީހަކު ރައީސް ނަޝީދާ ސުވާލު ކުރެއްވީ، ރައީސް ޔާމީންގެ މައްސަލަ މިއަދު ސުޕްރީމް ކޯޓުން ނިންމެވި ގޮތާ މެދު ދެކެވަޑައިގަންނަވަނީ ކިހިނެއްތޯއާއި އެމަނިކުފާނާ އެކު މަސައްކަތް ކުރައްވާނެތޯއެވެ.
އެ ސުވާލަށް ޖަވާބު ދެއްވަމުން ރައީސް ނަޝީދު ވިދާޅުވީ، ރައީސް ޔާމީންގެ ޝަރީއަތް މިއަދު ނިންމަވައި ކުރެއްވި ހުކުމަކީ ރާއްޖޭގެ ތާރީހުގައި ވެސް ރާއްޖޭގެ އެންމެ މަތީ ވެރިއަކު ދޫކޮށްލުމަށް ކުރެވުނު ފުރަތަމަ ހުކުމް ކަމަށެވެ. އެހެންކަމުން އެކަމުގައި އެމަނިކުފާނު ދެކެވަޑައިގަންނަވަނީ ޝަރުއީ ދާއިރާ މިނިވަން ވެގެން ދިއުމަކީ ދިވެހީންނަށް ލިބޭ އުފާވެރި ކަމެއްގެ ގޮތުގައި ކަމަށް ވެސް ރައީސް ނަޝީދު ވިދާޅުވިއެވެ.
"މި ހުކުމަކީ އަޅުގަނޑު ދެކޭ ގޮތުގައި، ދިވެހި ރާއްޖޭގެ ކުރީގެ ވެރިއަކު، ރައީސަކު، ދޫކޮށްލުމަށް (މިނިވަން ކުރުމަށް) ރާއްޖޭގެ ފަނޑިޔާރުގެއަކުން އިއްވި ފުރަތަމަ ފަހަރު. ވެރިކަމުން ބޭރުގައި އެ ބާވަތުގެ ކަމެއްވީ ފުރަތަމަ ފަހަރު." ރައީސް ނަޝީދު ވިދާޅުވިއެވެ.
ރައީސް ނަޝީދު އިތުރަށް ވިދާޅުވީ، އެމަނިކުފާނަށް ފެނިވަޑައިގަންނަވާ ގޮތުގައި މިހާރު ފެންނަމުން މިދަނީ ޝަރުޢީ ނިޒާމު މިނިވަންވަމުން އަންނަ ތަން ކަމަށެވެ.
