ރައީސް ޔާމީނަށް ސެކިއުރިޓީ ހަމަޖައްސައިދީފި
ކުރީގެ ރައީސް ، ރައީސް ޢަބްދުﷲ ޔާމީން ޢަބްދުލްޤައްޔޫމަށް ދައުލަތުން ސެކިއުރިޓީ ހަމަޖައްސައިދީފިއެވެ.
އިދިކޮޅު ޕީޕީއެމް/ޕީއެންސީ ހިންގެވުމާ ހަވާލުވެ ހުންނެވި ޢަބްދުއްރަހީމް ޢަބްދުﷲ (އަދުރޭ) "ދެން" އަށް މައުލޫމާތު ދެއްވަމުން ވިދާޅުވީ، ރައީސް ޔާމީނަށް ރޭގައި ސެކިއުރިޓީ ހަމަޖައްސަވައި ދެއްވައިފައިވާ ކަމަށާއި އެކަން އެމަނިކުފާނަށް މިހާރު އަންގަވައިފައިވާ ކަމަށެވެ.
"ގާނޫނުގައިވާ ގޮތުގެ މަތިން ކުރީގެ ރައީސުންނަށް ލިބިވަޑައިގަންނަވަން ޖެހޭ ސެކިއުރިޓީ އޭގެ ފުރިހަމަ ގޮތުގައި ރައީސް ޔާމީނަށް ވެސް ލިބިގެންދާނެ ކަމަށް އަޅުގަނޑުމެން އުންމީދު ކުރަން" އަދުރޭ ވިދާޅުވިއެވެ.
ރާއްޖޭގެ ރައީސުލްޖުމްހޫރިއްޔާކަން ކޮށްފައިވާ ބޭފުޅަކަށް ދޭން ޖެހޭ ރައްކާތެރިކަމާއި އިނާޔަތްތަކާ ބެހޭ ގާނޫނުގައިވާ ގޮތުން ކުރީގެ ރައީސުންގެ ސެކިއުރިޓީ ބަލަހައްޓަނީ އެމްއެންޑީއެފުންނެވެ. ނަމަވެސް ރައީސް ޔާމީނަށް ސެކިއުރިޓީ ދިނުމާ ގުޅޭގޮތުން އިއްޔެއާއި މިއަދު ވެސް ނޫސްވެރިން ސުވާލު ކުރުމުން، އެ ސުވާލަށް އަދިވެސް އެމްއެންޑީއެފްގެ ފަރާތުން ޖަވާބެއް ލިބިފައެއް ނުވެއެވެ.
ރައީސް ޔާމީނަށް އެލަވަންސް ދިނުމުގެ މައްސަލައިގައި ފިނޭންސް މިނިސްޓްރީން ވިދާޅުވީ ގާނޫނުގައިވާ ގޮތުގެ މަތިން ރައީސް ޔާމީނަށް އިނާޔަތް ދޭނެ ކަމަށާއި އެކަމަށް ހަރަދުކުރަނީ ކޮންޓިންޖެންސީ ބަޖެޓުގެ ތެރެއިން ކަމަށެވެ.
