ޒެމްބިއާއިން ވެސް ކޮވިޑްގެ އައު ވޭރިއަންޓް ފެނިއްޖެ
މިހާރު ދުނިޔޭގެ އެކި ކަންކޮޅުތަކުން ފެންނަމުންދާ ކޮވިޑް-19ގެ އައު ވޭރިއަންޓް ކަމަށްވާ "އޮމިކްރޮން" ޒެމްބިއާއިން ވެސް ފެނިއްޖެއެވެ.
ޒެމްބިއާގެ ހެލްތު މިނިސްޓްރީން ބުނީ މިދިޔަ ހަފްތާގައި އެ ޤައުމުން ތިން މީހަކު ކޮވިޑްގެ މި އައު ވޭރިއަންޓަށް ފައްސި ވެފައިވާ ކަމަށް ރިކޯޑު ކުރެވިފައިވާ ކަމަށެވެ.
ރިޕޯޓުތަކުން ބުނާ ގޮތުގައި ޒެމްބިއާއިން ފައްސިވެފައި ވަނީ ދެ ފިރިހެނުންނާއި އަންހެނެކެވެ. އޭގެ ތެރެއިން އެއް ފިރިހެނެއްގެ ފަރާތުން އަލާމާތްތައް ފެންނަން ފެށީ އޭނާ ބޭރު ޤައުމަކަށް ދަތުރު ކޮށްފައި އެނބުރި ޤައުމަށް ދިޔުމުން ކަމަށާއި ދެވަނަ ފިރިހެން މީހާގެ ކިބައިން ވެސް އަލާމާތްތައް ފެނިގެން ޓެސްޓު ކުރުމުން ފައްސިވެފައި ވަނީ އައު ވޭރިއަންޓަށް ކަން އެނގިފައިވާ ކަމަށެވެ.
ޒެމްބިއާއިން ފައްސިވީ އަންހެން މީހާއަކީ ޤައުމުން ބޭރަށް ދިޔަ މީހެއް ނޫން ކަމަށް ވެސް ރިޕޯޓުތަކުން ބުނެއެވެ.
އޮމިކްރޮން ވޭރިއަންޓް 39 ޤައުމަކުން މިހައިތަނަށް ފެނިފައިވެއެވެ.
