މެންބަރުންނަށް އެއްވެސް ނުފޫޒެއް ނެތި މަސައްކަތް ކުރެއްވޭނެ: ރައީސް
ރައްޔިތުންގެ މަޖިލިސް މެންބަރުންނަށް އެއްވެސް ނުފޫޒެއް، ބިރުވެރިކަމެއް ނެތި މަސައްކަތް ކުރެއްވޭނެ ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ބައިނަލްއަޤްވާމީ އިންސާނީ ޙައްޤުތަކުގެ ދުވަހާއި އެޗްއާރްސީއެމްއަށް 18 އަހަރު ފުރުމުގެ މުނާސަބަތުގައި ބޭއްވި ރަސްމިއްޔާތުގައި ވާހަކަފުޅުދައްކަވަމުން ރައީސް ޞާލިޙް ވިދާޅުވީ މަޖިލިސް މެންބަރުންނަށް އެއްވެސް ނޫފޫޒެއް ބިރުވެރިކަމެއް ނެތި މަސައްކަތް ކުރެއްވޭނެ ކަމަށާއި އަދި އެ މެންބަރުންނަށް ސިފައިންނާއި ފުލުހުން ފުރިހަމަ ހިމާޔަތާއި ރައްކާތެރިކަން ކަށަވަރު ކޮށްދީފައިވާ ކަމަށެވެ.
މި ރަސްމިއްޔާތުގައި ރައީސް ޞާލިޙް ވަނީ، ސަރުކާރުން އިންސާނީ ޙައްޤުތައް ޙިމާޔަތްކޮށް ރައްކާތެރިކުރުމަށް ޓަކައި ކުރައްވާ މަސައްކަތްޕުޅުތަކުގެ މައްޗަށް ވެސް އަލި އަޅުއްވައިލައްވާ ވަރަށް ތަފްޞީލުކޮށް ވާހަކަފުޅު ދައްކަވައިފައެވެ.
ރައީސް ޞާލިޙް ވިދާޅުވީ، މި ސަރުކާރުން ނޫސްވެރިކަމަށް ވެސް ފުރިހަމައަށް މިނިވަންކަން ދޭނެ ކަމަށާއި އެކަމުން ސަރުކާރަށް ލިބެނީ ފައިދާ ކަމަށެވެ.
މީގެ އިތުރުން ރައީސް ވިދާޅުވީ އިންސާނާ ދިރިހުރުމުގެ ޙައްޤު ރައްކާތެރިކުރުމަށް ޓަކައި ސަރުކާރުން މުޅި ރާއްޖޭގައި ބޯހިޔާވަހިކަމުގެ ގިނަ މަޝްރޫޢުތަކެއް ކުރިޔަށް ގެންދާ ކަމަށާއި، އިތުރު މަޝްރޫޢުތައް ފެށުމަށް ތައްޔާރުވަމުން އަންނަކަމަށެވެ. އަދި އަސާސީ ޚިދުމަތްތައް ލިބިދޭން ޖެހޭ ކަމަށް ކުރީގެ ސަރުކާރުތަކަށް ޤަބޫލުނުކުރެވުނު ކިތަންމެ ރަށެއްގައި މި ސަރުކާރުން އަންނަނީ އެ ޚިދުމަތްތައް ޤާއިމުކުރަމުން ކަމުގައި ވެސް ރައީސް ޞާލިޙް ވިދާޅުވިއެވެ.
