ކުޑަކުދިންނަށް ކިޔަވައިދޭ ތަންތަން އަލުން ރެޖިސްޓަރކުރަން އަންގައިފި
ސްކޫލުތައް ފިޔަވައި، ކުޑަކުދިންނަށް ކިޔަވައިދޭ ހުރިހާ ތަނެއް އެޑިއުކޭޝަން މިނިސްޓްރީގައި އަލުން ރަޖިސްޓްރީ ކުރަން ޖެހޭ ގަވާއިދަށް މިއަދު އަމަލުކުރަން ފަށައިފިއެވެ.
އެ ގަވާއިދުގައި ބުނާ ގޮތުން، ކުޑަކުދިންނަށް ކިޔަވައިދޭ ތަންތަނުގެ ތެރޭގައި ޓިއުޝަން ކްލާސް ހިންގާ ތަންތަން ވެސް ހިމެނެއެވެ.
ސްކޫލްތައް ފިޔަވައި ކުޑަކުދިންނަށް ކިޔަވައިދޭ ތަންތަން ރެޖިސްޓްރީ ކުރުމާއި ހިންގުމުގެ ގަވާއިދެއް އެކުލަވައިލީ 2020ވަނަ އަހަރުން ފެށިގެން އަމަލުކުރަމުން އަންނަ ތައުލީމީ ގާނޫނުގެ ދަށުންނެވެ.
މިއަދުން ފެށިގެން އަމަލުކުރަން ފަށައިފައިވާ މި ގަވާއިދުގެ ދަށުން ޓިއުޝަން ނަގައިދޭ ތަންތަނާއި ޕްރީ ސްކޫލުތަކާއި ގުރުއާން ކިޔަވައިދޭ ތަންތަނާއި ހާއްސަ އެހީއަށް ބޭނުންވާ ކުދިންނަށް ކުލާސްތައް ނަގައިދޭ ތަންތަނުގެ އިތުރުން ކުޑަކުދިންނަށް އެކި ކަހަލަ ތައުލީމުތައް އުގަންނައިދޭ ތަންތަން އެޑިއުކޭޝަން މިނިސްޓްރީގައި ރެޖިސްޓްރީ ކުރަން ޖެހެއެވެ. އަދި މި ތަންތަނުގައި ކިޔަވައިދޭ ޕްރޮގްރާމްތައް ވެސް ވަކިން ރެޖިސްޓަރ ކުރަން ޖެހެއެވެ.
ގަވާއިދުގައި ބުނެފައިވާ ގޮތުގައި ކުޑަކުދިންނަށް ކިޔަވައިދޭ މިތަންތަން ރަޖިސްޓްރީކޮށް ދޭނީ މިނިސްޓްރީން ކިޔަވައިދޭ ތަނެއްގައި ފުރިހަމަވާން ޖެހޭ ކަމަށް ކަނޑައަޅައިފައިވާ "މިނިމަމް ސްޓޭންޑަޑް ފެސިލިޓީސް" އަށް ފެތޭ ނަމައެވެ.
އެ ގަވާއިދުގައި އިތުރަށް ބުނެފައި ވަނީ، ރަޖިސްޓަރީނުކޮށް ހިންގަމުންދާ ކިޔަވައިދޭ ތަންތަން ދެ މަސް ދުވަހުގެ ތެރޭގައި ރަޖިސްޓްރީ ކުރަން ޖެހޭނެ ކަމަށާއި އޭގެ ކުރިން ރަޖިސްޓްރީކޮށްފައި ހުރި ތަންތަން ދޮޅު އަހަރުގެ ތެރޭގައި އަލުން ރަޖިސްޓްރީ ކުރަން ޖެހޭނެ ކަމަށެވެ.
