ހަމައެކަނި ވަޒީފާގައި އުޅުމުގެ ވިސްނުން ދޫކޮށް، ދިވެހިން ވާންވީ ވެރިންނަށް: މައުސޫމު

ހަމައެކަނި ވަޒީފާއެއް އަދާކޮށްގެން އާމްދަނީ ހޯދުމުގެ ވިސްނުން ދޫކޮށް ކޮންމެ ދިވެއްސަކީ ވެސް އަމިއްލަ ވިޔަފާރިއެއް ހިންގާ ވެރިއަކަށްވުން މުހިންމު ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމު ވިދާޅުވެއްޖެއެވެ.

Ads by STELCO

ރާއްޖޭގައި ހޯމް ސްޓޭ ޓޫރިޒަމް ތައާރަފުކުރުމާ ގުޅޭ ގޮތުން ވާހަކަ ދައްކަވަމުން ޑރ. މައުސޫމު ވިދާޅުވީ ހޯމް ސްޓޭ ޓޫރިޒަމްއަކީ ގާތްގަނޑަކަށް ގެސްޓު ހައުސް ވިޔަފާރި ކަމަށެވެ. އެ ގޮތުން ހޯމް ސްޓޭ ޓޫރިޒަމް ތައާރަފު ކުރުމުން ކޮންމެ ގެސްޓު ހައުސްއެއްގައި ރިސެޕްޝަނާއި ރެސްޓޯރެންޓު ހުރުން ލާޒިމް ނުވާނެ ކަމަށާއި އޭރުން ފަތުރުވެރިން ބަހައްޓާ ތަންތަނުގައި ވަކި އަދަދަކަށް ކޮޓަރި ހުރުން ވެސް މަޖުބޫރު ނުވާނެ ކަމަށެވެ.

މައުސޫމު ވިދާޅުވީ މި ކަންކަން ހިމަނައި ގަވާއިދެއް މިފެށޭ ހަފްތާގެ ތެރޭގައި ގެޒެޓު ކުރާނެ ކަމަށެވެ. އެހެން ނަމަވެސް ހޯމް ސްޓޭ ޓޫރިޒަމް ރާއްޖޭގައި ޕްރެކްޓިސްކުރަން ފެށޭވަރު ވާނީ އަންނަ ޖެނުއަރީ މަހުގެ ތެރޭގައި ކަމަށް އޭނާ ވިދާޅުވިއެވެ.

"މީގެ އެންމެ ބޮޑު މުހިންމު ކަމަކީ މިކަންތައް (ޓޫރިޒަމް ވިޔަފާރި) ކުރަން ބޭނުންވާ ޒުވާނުންނަށް ފުރުސަތު ލިބުން. ދިވެހިން ވަޒީފާގައި ކޮންމެހެން އުޅޭކަށް ނުޖެހޭ. ޕްރޮޑަކްޓެއް އޯން ކުރާށޭ. ވެރިއަކަށް ވާށޭ." މައުސޫމު ވިދާޅުވިއެވެ.

ޑރ. މައުސޫމު ވިދާޅުވީ ޔޫއޭއީ ފަދަ ގައުމުތަކުގައި ވެސް އެތަނުގެ މީހުން މުއްސަނދިވާން ޖާގަ ހޯދީ އިގްތިޞާދު އަނބުރާލައިގެން ކަމަށެވެ. އަދި އެގޮތަށް އިގްތިޞާދު އަނބުރައިލަން ތަނުގެ ބައި ބޯކޮށްލައި އިގްތިޞާދީ ހަރަކާތްތައް ހިންގަން ޖެހޭކަމަށް އޭނާ ވިދާޅުވިއެވެ. ރާއްޖޭގެ މީސްކޮޅު ކުޑަވުމާ އެކު އިގްތިޞާދު އަނބުރައިލަން ދިވެހިން ވެރިންނަށް ވާންޖެހޭ ކަމަށާއި ވަޒީފާއެއް އަދާކުރި ނަމަވެސް އަމިއްލަ ކަމެއް ކުރުމުގެ ވިސްނުން ގެންގުޅެން ޖެހޭކަމަށް މިނިސްޓަރު ވިދާޅުވިއެވެ.

މިމައުޟޫގައި ވާހަކަފުޅު އިތުރަށް ކުރިއަށް ގެންދަވަމުން މައުސޫމު ވިދާޅުވީ ގެސްޓު ހައުސް ވިޔަފާރި ރާއްޖޭގައި ކުރާތާ 10 އަހަރު ވެފައިވާ އިރު ހޯމް ސްޓޭ ޓޫރިޒަމް ތައާރަފު ކުރުމުން މުޅި ރަށުގެ ރައްޔިތުންގެ އެއްބާރުލުން، ހާއްސަކޮށް ރަށު ކައުންސިލްގެ އެއްބާރުލުން ބޭނުންވާނެ ކަމަށެވެ. އެގޮތުން ހޯމް ސްޓޭ ޓޫރިޒަމާ އެކު ރަށު ކައުންސިލަކީ ރިޒޯޓުތަކުގެ ޖެނެރަލް މެނޭޖަރުންގެ މަގާމުގައި ތިބޭނެ ބައެއް ކަމަށާއި ޓޫރިޒަމް މިނިސްޓްރީއާ އެކު ކައުންސިލުން ވަރަށް ގާތުން މަސައްކަތް ކުރަންޖެހޭނެކަމަށް މައުސޫމު ވިދާޅުވިއެވެ.

ހޯމް ސްޓޭ ޓޫރިޒަމްގެ ސަބަބުން ރާއްޖޭގެ ރަށްތަކުގެ އިޖުތިމާއީ ފޭރާން ހަލާކުވެދާނެކަމުގެ ކަންބޮޑުވުން ފާޅުކުރަމުންދާތީ މައުސޫމު ވިދާޅުވީ އިންސާނުންގެ ތެރޭގައި ގޯސް ކަންކަން ހިނގާނެ ކަމަށެވެ. ފަތުރުވެރިންނަކީ ވެސް އިންސާނުން ކަމަށާއި އެމީހުންނަށް ޖެހޭނީ އިންތަކާއި މިންތައް ބުނެދޭންކަމަށް އޭނާ ވިދާޅުވިއެވެ.

"ފަތުރުވެރިން ވަރަށް ބޮޑަށް ކަމޭ ހިތާނެ އަނެއް ގައުމުގެ ގަވާއިދުތަކާއި ގާނޫނުތަކާއި ހުންނަ އުސޫލުތަކަށް. އެހެންމަ އަޅުގަނޑުމެން ފަތުރުވެރިކަން ރަށްރަށަށް ގެންދާއިރު އަޅުގަނޑުމެން ޓޫރިޒަމް ޓީމަށް ފުރިހަމައަށް އިތުބާރު އެބައޮތް ކައުންސިލްތައް އެހައި ގާބިލު އެހާ ހޭލުންތެރި. ގިނަ ކައުންސިލްތަކުގައި މި ތިބީ ޓޫރިޒަމަށް އަހުލުވެރި ކުދިން" މިނިސްޓަރު ވިދާޅުވިއެވެ.

ރާއްޖެއަށް ހޯމް ސްޓޭ ޓޫރިޒަމް ތައާރަފު ކުރުމާ މެދު ފަތުރުވެރިކަމުގެ ސިނާއަތުގައި މަސައްކަތްކުރާ ވިޔަފާރިވެރިންގެ ވިސްނުން ހުރީ އެކި ގޮތަށެވެ. އެގޮތުން މިކަމުގެ ސަބަބުން ރާއްޖޭގެ ފަތުރުވެރިކަމަށް ފޫނުބެދޭ ވަރުގެ ގެއްލުންތަކެއް ލިބިދާނެކަމަށް ދެކޭ މީހުން މަދެއް ނޫނެވެ. އެމީހުން ދެކޭގޮތުގައި ރާއްޖޭގެ ބައެއް ރަށްތަކުގައި މީގެ ކުރިން ވެސް ހިނގައިފައި ހުރި ހާދިސާތަކަށް ބަލާއިރު ފަތުރުވެރިއަކާ މެދު ޒުވާނުން ނުވަތަ ކުޑަކުދިން ކަން ކުރާ ގޮތަކުން ރާއްޖެއާ މެދު ފަތުރުވެރިން ދެކޭ ގޮތް ބަދަލުވެދާނެއެވެ.

މީގެ ކުރިން ރާއްޖޭގެ ރަށަކަށް ދިޔަ ފަތުރުވެރިންތަކަކަށް ކުޑަކުދިންތަކެއް ފޮށި ހެދުމުން އެފަތުރުވެރިޔާގެ ބްލޮގުގައި ރާއްޖެއާ ބެހޭ ގޮތުން މިއީ އައުން ރައްކާތެރި ތަނެއް ނޫންކަމަށް ބުނެ ލިޔުމެއް ޝާއިއު ކުރިއެވެ. މިކަމާ ގުޅިގެން ރައްޖޭގެ ފަތުރުވެރިކަމަށް ކޮންމެވެސް ވަރެއްގެ ނޭދެވޭ އަސަރުތަކެއް ކުރިއެވެ. މީގެ އިތުރުން ގެސްޓު ހައުސް ވިޔަފާރި ހިންގާ ފަރާތްތަކަށް ވެސް ހޯމްސްޓޭ ޓޫރިޒަމްގެ ސަބަބުން ގެއްލުންތަކެއް ލިބިދާނެކަމަށް އެއްބަޔަކު ދެކެއެވެ.