އުމްރާގެ އަޅުކަން އަދާކުރަމުން ދިޔަ ދިވެއްސަކު ނިޔާވެއްޖެ
މައްކާގައި އުމްރާގެ މަތިވެރި އަޅުކަން އަދާކުރަމުން ދިޔަ ދިވެއްސަކު ނިޔާވެއްޖެއެވެ.
އެނގިފައިވާ ގޮތުގައި އުމްރާގެ އަޅުކަން އަދާކުރަމުން ދަނިކޮށް ނިޔާވީ ނ.ހޮޅުދޫ/ ސާދާގެ، ހާމިދު މުހައްމަދުއެވެ. އޭނާ ނިޔާވެފައި ވަނީ ރޭ ދަންވަރު 2:15 ގައެވެ.
"ދެން"އަށް މައުލޫމާތު ލިބިފައިވާ ގޮތުގައި ހާމިދުއަކީ މީގެ ކުރިން ވެސް އުމްރާއަށް ވަޑައިގަންނަވާ ބޭފުޅުންނާ އެކު ޖަމާއަތުގައި އެހީތެރިއެއްގެ ގޮތުގައި ވަޑައިގަންނަވާ ބޭފުޅެކެވެ. އޭނާ މިފަހަރު ވެސް މައްކާއަށް ވަޑައިގެންނެވީ އެފަދައިން ކަމަށާއި ހާމިދުއާ އެކު އޭނާގެ އަނބިކަނބަލުން ވެސް އުމްރާގެ އަޅުކަމުގައި ބައިވެރިވެ ވަޑައިގެންނެވިކަމަށް މައުލޫމާތު ލިބެއެވެ.
"އެހެން ވަޑައިގަންނަވާ ކޮންމެ ފަހަރަކު ވެސް އުމްރާގެ އަޅުކަން އަދާ ކުރައްވާފައި އެނބުރި ވަޑައިގަންނަވަނީ. މިފަހަރު ވެސް ވަޑައިގެންނެވީ ޖަމާއަތުގައި އެހީތެރިއެއްގެ ގޮތުގައި" ހޮޅުދޫ ކައުންސިލުގެ ރައީސް ރިޟްވާން މުޙައްމަދު "ދެން"އަށް މައުލޫމާތު ދެއްވަމުން ވިދާޅުވިއެވެ.
ހާމިދުގެ ހަށިގަނޑު ވަޅުލުމަށް ހަމަޖެހިފައި ވަނީ މިއަދުގެ އަޞްރު ނަމާދު ވަގުތަށް ފަހު، މައްކާގެ މަތިވެރި ބިމުގައި ކަމަށް ވެސް މައުލޫމާތު ލިބެއެވެ.
މާތް ﷲ އެމައްޔިތާގެ ފުރާނައަށް ހެޔޮ ރަޙްމަތް ލައްވަވައި ފާފަ ފުއްސަވައި ސުވަރުގޭގެ މަތިވެރި ނިޢުމަތް މިންވަރު ކޮށްދެއްވާށިއެވެ. އާމީން! އަދި މިހިތްދަތި ވަގުތުގައި ޢާއިލާއަށް ކެތްތެރިކަން ދެއްވާށިއެވެ. އާމީން!
إِنَّا لِلّهِ وَإِنَّـا إِلَيْهِ رَاجِعُون
