މަސްތުވާތަކެތި އެތެރެކުރިކަމުގެ ތުހުމަތު އުފުލުނު ބިދޭސީއަކު ސަލާމަތްވެއްޖެ
ރާއްޖެއަށް މަސްތުވާތަކެތި އެތެރެކުރިކަމުގެ ތުހުމަތުގައި ހައްޔަރުކޮށް ދައުލަތުން ދައުވާ ކުރި ބަނގްލަދޭޝްގެ ރައްޔިތެއް ކަމަށްވާ އާރިފް ، އެ ދައުވާއިން ސަލާމަތްވެއްޖެއެވެ.
އާރިފް ހައްޔަރު ކުރީ 2018ވަނަ އަހަރުގެ ޖޫން މަހުގެ 29ވަނަ ދުވަހު ވެލާނާ އިންޓަނޭޝަނަލް އެއާޕޯޓުންނެވެ. އެދުވަހު އޭނާ ރާއްޖެއަށް އައުމުން ކަސްޓަމަސްގެ އޮފިސަރުންނަށް މަސްތުވާތަކެތި ފެނުނީ އޭނާގެ ދަބަސް ޗެކް ކުރިއިރު ދަބަހުގައި އޮތް ދެ ބެޑްޝީޓެއްގެ ތެރޭގައި ފޮރުވައިފައި ހުއްޓައި ކަމަށް މައުލޫމާތު ލިބިފައިވެއެވެ. ކަސްޓަމްސް އޮފިސަރުން އާރިފްގެ ދަބަސް ޗެކް ކުރީ އޭނާއަށް އެއްވެސް ޝައްކެއް ކުރެވިގެން ނޫން ކަމަށާއި ޗެކް ކުރީ އާންމު އުސޫލުން ކަމަށް ވެސް މައުލޫމާތު ލިބެއެވެ.
އާރިފްގެ ދަބަހުން ފެނުނު މަސްތުވާތަކެތި ޓެސްޓު ކުރުމުން އެއީ ކެނެބިސްކަން އެނގުމުން ދައުލަތުން އޭނާގެ މައްޗަށް އުފުލީ މަސްތުވާ އެއްޗެއް ރާއްޖެއަށް އެތެރެ ކުރުމުގެ ކުށުގެ ދައުވާއެވެ.
މި މައްސަލައިގައި ބޭއްވި ހުރިހާ އަޑުއެހުމެއްގައި ވެސް އާރިފް ވަނީ އޭނާގެ މައްޗަށް ކުރި ދައުވާއަށް އިންކާރުކޮށްފައެވެ. މި މައްސަލައިގެ ޝަރީއަތުގައި ދައުލަތުން 12 ހެއްކެއް ހުށަހެޅި އިރު، ދިފާއީ ހެއްކެއްގެ ގޮތުން އާރިފް އެއްވެސް ހެއްކެއް ހުށަހަޅައިފައެއް ނުވެއެވެ.
ކްރިމިނަލް ކޯޓުން މިމައްސަލައިގައި މިދިޔަ ބުރާސްފަތި ދުވަހު ކުރި ހުކުމްގައި ބުނެފައި ވަނީ މަސްތުވާތަކެތި ފެނުނު ދަބަހަކީ ރާއްޖެއަށް ގެންގޮސްދިނުމަށް އާރިފަށް މީހަކު ހަވާލުކުރި ދަބަހަކަށް ވެފައި އެ ދަބަހުގައި މަސްތުވާތަކެތި ހުރިކަން ނޭނގޭ ކަމަށާއި އަދި ދަބަސް ހުޅުވައިފައި ވެސް ނުވާ ކަމަށް އާރިފް ބުނާ ކަމަށާއި އަދި އާރިފްގެ އެ ވާހަކަތައް ބަލައި ވަޒަންކުރުމަށް ފުލުހުންގެ ތަހުގީގުގައި މަސައްކަތް ކޮށްފައި ނުވާ ކަމަށް ވެސް ހުކުމްގައި ވެއެވެ.
ކޯޓުން ކުރި ހުކުމާ އެކު އާރިފް މިނިވަން ވެފައިވާ އިރު، އެ ހުކުމުގައި ބުނެފައި ވަނީ މީހެއްގެ މައްޗަށް ކުރާ ދައުވާ ސާބިތުކޮށްދިނުމަކީ ދައުވާ ކުރާ ފަރާތުގެ ޒިންމާއެއް ކަމަށާއި އާރިފްގެ މައްޗަށް ކުރާ ދައުވާގައި އޭނާއާ ދެކޮޅަށް ހުށަހަޅާފައިވާ ހެކިންގެ ހެކިބަހުން ޝައްކެއް ނެތް މިންވަރަށް ދައުވާ ސާބިތުކޮށްދެވިފައި ނުވާ ކަމަށެވެ.
