ކެނެރީފް ރިސޯޓު އަލުން ހުޅުވައިފި
ކޮވިޑް-19ގެ ސަބަބުން ބަންދުކުރިތާ ދެ އަހަރު ފަހުން އަނެއްކާ ވެސް ކެނެރީފް ރިސޯޓު ހުޅުވައިފިއެވެ.
އައްޑޫ ހުޅުމީދޫ ކައިރީގައި އޮންނަ މި ރިސޯޓުން މިއަދު ނެރެފައިވާ ބަޔާނެއްގައި ބުނެފައި ވަނީ ރިސޯޓުގެ 142 ކޮޓަރީގެ ތެރެއިން 140 ކޮޓަރި ރިސޯޓު ލައިފުން ބުކް ކޮށްފައިވާ ކަމަށާއި ކެނެރީފް ރިސޯޓު އަލުން ހުޅުވައިލުމަށް ޓަކައި ރިސޯޓު ލައިފުން ލިބުނު އެއްބާރުލުމާއި އެހީތެރިކަމަށް ޝުކުރުއަދާކުރާ ކަމަށެވެ. އަދި ރިސޯޓު އަލުން ހުޅުވުމަށް ޓަކައި ސަރުކާރުންނާއި އައްޑޫ ސިޓީ ކައުންސިލުން ވަރަށް ބޮޑަށް އެހީތެރިކަން ފޯރުކޮށްދިން ކަމަށް ވެސް ފާހަގަ ކޮށްފައިވެއެވެ.
މި ރިސޯޓު އަލުން ހުޅުވައިފައި ވަނީ ބަންދުކޮށްފައި އޮތް މުއްދަތުގައި ލިބިފައިވި ގެއްލުންތައް މަރާމާތުކުރުމަށް ފަހުއެވެ. މި ރިސޯޓަކީ އައްޑޫގައި އެންމެ ފުރަތަމަ ހުޅުވުނު ރިސޯޓެވެ. މި ރިސޯޓު އެންމެ ފުރަރަމަ ހުޅުވިފައި ވަނީ ހެރެތެރަ އައިލެންޑް ރިސޯޓުގެ ނަމުގައި 2007ގައެވެ.
މި ބަލިމަޑުކަމުގެ ސަބަބުން އައްޑޫގައި ބަންދުކޮށްފައިވާ މަތީފަންތީގެ ރިސޯޓެއްކަމަށްވާ ޝަންގްރިއްލާ ވިލިނގިލި ރިސޯޓް އެންޑް ސްޕާ އަދިވެސް އޮތީ ބަންދުކޮށްފައެވެ.
