މޫނު ބުރުގާ އަޅާ ޓީޗަރުންނަށް ހުރަސް ނާޅަން އަދާލަތު ޕާޓީން އެދިއްޖެ
ސްކޫލުތަކުގައި މަސައްކަތް ކުރާ މޫނު ބުރުގާ އަޅައިފައި ތިބޭ ޓިޗަރުންނަށް ހުރަސް ނާޅަން އަދާލަތު ޕާޓީން އެޑިއުކޭޝަން މިނިސްޓްރީގައި އެދިއްޖެއެވެ.
އަދާލަތު ޕާޓީގެ ރައީސް ސޮއި ކުރައްވައި، އެޑިއުކޭޝަން މިނިސްޓްރީއަށް މިއަދު ފޮނުއްވި ސިޓީއެއްގައި ވިދާޅުވީ ރާއްޖޭގައި ހެދުން އަޅަން ޖެހޭނީ އިސްލާމީ މިންގަނޑުތަކާ އެއްގޮތަށް ކަމަށާއި އަދި ރާއްޖޭގައި ނިސްބަތުން ގިނަ އަންހެނުން މޫނު ބުރުގާ އަޅާ ކަމަށެވެ.
އަދާލަތު ޕާޓީން ބުނީ، މީހަކު އަޅައި ހެދުމަކުން އެމީހެއްގެ ގާބިލުކަމަށް އަސަރު ނުކުރާނެ ކަމަށާއި އެހެންކަމުން މޫނު ބުރުގާ އަޅައި ޓީޗަރުންނަށް ވެސް އެ ފުރުސަތު ދޭން ވާނެ ކަމަށެވެ.
"މުދައްރިސުންގެ ގޮތުގައްޔާއި އެ ނޫން ހައިސިއްޔަތުން ރައްޔިތުންނަށް ހިދުމަތް ދެއްވަން ބޭނުންފުޅުވާ މޫނު ބުރުގާ ތުރުކުރައްވާ ކަނބަލުންނަށް އެ ފުރުސަތު އޮންނަންވާނެ ކަމަށް މި ޕާޓީން ދެކެމެވެ." އަދާލަތު ޕާޓީން ފޮނުވި ސިޓީގައިވެއެވެ.
މީގެ އިތުރުން އެ ސިޓީގައި ބުނެފައި ވަނީ ތުއްތު ކުދިންނަށް ކިޔަވައިދޭ ޓީޗަރުންގެ މޫނު ދަރިވަރުންނަށް ފެނުމަކީ މުހިންމު ކަމެއް ކަމަށް އެޑިއުކޭޝަން މިނިސްޓްރީއަށް ގަބޫލު ކުރެވޭ ނަމަ، އެކަމަށް އެކަށީގެންވާ މާހައުލެއް ގާއިމް ކުރުމަކީ އެ މިނިސްޓްރީން ކުރަންޖެހޭ ކަމެއް ކަމަށެވެ.
Ads by STO
