މާފުށީ ޖަލުގައި ހަރަކާތްތެރި ވޭދަނައިގެ ގޮތުގައި މިހާރު ތިބީ 49 ގައިދީން
ކ. މާފުށީ ޖަލުގައި ހަރަކާތްތެރި ވޭދަނައިގެ ގޮތުގައި ތިބީ 49 ގައިދީއަކު ކަމަށް މޯލްޑިވްސް ކަރެކްޝަނަލް ސަރވިސްއިން ބުނެފިއެވެ.
އެ އިދާރާއިން އެންމެ ފަހުން އާންމު ކުރި ތަފާސް ހިސާބުތަކުން ދައްކާ ގޮތުގައި، މާފުށީ ޖަލުގައި ހަރަކާތްތެރި ވޭދަނައިގެ ގޮތުގައި މިހާރު ތިބީ 6 އޮފިސަރަކާއި 49 ގައިދީއެކެވެ. އަދި އެ މީހުންނާ ގާތުން އެއްްތާވި މީހުންގެ ގޮތުގައި 399 ގައިދީއަކު ފާހަގަކުރެވި އެމީހުން ވަނީ އެކަހެރިކޮށްފައެވެ.
މާފުށީ ޖަލުގައި މަސައްކަތްކުރާ އޮފިސަރުންތަކަކާއި ޖަލުގައި ތިބި ގައިދީންތަކެއް ކޮވިޑަށް ފައްސިވުމާ ގުޅިގެން، ޖަލު ކުއްލި ހާލަތަށް ގެނެސްފައި ވަނީ މި މަހުގެ 14ވަނަ ދުވަހުއެވެ. މާފުށީ ޖަލުން އެންމެ ފުރަތަމަ ފައްސިވެފައި ވަނީ އަލާމާތްތައް ހުރެގެން ސުންކު ނެގި އޮފިސަރުންނާއި ގައިދީންނެވެ.
މި ހާލަތާ ގުޅިގެން އެޗްޕީއޭގެ ގައިޑްލައިންތަކާ އެއްގޮތަށް އެ ސަރވިސްއިން ކަނޑައަޅައިފައިވާ އުސޫލުތަކުގެ ދަށުން މާފުށީ ޖަލުގައި ވަނީ ފިޔަވަޅުތައް އަޅައިފައެވެ.
އެގޮތުން އާންމު ހާލަތަށް ގެނެވެންދެން ރައްކާތެރިކަމުގެ ފިޔަވަޅެއްގެ ގޮތުން ގައިދީންނާއި ބަންދު މީހުންނަށް އާއިލީ ބައްދަލުވުމާއި ވަކީލް ބައްދަލުވުން އަދި ކޯޓުގެ އަޑުއެހުންތައް އޮންލައިކޮށް ކުރިޔަށް ގެންދިޔުމަށް ވަނީ ހަމަޖެހިފައެވެ.
