ދިވެހި ރާއްޖޭގެ ތަރައްޤީއަށް ހުރަސް އެޅީ އެމްޑީޕީން: އަދުރޭ
ދިވެހި ރާއްޖޭގެ ތަރައްޤީއަށް ހުރަސް އެޅީ އެމްޑީޕީން ކަމަށާއި ރައީސް ޔާމީނޭ ކިޔައިގެން ތަރައްޤީގެ ވާހަކަ ދައްކަން އެމްޑީޕީ ލަދު ގަންނަން ޖެހޭނެ ކަމަށް ޕީއެންސީގެ ލީޑަރު އަބްދުއްރަޙީމް އަބްދުﷲ (އަދުރޭ) ވިދާޅުވެއްޖެއެވެ.
ކޮމަންޑޫ ބައި-އިލެކްޝަންގައި ޕީޕީއެމްއިން ވާދަ ކުރައްވާ ކެނޑިޑޭޓަށް ތާއީދު ހޯދުމަށް މިރޭ ށ. ކޮމަންޑޫގައި ކުރިޔަށް ދިޔަ ޖަގަހަ ޖަލްސާއެއްގައި އަދުރޭ ވިދާޅުވީ، މިއަދު ޤައުމަށް ވެގެން މިއައީ މަސްދޯޏެއްގެ ކެޔޮޅުކަން ރާނާ މީހަކަށް ދިނީމާ ދެންވާނެ ގޮތް ކަމަށެވެ. އަދި ރާއްޖެއަށް އުމްރާނީ ގޮތުން އައި ތަރައްޤީއާ ޤައުމަށް ލިބުނު ކުރިއެރުމަށް ހުރަސް އެޅީ އެމްޑީޕީން ކަމަށް އަދުރޭ ވިދާޅުވިއެވެ.
އަދުރޭ ވިދާޅުވި ގޮތުގައި 2018ވަނަ އަހަރު އޮތް ރިޔާސީ އިންތިޚާބު އެމްޑީޕީން ވަނީ އިންޑިއާއާ ގުޅިގެން ވަގަށް ނަގައިފައެވެ. އަދި މި ވަގަށް ނެގުމަކީ ތަރައްޤީ ވަގަށް ނެގުން ކަމަށް އަދުރޭ ސިފަ ކުރެއްވިއެވެ.
ދިވެހި ރާއްޖޭގެ ތަރައްޤީއަށް ހުރަސްއެޅީ އެމްޑީޕިން. ރައީސް ޞާލިޙް. ރައީސް މައުމޫން. ޤާއިމް އިބްރާހީމް. ރައީސް ނަޝީދު. ޝެއިޚް އިމްރާން. ދިވެހި ރާއްޖޭގެ ރައްޔިތުންގެ ތަރައްޤީ ހުއްޓުވައިލީ މިދެންނެވި މީހުން. ދިވެހި ރާއްޖޭގެ އިޤްތިޞާދު ފުޑައިލީ މިދެންނެވި މީހުން. ދިވެހި ރާއްޖޭގެ އިޖުތިމާއީ އަދާލަތު ނަގައިލީ މި ދެންނެވި މީހުން. ދިވެހި ރާއްޖޭގެ ޒުވާނުންގެ މުސްތަޤްބަލު ގެއްލުވައިލީ މިދެންނެވި މީހުން. ދިވެހި ރާއްޖޭގެ ކަނބަލުންގެ ޙައްޤުތަކަށް އަރައިގަތީ މިދެންނެވި މީހުން. ދިވެހި ރާއްޖޭގައި އުމުރުން ދުވަސްވީ މީހުންގެ އިޙްތިރާމް ނަގައިލީ މިދެންނެވި މީހުން.
އަދުރޭގެ ވާހަކަފުޅުގައި ފޯކައިދޫގައި ފުޓްބޯޅަ ދަނޑެއް ނެތުމުން އިދިކޮޅަށް މިހާރުގެ ސްޕޯޓްސް މިނިސްޓަރު އަޙްމަދު މަޙްލޫފް ފާޑު ވިދާޅުވުމުން އެކަމަށް ވަނީ ރައްދު ދެއްވައިފައެވެ. މިގޮތުން ވިދާޅުވީ، 2018ވަނަ އަހަރުގެ އިންތިޚާބު ވަގަށް ނުނެގި ނަމަ، 2020ވަނަ އަހަރާ ހަމަށް، މި ރާއްޖޭގައި މީހުން ދިރިއުޅޭ ކޮންމެ ރަށެއްގައި ފުޓްސަލް ދަނޑެއް އޮންނާނެ ކަމަށެވެ.
"ތިކިޔާ ފުޓްސަލް ދަނޑެއް ދިވެހި ޒުވާނުންނަށް ފެނުނީ ވެސް ރައީސް ޔާމީންގެ ސަބަބުންނޭ. އަތޮޅުތަކުގައި ދިރިއުޅުއްވާ ޒުވާނުން ޓާފް ދަނޑުގައި ފުޓްބޯޅަ ކުޅެލަން ލިބިދާނެ ކަމަށް އުންމީދުކޮށްގެން ނޫން ތިބީ" އަދުރޭ ވިދާޅުވީ ޒުވާނުންނަކީ ހަމަހަމަ ބައެއްކަން ދަނެގެން އަތޮޅު ތެރޭގެ ރަށްތަކުގައި ފުޓްސަލް ދަނޑު އަޅުއްވާ ދެއްވީ ރައީސް ޔާމީން ކަމަށެވެ.
ރައީސް ޞާލިޙް އަދި ރައީސް ނަޝީދު، މާދަމާ ކޮމަންޑޫ ދާއިރާއަށް ކުރައްވާ ދަތުރުފުޅާ ގުޅޭ ގޮތުން ވެސް އަދުރޭ ވާހަކަފުޅު ދެއްކެވިއެވެ.
"ވަރަށް ގިނަ ވައުދުވާނެ، ވަރަށް ގިނަ އަޙްދުވާނެ. ވަރަށް ގިނަ ހުވަފެން ދައްކާނެ. އަވާމެންދުރު ދައްކާނެ." އަދުރޭ ވިދާޅުވިއެވެ.
އަދުރޭ ވިދާޅުވީ، ކިތަންމެ ގިނަ ވައުދެއް ވިޔަސް، ކޮމަންޑޫ ދާއިރާގެ ރައްޔިތުން ވިސްނަންވީ އެއް ކަމަކަށް ކަމަށެވެ. އެއީ ދިވެހި ރާއްޖޭގެ މުސްތަޤްބަލު ކަމަށް ވިދާޅުވިއެވެ. އަދި މި އިންތިޚާބުގައި ވާދަ ކުރަނީ އިންޑިއާއާ ވެސް ދެކޮޅަށް ކަމަށް އަދުރޭ ވިދާޅުވިއެވެ.
"މުޅި ރާއްޖެ ހުއްޓިފައި މި އޮތީ މި އިންތިޚާބަށް. މިއީ ހަމައެކަނި ކޮމަންޑު ދާއިރާގެ އިންތިޚާބެއް ނޫން. މި އިންތިޚާބުގައި ވާދަ މިކުރަނީ ދިވެހި ރައްޔިތުންގެ ކެނޑިޑޭޓަކާއި އިންޑިއާގެ ކެނޑިޑޭޓަކާ" އަދުރޭ ވިދާޅުވީ ދިވެހިންގެ ކެނޑިޑޭޓަކީ ޕީޕީއެމްގެ ކެނޑިޑޭޓް މޫސާ ފަތުހީ ކަމަށެވެ.
Ads by STO
