ރައީސް ޔާމީންގެ ޝަރީއަތް: ނޮވެމްބަރު މަހު ހުކުމް އިއްވަނީ
ވ. އާރަށް ކުއްޔަށް ދޫކުރުމުގެ މުއާމަލާތާ ގުޅިގެން ރިޝްވަތު ދީފައިވާ ކަމަށް ބުނެ، ކުރީގެ ރައީސް އަބްދުﷲ ޔާމީން އަބްދުލްޤައްޔޫމްގެ މައްޗަށް ތުހުމަތު ކުރި މައްސަލައިގައި ހުކުމް އިއްވުން، ނޮވެމްބަރަށް މަހަށް ހަމަޖައްސައިފިއެވެ.
މި މައްސަލައިގައި ރައީސް ޔާމީނަށް ދައުވާ ކޮށްފައި ވަނީ، އެމްއެމްޕީއާރުސީ މެދުވެރިކޮށް، އެ ރަށުގައި ރިސޯޓެއް ތަރައްގީ ކުރަން ކުއްޔަށް ދޫކުރުމުގެ މުއާމަލާތާ ގުޅިގެން، ރިޝްވަތުގެ ގޮތުގައި އެއް މިލިއަން ޑޮލަރު ގަބޫލުފުޅު ކުރައްވައި އަދި އެ ފައިސާ ލޯންޑާ ކުރެއްވި ކަމަށެވެ.
މި މައްސަލައާ ގުޅިގެން މިއަދު ކްރިމިނަލް ކޯޓުގައި ބޭއްވި އަޑުއެހުމުގައި މައްސަލަ ބައްލަވާ އިސްގާޒީ އަހުމަދު ޝަކީލް ވިދާޅުވީ، ދައުވާއަށް ޖަވާބުދާރީވުމާއި އިބްތިދާއީ މަރުހަލާ އަންނަ މެއި މަހާ ހަމައަށް ކުރިއަށް ގެންދާނެ ކަމަށާއި މި އަހަރުގެ ޖުލައި މަހުން ފެށިގެން ދައުލަތުގެ ހެކިންގެ ހެކިބަސް ނެގުމަށް ފަހު، އަންނަ އޮކްޓޫބަރު މަހު ޚުލާސާ ބަޔާން ހުށަހަޅައި، އަންނަ ނޮވެމްބަރު މަހުގެ 25 ވަނަ ދުވަހު އެ މައްސަލައިގެ ހުކުމް އިއްވާނެ ކަމަށެވެ.
ރައީސް ޔާމީންގެ ޝަރީއަތް ލައިވް ކޮށްދިނުމަށް އެމަނިކުފާނު ކުރިން ވަނީ އެދިލައްވައިފައެވެ. އެކަމާ ގުޅިގެން އިސް ގާޒީ ވިދާޅުވީ ޝަރީއަތް ލައިވްކޮށް ދެއްކޭނެ ވަސީލަތްތައް މި ވަގުތު ކޯޓުގައި ނެތް ކަމަށާއި އެހެންވެ، އެ ޝަރީއަތް މި ވަގުތު ލައިވް ނުކުރެވޭނެ ކަމަށެވެ. އެކަމަކު، ވަސީލަތްތައް ލިބުމުން ލައިވް ކުރާނެ ކަމަށާއި ލައިވް ނުކުރިޔަސް، އެ ޝަރީއަތް ކުރިއަށް ގެންދާނީ އާންމުކޮށް ހުޅުވައިލައިގެން ކަމަށް ވެސް އިސް ގާޒީ ޝަކީލް ވިދާޅުވިއެވެ.
