ލަމްހާއާއި މާވިންގެ ނަރުސްކަމުގެ ހުއްދަ ބާތިލުކޮށްފި
އައިޖީއެމްއެޗްގައި މަސައްކަތް ކުރި ފިލިޕީންސްގެ ނަރުހެއް ކަމަށްވާ މޭރީ ގްރޭސްގެ މަރުގެ ތުހުމަތު އުފުލިފައިވާ އޭނާގެ ފިރިމީހާ މާވިން އެސްވައި.ވާގަސްއާއި މާވިންގެ ދިވެހި ލޯބިވެރިޔާކަމަށް ބުނާ ހަލީމަތު ލަމްހާގެ ނަރުސްކަމުގެ ހުއްދަ ބާތިލު ކޮށްފިއެވެ.
މާވިންއާއި ލަމްހާއަކީ ވެސް އައިޖީއެމްއެޗްގައި މަސައްކަތް ކުރި ދެ ނަރުހުންނެވެ. އެ ދެމީހުން ވެސް މަސައްކަތް ކޮށްފައި ވަނީ އައިޖީއެމްއެޗްގެ އިމަރޖެންސީ ރޫމްގައި ނަރުހުންގެ ގޮތުގައެވެ.
އެމީހުންގެ ހުއްދަ ބާތިލު ކޮށްފައިވާކަން އިއުލާނުކުރަމުން މޯލްޑިވްސް ނާރސިންގ އެންޑް މިޑްވައިފްރީ ކައުންސިލުން މިއަދު ނެރެފައިވާ ބަޔާނެއްގައި ބުނެފައި ވަނީ، މޭރީގެ މަރާ ގުޅިގެން މާވިންއާއި ލަމްހާގެ މައްޗަށް ޕީޖީ އޮފީހުން ދައުވާ އުފުލައި، ކްރިމިނަލް ކޯޓަށް ހުށައަޅައިފައިވާކަމުގެ މައުލޫމާތު ޕީޖީ އޮފީހުން އެކައުންސިލަށް ދީފައިވާ ކަމަށާއި، އެހެންކަމުން އެ ދެމީހުންނަށް ދޫކޮށްފައިވާ ނަރުހެއްގެ ގޮތުގައި މަސައްކަތް ކުރުމުގެ ހުއްދަ އަދި ރެޖިސްޓަރޭޝަން ބާތިލުކޮށް އެކައުންސިލުގެ ނަރުހުންގެ ދަފްތަރުން ދާއިމީކޮށް އުނިކޮށްފައި ވާކަމަށެވެ.
ލަމްހާއާއި މާވިންގެ މައްޗަށް ދައުލަތުން ދައުވާ އުފުލީ ދުރާލައި ރާވައިގެން، މޭރީ ދިރިއުޅެމުން ގެންދިޔަ މއ. އުދުހޭކޮކާގޭގެ ފުރަތަމަ ފަންގިފިލާގެ ކޮޓަރިއެއްގެ ތެރޭގައި އޭނަ މަރާލިކަމުގެ ތުހުމަތުގައެވެ.
މި މައްސަލައިގައި މޭރީގެ ފިރިމީހާ މާވިންގެ އުފުލައިފައި ވަނީ އެއް ދައުވާއެވެ. އެއީ އެނގިހުރެ މީހަކު މެރުމުގެ ދައުވާއެވެ. މާވިންގެ މައްޗަށް އެ ދައުވާ އުފުލައިފައިވާ ސަބަބެއްގެ ގޮތުގައި ޕީޖީން ބުނީ، އޮކްޓޫބަރު 19ވަނަ ދުވަހުގެ 12:00އާއި 12:49އާ ދެމެދުގެ ވަގުތެއްގައި، މާވިންއާއި މޭރީ ދިރިއުޅުނު މއ. އުދުހޭކޮކާގޭގެ ފުރަތަމަ ފަންގިފިލާގެ ތެރޭގައި އޭނާގެ އަންހެނުން، މޭރީގެ ބޮލާއި ކަރަށް ހަމަލާދީގެންނާއި، ނޭވާ ހާސްކޮށްގެން މަރައިލައިފައި ވާތީކަމަށެވެ. އެ ދައުވާ ސާބިތުވެއްޖެ ނަމަ މާވިންއަށް 10 އަހަރު ދުވަހުގެ ޖަލު ހުކުމެއް އަންނާނެއެވެ.
މާވިންގެ ލޯބިވެރިޔާ ކަމަށްބުނާ ލަމްހާގެ މައްޗަށް ޕީޖީން ތިން ދައުވާއެއް އުފުލައިފައިވެއެވެ. އެއީ އެނގިހުރެ މީހަކު މެރުމުގައި ބައިވެރިވުމުގެ ކުށުގެ ދައުވާއާއި، އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރުހިންގުމުގެ ކުށުގެ ދަޢުވާގެ އިތުރުން ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގާ ކުރުމުގެ ކުށުގެ ދައުވާއެވެ. ތިން ދައުވާ ސާބިތުވެއްޖެ ނަމަ ލަމްހާއަށް މައްޗަށް ހަ އަހަރާއި ހަތަރު މަސް އަދި 24 ދުވަހުގެ ޖަލު ހުކުމެއް އަންނާނެއެވެ.
