އިލްތިމާސްކުރުމުން އިލެކްޝަން ކޮމިޝަންގެ ވާޖިބު އަދާވީއެއް ނޫން: ރައީސް ޔާމީން
ކޮމަންޑޫ ދާއިރާގެ އިންތިޚާބާ ދިމާކޮށް ސަރުކާރުން ގާނޫނާ ހިލާފު ކަންތައްތަކެއް ކުރި ކަމަށާއި އެ ފަދަ ކަންކަން ނުކުރުމަށް އިލެކްޝަންސް ކޮމިޝަން (އީސީ)އިން ވެސް އިލްތިމާސް ކުރި ކަމަށް އިދިކޮޅު ލީޑަރ އަދި ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
ޗެނަލް 13އިން ރޭގައި ދެއްކި "އެންމެ ފުރަތަމަ ޤައުމު" ޕްރޮގްރާމްގައި ބައިވެރިވެވަޑައިގެން ރައީސް ޔާމީން ވިދާޅުވީ ކޮމަންޑޫ ދާއިރާގެ ގޮނޑި އިދިކޮޅު ޕީޕީއެމްއަށް ކާމިޔާބު ކުރެވިއްޖެ ނަމަ ސަރުކާރުން ކުރާ ގާނޫނާ ހިލާފު ކަންކަމާ ގުޅޭގޮތުން އަޑުއުފުލޭނެ ކަމަށެވެ.
"އަޅުގަނޑުމެންނަށް މިހާރު ކުރެވޭނެ ކަމަކީ އަޑުއުފުލައިފައި ގާނޫނީ މަގުން ހިނގުން. އެހެން ނަމަވެސް އިލެކްޝަންސް ކޮމިޝަނަކީ ގާނޫނު އަސާސީއިން ހާއްސަ މަސްއޫލިއްޔަތުތަކެއް ހަވާލުކޮށްފައި އުފައްދައިފައިވާ މުއައްސަސާއެއް. އިންތިހާބުގައި ކޮރަޕްޝަންގެ އަމަލުތައް ހިނގާ ނަމަ އެކަން ހުއްޓުވުމަކީ ވެސް އީސީއިން ކުރަން ޖެހޭ ކަމެއް" ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ އެފަދަ ކަންކަން ހުއްޓުވުމަކީ ހަމައެކަނީ އޭސީސީއިން ކުރަން ޖެހޭ ކަމެއް ނޫން ކަމަށާއި އޭސީސީ މިވަގުތު ވަނީ ހަގީގަތުގައި ވެސް ޕެރެލައިޒްވެފައި ކަމަށެވެ.
"ސަރުކާރުން ޤާނޫނާ ޚިލާފަށް މިކަހަލަ ކަންތައްތަކެއްކޮށް، ކަންތައްތަކެއް އިއުލާން ކުރަން ފެށީމަ އިލެކްޝަން ކޮމިޝަނުން ދާދިފަހުން ވިދާޅުވި، ޤާނޫނާ ޚިލާފު ކަންކަން ނުކުރަން. ކޮރަޕްޝަންގެ އަމަލު ހުންނަ ފަދަ ކަންކަން ނުކުރަން ސަރުކާރަށް ވެސް އިލްތިމާސް ކުރެއްވި. ހަމައެކަނި އިލްތިމާސަކުން ނުފުދޭ. ދުސްތޫރުން ވަކި މެންޑޭޓެއް ދީފައި، އެތަން ހަވާލުކޮށްފައި އޮތީ އިލެކްޝަން ކޮމިޝަނާ އެހެންކަމުން އެ ކޮމިޝަނަށް އެފަދަ ކަންކަން ހުއްޓުވެން ވާނެ." ރައީސް ޔާމީން ވިދާޅުވިއެވެ.
ރައީސް ޔާމީން އިތުރަށް ވިދާޅުވީ، މިއީ ޤާނޫނީ މަގުން، ޤާނޫނަށް ތަބާވެގެން އެއްވެސް ކަމެއް ކުރަން ބޭނުންވާ ސަރުކާރެއް ނޫން ކަމަށެވެ.
"ބަޖެޓްގައި ނެތް މަޝްރޫއުތައް އަންނަ އަހަރުގެ ބަޖެޓުން ފައިސާ ދީގެން ހިންގުމަށް ޓަކައި ވަނީ އިއުލާނު ކޮށްފައި. މިސާލަކަށް އެމްޓީސީސީއާ ހަވާލުކޮށްގެން ހިންގާ ދެ ކޮމަންޑޫ ގުޅައިލުމުގެ މަސައްކަތް. ބަޖެޓްގައި ޖަހައި، ބަޖެޓުން ފާސްކޮށްގެން ނޫނީ ދައުލަތުގެ އެއްވެސް ޚަރަދެއް ކޮށްގެން ނުވާނެއޭ ބުނާއިރު، މިއަންނަ އަހަރުގެ ދައުލަތުގެ ބަޖެޓުން ފައިސާ ދޭން ޝަރުތުކޮށްފައި މިހާރު ނުކުރެވޭނެ އެކަމެއް. ބަޖެޓްގައި ނެތް ކަމެއް އެއީ" ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ މިއަންނަ އަހަރު ސަރުކާރުގައި ތިބޭނީ މިހާރު ސަރުކާރުގައި ތިބި މީހުން ކަމެއް ވެސް ނޭނގެ ކަމަށާއި މި އަންނަ އަހަރުގެ ބަޖެޓްގައި ޖަހައިގެން ކެޕިޓަލް އެކްސްޕެންޑީޗަރުގެ ޚަރަދު ހިނގާކަމަށް ވަންޏާ ކެޕިޓަލް އެކްސްޕެންޑީޗަރ ޖަހައިގެން ބަޖެޓު ފާސް ކުރުމުގެ ބޭނުމެއް ނެތް ކަމަށެވެ.
