ކޮވިޑާ އެކު، އެމްޑަބްލިޔުއެސްސީގެ މަޝްރޫއުތައް ކުރިއަށް ގެންދިޔުމަށް ހުރަސްތަކެއް
ކޮވިޑް-19ގެ ބޮޑުވަމުން އަންނަ ރާޅާ އެކު މޯލްޑިވްސް ވޯޓަރ އެންޑް ސްވަރޭޖް ކޮމްްޕެނީ (އެމްޑަބްލިޔުއެސްސީ)ގެ މަސައްކަތްތަކަށް ހުރަސްތަކެއް ކުރިމަތިވެފައިވާ ކަމަށް އެކުންފުނީގެ މެނޭޖިން ޑިރެކްޓަރު ހަސަން ޝާހު ވިދާޅުވެއްޖެއެވެ.
އެމްޑަބްލިޔުއެސްސީއިން ކުރަމުންދާ މަސައްކަތްތަކާ ގުޅޭ ގޮތުން ރާއްޖެ ޓީވީގައި ވާހަކަ ދައްކަވަމުން ޝާހު ވިދާޅުވީ އެމްޑަބްލިޔުއެސްސީން 31 ރަށެއްގެ ފެނާއި ނަރުދަމާގެ މަސައްކަތްތައް ކުރަމުން އަންނަ ކަމަށެވެ.
އެ ކުންފުނިން 20 ރަށެއްގެ ފެނާ ނަރުދަމާގެ މަސައްކަތް ކުރަމުން އަންނަނީ ކޮންޓްރެކްޓަރ ފައިނޭންސް އުސޫލުން ކަމަށާއި، އެކުންފުނިން މަޝްރޫއެއް ހިންގާ އެއްވެސް ރަށެއްގައި މަސައްކަތް ހުއްޓިފައި ނެތް ކަމަށް ވިދާޅުވިއެވެ. މަސައްކަތްތައް ނުހުއްޓުނު ނަމަވެސް، ޝާހު ވިދާޅުވި ގޮތުގައި، ކޮވިޑާ އެކު، ގިނަ ގޮންޖެހުންތަކެއް އެބަހުއްޓެވެ.
"ހަމަ ހުރިހާ ރަށެއްގައި ވެސް މަސައްކަތް ބާރަށް އެބަ ކުރިއަށްދޭ. އެހެން ނަމަވެސް މިހާރު އަނެއްކާ ވެސް، ކޮވިޑްގެ ރާޅު ބޮޑުވުމާ ގުޅިގެން އެމްޑަބްލިޔުއެސްސީގެ މަސައްކަަތަށް ވެސް ހުރަސް އެޅޭ. އަޅުގަނޑުމެންގެ އިންޖިނިއަރިން މަސައްކަތް ކުރާ ވަރަށް ގިނަ މުވައްޒަފުން ކޮވިޑަށް ޕޮޒިޓިވް އެބަވޭ. އަދި އަޅުގަނޑުމެން މަސައްކަތް ކުރާ ރަށްރަށް މޮނިޓަރިން ހާލަތަށް ވެސް ލަމުން އެބަދޭ. އެހެންވުމުގެ ސަބަބުން މަސައްކަތްތައް އެންމެ އެދެވޭ ގޮތަކަށް ކުރިއަކަށް ނުއެއް ގެންދެވޭ." ޝާހު ވިދާޅުވިއެވެ.
އެމްޑަބްލިޔުއެސްސީގެ އެމްޑީ ހަސަން ޝާހު
އޭނާ ވިދާޅުވީ އެމްޑަބްލިޔުއެސްސީގެ މަސައްކަތްތައް ކުރިއަށް ގެންދިޔުމަށް މުއައްސަސާތަކުގެ އެއްބާރުލުން ލިބެން ޖެހޭ ކަމަށެވެ. އެގޮތުން ކޮވިޑް-19ފަދަ ޕެންޑަމިކެއްގެ ތެރޭގައި، މަޝްރޫއުތައް ކުރިއަށް ގެންދިޔުމަށް މާލީ އެހީތެރިކަން ވަރަށް މުހިންމުކަން އޭނާ ފާހަގަ ކުރެއްވިއެވެ.އަދި މާލީ އެހީ ހޯދުމަށް ބޭންކްތަކަށް ޑޮކިއުމަންޓްތައް ފޮނުވުމަކީ ސްޓޭކްހޯލްޑަރުންގެ ޒިންމާއަކަށްވާއިރު، އެ ޒިންމާ އެކި ގޮތްގޮތަށް މާނަކޮށް، ރަޖިސްޓްރީތައް ލަސްކުރުން ފަދަ މައްސަލަތައް ދިމާވެ، މަޝްރޫއުތައް ލަސްވާކަން އޭނާ ފާހަގަ ކުރެއްވިއެވެ.
ޝާހު ވިދާޅުވީ އެމްޑަބްލިޔުއެސްސީން އެންމެ ބޮޑު އިސްކަމެއް ދީގެން ކުރަމުން އަންނަ މަސައްކަތަކީ 2019 ވަނަ އަހަރުގައި އެކުންފުންޏާ ހަވާލު ކުރެވުނު ރަށްތައް ކަމުގައިވާ ރ.ކިނޮޅަހާއި، ބ.ގޮއިދޫ އާއި، ނ.މާޅެންދޫ އާއި، ނ.ކުޑަފަރީގެ ފެނާއި ނަރުދަމާގެ މަސައްކަތް ނިންމުމަށް ފަހު، ޕްލޭނިން މިނިސްޓްރީއާ ހަވާލު ކުރުމުގެ މަސައްކަތް ކަަމަށެވެ.
