މުދައްރިސުންގެ އުޖޫރަ ބޮޑުކުރާނެކަން އިއުލާނު ކުރުމުން، އެޑިއުކޭޝަން މިނިސްޓަރުގެ ޝުކުރު ރައީސްއަށް

ދިވެހި މުދައްރިސުންގެ މުސާރަ ގުޅިފައި ވަނީ ދިވެހިރާއްޖޭގެ ތަރައްގީއާ ކަމަށާއި، މުދައްރިސުންގެ އުޖޫރަ ބޮޑު ކޮށްދޭނެކަން އިއުލާނު ކުރެެއްވުމުން އެޑިއުކޭޝަން މިނިސްޓަރު ޑރ. އައިޝަތު އަލީ ރައީސުލްޖުމްހޫރިއްޔާއަށް ޝުކުރު ދަންނަވައިފިއެވެ.

Ads by Hajj Corporation

މަޖިލީސް އައު ދައުރަށް ހުޅުވުމަށް މިއަދު ބޭއްވި ޖަލްސާގައި އިއްވެވި ރިޔާސީ ބަޔާނުގައި ރައީސް ވިދާޅުވީ ގުރެޖުއޭޓް ލެވެލްގެ ސެކަންޑަރީ ޓީޗަރެއްގެ މުސާރަ އިތުރުގަޑި ނުލާ 12،628 ރުފިޔާއިން 19،740 ރުފިޔާއަށް ބޮޑުވެގެންދާނެ ކަމަށެވެ.

އަދި ގައުމު ބިނާކުރުމުގެ އެންމެ ބުރަ މަސްއޫލިއްޔަތު އަދާކުރަނީ ދަރިން ބިނާކުރާ އެދުރުން ކަމަށާއި އެމީހުންނަށް އެކަށީގެންވާ އުޖޫރައެއް ލިބިދިނުމަކީ ވައުދެއް ކަމަށްވެސް ވިދާޅުވިއެވެ.

މިކަމާ ގުޅިގެން މިނިސްޓަރު އައިޝަތު، ރައީސްއަށް ޝުކުރު ދަންނަވައި ވިދާޅުވީ މުދައްރިސުންގެ މުސާރައިގެ މިންވަރު ގުޅިފައި ވަނީ ދިވެހިރާއްޖޭގެ ތަރައްޤީއާ ކަމަށާއި، މިކަމުން އެ ކަމަނާ އެދިވަޑައިގަންނަވަނީ، ހުނަރުވެރި ދަރިވަރުން މުދައްރިސްކަމާ ކުރިމަތިލުމަށާއި މޮޅެތި މުދައްރިސުން ވަޒީފާގައި ދެމިތިބުމަށް ކަމަށް ވިދާޅުވިއެވެ.

"މީގެ ކުރިން ދުވަހަކު ވެސް ބޮޑުކޮށްދީފައި ނުވާ މިންވަރަކަށް މުދައްރިސުންގެ މުސާރަ ރައީސް ޞާލިހު ބޮޑުކޮށްދެއްވަން އިއުލާނު ކުރެއްވި ކަމީ، ސްކޫލްތަކާއި ގުޅިފައިވާ ހުރިހާ ފަރާތްތަކަށް ލިބުނު މަތިވެރި އުފަލެއް." އައިޝަތު އަލީ ވިދާޅުވިއެވެ.

ޓީޗަރުންގެ މުސާރަ ބޮޑު ކުރައްވާނެކަން ރައީސް މިއަދު އިއުލާނު ކުރެއްވިއިރު، އެއީ އެމަނިކުފާނުގެ ރިޔާސީ ވައުދުފުޅެއް ވެސް މެއެވެ.