ހެންވޭރުގެ ބައެއް ސަރަހައްދުތަކުން މިއަދު ހަވީރު ކަރަންޓު ކެނޑޭނެ
ކޮންމެހެން ކުރަން ޖެހޭ މަސައްކަތެއް ކުރުމަށް، ހެންވޭރުގެ ބައެއް ސަރަހައްދުތަކުން މިއަދު ހަވީރު ކަރަންޓު ކަނޑާލަން ޖެހިދާނެ ކަމަށް ސްޓެލްކޯއިން ބުނެފިއެވެ.
މިކަމާ ގުޅިގެން ސްޓެލްކޯ އިން މިއަދު ކުރި ޓްވީޓެއްގައި ބުނީ، އެ ކުންފުނިން ކޮންމެހެން ކުރަންޖެހޭ މަސައްކަތެއް ކުރުމަށްޓަކައި ހެންވޭރުގެ އަމީރު އަހުމަދު މަގާއި، ހިތްފަސޭހަ ގޯޅި އަދި ބޮޑުތަކުރުފާނު މަގު ހިމެނޭ ސަރަހައްދުން މިއަދު ހަވީރު 4:00 އިން 5:00 އަށް ކަރަންޓު ކަނޑާލަން ޖެހުމަކީ އެކަށީގެންވާ ކަމެއް ކަމަށެވެ.
ކަރަންޓު ކެނޑިފައި ހުންނާނެ ވަގުތުތަކުގައި ރައްޔިތުންނަށް ދިމާވެދާނެ ދަތިތަކަށް ސްޓެލްކޯ އިން ވަނީ މާފަށް އެދިފައެވެ. އަދި ވަކި ގަޑިއެއް ބުނެފައިވީ ނަމަވެސް، މަސައްކަތް ނިމުނުހާ އަވަހަކަށް ކަރަންޓު ފޯރު ކޮށްދޭނެ ކަމަށް ވެސް ބުނެފައިވެއެވެ.
މުހިންމު މަސައްކަތެއް ކުރުމަށް މިއަދު ހަވީރު ހެންވޭރުގެ ބައެއް ސަރަހައްދުތަކުން ކަރަންޓު ކަނޑާލާއިރު، ކަރަންޓު ކަނޑައިލާ ބްލޮކްގައި 42 ތަނަކަށް އެ ކުންފުނިން ކަރަންޓުގެ ހިދުމަތް ދެއެވެ.
