އިންޑިއާ އައުޓު ހުއްޓުވުމަށް ބިލެއް ފާސްކުރުމާ އެމްއެންޕީން ދެކޮޅު
އިންޑިއާ ސިފައިން ރާއްޖޭގައި ތިބުމާ ދެކޮޅަށް އިދިކޮޅުން ކުރިއަށް ގެންދާ އިންޑިއާ އައުޓު ކެމްޕެއިން ހުއްޓުވުމަށް ރައްޔިތުންގެ މަޖިލީހުން ބިލެއް ފާސްކުރުމާ ދެކޮޅުކަމަށް މޯލްޑިވްސް ނެޝަނަލް ޕާޓީ، އެމްއެންޕީން ބުނެފިއެވެ.
އެމްއެންޕީން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި އެޕާޓީގެ ރައީސް އަދި ދަނގެތީ ދާއިރާގެ މެމްބަރު މުހައްމަދު ނާޒިމް ވިދާޅުވީ ގާނޫނު އަސާސީގެ ހަތާވީސް ވަނަ މާއްދާއިން ލިބިދޭ ހިޔާލުފާޅުކުރުމުގެ މިނިވަންކަމަކީ އެންމެން ވެސް އިހުތިރާމު ކުރަންޖެހޭ ކަމެއްކަމަށެވެ. ގާނޫނު އަސާސީއާ ހިލާފަށް އެއްވެސް ބިލެއް ހުށަހަޅައިގެން ފާސްކުރެވިދާނެކަމަށް ގަބޫލު ނުކުރައްވާކަމަށް ނާޒިމް ވިދާޅުވިއެވެ.
ދޭދޭ ގައުމުތަކާ މެދު ނަފްރަތު އުފެދޭގޮތަށް ކުރެވޭ ކަމެއް ނުވަތަ ދެކެވޭ ވާހަކައެއް ނަމަވެސް އަދި އެއްވެސް ގައުމަކަށް ނުރުހުން ފާޅުކޮށް މީހުން ވާހަކަ ދެއްކި ނަމަވެސް ބިލެއް ހުށަހަޅައިގެން އެކަން ހުއްޓުވުމަކީ ކުރެވިދާނެ ކަމެއްކަމަށް އެމްއެންޕީން ނުދެކޭކަމަށް ނާޒިމް ވިދާޅުވިއެވެ.
"އަޅުގަނޑުމެން އިއްޔެ ޕާލަމެންޓަރީ ގްރޫޕުގެ ބައްދަލުވުމެއް ވެސް ބޭއްވިން. އަޅުގަނޑުމެންނަށް ނިންމިފައި މިހާރު މިއޮތީ ބިލަކުން އެކަހަލަ ކަންކަން ހުއްޓުވޭނެކަމަކަށް ނުދެކެމޭ. ކުރީ ސަރުކާރުން ކުރެއްވި ކަހަލަ ކަމެއް ކުރައްވަން ހަމަ މި މަސައްކަތް ކުރައްވަނީ" ނާޒިމް ވިދާޅުވިއެވެ.
އެމްއެންޕީން ދެކެން ބޭނުން ވަނީ ރައްޔިތުންނަށް ހައްގު ބަސް ބުނެވޭނެ ދުވަހެއް ކަމަށާއި އެޕާޓީގެ ސަރުކާރެއްގައި ރައްޔިތުން ބުނަން ބޭނުންވާ ބަހެއް ބުނުމުގެ ފުރުސަތު ދެވޭނެކަމަށް ވެސް ނާޒިމް ވިދާޅުވިއެވެ.
ކުރީ ސަރުކާރުން އަބުރުގެ ބިލެއް ފާސްކުރުމުން އެކަމާ ދެކޮޅަށް ގިނަ ބަޔަކު ވަކާލާތު ކުރިކަން ފާހަގަކުރައްވައި ނާޒިމް ވިދާޅުވީ މިހާރު މިކުރެވެނީ ވެސް އެފަދަ މަސައްކަތެއް ކަމަށާއި މިފަދަ ކަންކަން ހިނގަނީ ސަރުކާރުގެ ދެފުށް ފެންނަ ސިޔާސަތެއް ނެތުމުން ކަމަށެވެ. އެގޮތުން އެއްވެސް އެގްރީމެންޓެއް ސިއްރު ކުރަންޖެހޭނެ ސަބަބެއް އޮވެގެން ނުވާނެކަމަށް ވެސް އޭނާ ވިދާޅުވިއެވެ.
އިންޑިއާ އައުޓު ގޮވުން ހުއްޓުވުމަށް ބިލެއް ފާސްކުރަން މަޖިލީހުގެ މެޖޯރިޓީ އޮންނަ އެމްޑީޕީން ވަނީ ނިންމައިފައެވެ. އެބިލުގައި އިންޑިއާ އައުޓު ގޮވާ މީހުންނަށް ބޮޑެތި ޖޫރިމަނާތަކާއި ޖިނާއީ އަދަބުތައް ވަނީ ކަނޑައަޅައިފައެވެ.
އިންޑިއާ އައުޓުގެ ނަމުގައި އިދިކޮޅުން ކުރިއަށް ގެންދާ ކެމްޕެއިންގައި ދަނީ ރާއްޖެއާއި އިންޑިއާއާ ދެމެދު ހަދައިފައިވާ އެއްބަސްވުންތަކުގެ ތަފްސީލު ހާމަކުރުމަށް ސަރުކާރަށް ގޮވައިލަމުންނެވެ. އޭގެ ތެރޭގައި އުތުރުތިލަފަޅު ތަރައްގީކުރުމުގެ އެއްބަސްވުމާއި ހައިޑްރޯގްރަފީ އެއްބަސްވުން ހިމެނެއެވެ. ސަރުކާރުން ދަނީ މިއެއްބަސްވުންތައް އާންމުކުރުމަށް ދެކޮޅު ހަދަމުންނެވެ. ސަބަބެއް ކަމުގައި ސަރުކާރުން ބުނަނީ އޭގެ ސަބަބުން ގައުމީ ސަލާމަތަށް ނުރައްކާވެދާނެތީއެވެ.
މީގެ އިތުރުން ސަރުކާރުން ދާދި ފަހުން ވަނީ މާލެއާއި ވިލިމާލެ، ގުޅީފަޅު އަދި ތިލަފުށި ގުޅުވައިލުމަށް އަޅާ ތިލަމާލެ ބްރިޖުގެ އެއްބަސްވުން ވެސް ހާމަކުރަން ދެކޮޅު ހަދައިފައެވެ. މިއީ ވެސް އިންޑިއާގެ ކުންފުންޏަކާ އެކު ހަދައިފައިވާ އެއްބަސްވުމެކެވެ. މިމަޝްރޫއަށް ފަންޑުކުރަނީ ވެސް އިންޑިއާއިންނެވެ. ސަރުކާރުން ބުނެފައި ވަނީ ތިލަމާލެ ބްރިޖުގެ އެއްބަސްވުމަކީ ސިއްރެއް ކަމަށެވެ.
ނޫނޭ ގޮތް ދައްކާކަށް ކޮންމެހެން ދެކޮޅެއް ހަދާނެ ކަމެއް ނެތް އެއްކޮޅުވޭ. ވޯޓު ދޭންވީމަ ދެކޮޅު ނަހަދާނެކަން ގައިމުތާ!