ޓޫރިޒަމް އަޕް ބީޓް ޓޯކް ޝޯގެ ނަމުގައި ސީރީޒެއް ފަށަނީ
ރާއްޖޭގައި ފަތުރުވެރިކަމުގެ ސިނާއަތު ފެށިތާ 50 އަހަރު ފުރުން ފާހަގަކުރުމުގެ ގޮތުން ޓޫރިޒަމް އަޕް ބީޓް ޓޯކް ޝޯގެ ނަމުގައި ސީރީޒެއް ފަށަން ތައްޔާރުވެއްޖެއެވެ.
މި ޓޯކް ޝޯތަކުގެ ތަފްސީލު ޓޫރިޒަމް މިނިސްޓަރު ޑރ. އަބްދުﷲ މައުސޫމު ވަނީ ހިއްސާ ކުރައްވައިފައެވެ. ބުރާސްފަތި ދުވަހު ފަށަން ހަމަޖެހިފައިވާ މި ސީރީޒްގެ ފުރަތަމަ ޝޯގައި ބައިވެރިވެވަޑައިގަންނަވާނީ ފަތުރުވެރިކަމުގެ ސިނާއަތުގެ ބާނީންނެވެ. ދެވަނަ ޝޯގައި މިސިނާއަތުގައި ހަރަކާތްތެރިވާ އަންހެން ބޭފުޅުން ބައިވެރިވާއިރު އިތުރު ޝޯތަކުގެ ތަފްސީލު ވެސް މިނިސްޓްރީން ކުރިއަށް އޮތް ތަނުގައި ހާމަކުރާނެއެވެ.
ފަތުރުވެރިކަމުގެ ރަން އަހަރާ ގުޅިގެން ހާއްސަ ސްޓޭމްޕެއް ނެރުމަށް ބުދަ ދުވަހު ބޭއްވި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު މައުސޫމު ވިދާޅުވީ މިއަހަރު ކުލަގަދަކޮށް ފާހަގަކުރުމުގެ ގޮތުން ގިނަ ހަރަކާތްތަކެއް ކުރިއަށް ރޭވިފައިވާ ކަމަށެވެ. އެގޮތުން އެންމެ ހާއްސަ ހަރަކާތެއްގެ ގޮތުގައި މިނިސްޓަރު ފާހަގަކުރެއްވީ ޓޫރިޒަމް ކޮންވެންޝަން ކޮންފަރެންސެވެ.
މީގެ އިތުރުން ތިމާވެށީގެ ހަރަކާތްތަކާއި ތައުލީމީ ދާއިރާގެ ހަރަކާތްތައް ވެސް މިއަހަރު ރޭވިފައިވާކަމަށް މިނިސްޓަރު ވިދާޅުވިއެވެ.
މިއަހަރުން ފެށިގެން ކޮންމެ އޮކްޓޯބަރު މަހެއްގެ ތިންވަނަ ދުވަހަކީ ގައުމީ ފަތުރުވެރިކަމުގެ ދުވަހުގެ ގޮތުގައި ފާހަގަކުރަން ރައީސް އިބްރާހިމް މުހައްމަދު ޞާލިހު ވަނީ ނިންމަވައިފައެވެ. މިނިސްޓަރު މައުސޫމް ވަނީ މިކަމާ ގުޅިގެން ރައީސް ޞާލިހަށް ޝުކުރު އަދާކުރައްވައިފައެވެ.
ފަތުރުވެރިކަމުގެ ރަން އަހަރާ ގުޅިގެން ޖުމްލަ ހަ ސްޓޭމްޕެއް ވަނީ ނެރެފައެވެ. އެގޮތުން 5 ރުފިޔާގެ ސްޓޭމްޕުގައި ދައްކުވައިދެނީ ރާއްޖޭގެ ފުރަތަމަ ރިޒޯޓުގެ މަންޒަރެކެވެ. އަދި ފަތުރުވެރިންތަކެއް ކެނޯ ދުއްވާ މަންޒަރު 10 ރުފިޔާގެ ސްޓޭމްޕުން ފެނެއެވެ.
20 ރުފިޔާގެ ސްޓޭމްޕުގައި ދައްކުވައިދެނީ ރާއްޖޭގައި އެންމެ ފުރަތަމަ ހުޅުވި ޓޫރިޒަމް އިންސްޓިޓިއުޓުގެ މަންޒަރެކެވެ. 30 ރުފިޔާގެ ސްޓޭމްޕުގައި ސީޕްލޭނެއް ދައްކުވައިދޭއިރު 40 ރުފިޔާގެ ސްޓޭމްޕުގައި ދައްކުވައިދެނީ މާފުށީގައި ހުޅުވި ފުރަތަމަ ގެސްޓު ހައުސްގެ މަންޒަރެކެވެ.
50 ރުފިޔާގެ ސްޓޭމްޕު ހާއްސަކޮށްފައިވަނީ ފަތުރުވެރިކަމުގެ ރަން އަހަރުގެ ލޯގޯއަށެވެ.
ސްޓޭމްޕު ނެރުމުގެ ރަސްމިއްޔާތުގައި ފަތުރުވެރިކަމުގެ ސިނާއަތުގެ ބާނީންނާއި އެމްއެމްޕީއާރުސީގެ އިސްވެރިން ވަނީ ބައިވެރިވެވަޑައިގެންފައެވެ.
