އައްޑޫގެ ބިން ހިއްކުން ހުއްޓުވަން އުޅުނު މައްސަލަ ބަލައިގެންފި
އައްޑޫގައި ފަށަން އުޅޭ ބިން ހިއްކުމުގެ ބޮޑު މަޝްރޫއު ހުއްޓުވައިދިނުމަށް އެދި އަމިއްލަ ފަރާތަކުން ހުށަހެޅި މައްސަލަ ސ. މީދޫ މެޖިސްޓްރޭޓް ކޯޓުން މިއަދު ބަލައިގެންފިއެވެ.
އެ ގޮތުން ބިން ހިއްކަނީ ތިމާވެއްޓަށް ގެއްލުންވާ ގޮތަށް ކަމަށް ބުނެ، ޕްލޭނިން މިނިސްޓްރީއާ ދެކޮޅަށް އެ މައްސަލަ ކޯޓަށް ހުށަހެޅީ ސ. މީދޫ/ މުރިގު، އަބްދުﷲ ނުޒައިރުއެވެ.
ނުޒައިރުގެ ފަރާތުން މި މައްސަލައިގައި ވަކާލާތު ކުރަނީ ޕްރައިމް ސްޓްރެޓެކީ އެޓާނީސް އެންޑް ކޮންސަލްޓަންޓްސް ލޯފާމުންނެވެ.
އެ ލޯ ފާމްއިން މިރޭ ނެރުނު ބަޔާނެއްގައި ބުނެފައި ވަނީ ނުޒައިރުގެ ފަރާތުން އެ މައްސަލަ ކޯޓަށް ހުށަހަޅައިފައި ވަނީ ބިން ހިއްކުމުގެ ޕްރޮޖެކްޓް ޕްލޭންކޮށްފައިވާ ގޮތަށް އައްޑޫގެ އެތެރެވަރިން ވެލި ނަގައިގެން އެ މަސައްކަތް ކުރިއަށް ގެންގޮސްފި ނަމަ އެކަމުގެ ސަބަބުން އިއާދަ ވެސް ނުކުރެވޭ ވަރުގެ ގެއްލުންތަކެއް އާންމުން ރައްޔިތުންނާއި ތިމާވެއްޓާއި އަދި އަންނަން އޮތް ޖީލުތަކަށް ކުރާނެކަން ދިރާސާއިން ހާމަވެފައި ވާތީ ކަމަށެވެ.
އަދި އެ މަޝްރޫއަކީ ގާނޫނާ ހިލާފަށް ކުރިއަށް ގެންދާ ގެއްލުން ބޮޑު ކަމަކަށް ވާނެތީ އާންމު މަސްލަހަތު ހިމާޔަތްކޮށް، ތިމާވެށި ހިމާޔަތްކުރުމުގެ ގޮތުން އެ މައްސަލަ ހުށަހެޅީ ކަމަށް ވެސް ބުނެފައި ވެއެވެ.
