ސްޓެލްކޯއިން ބޭއްވި ކުޑަކުދިންގެ ހަވީރަށް ހޫނު ތަރުހީބެއް
ކަރަންޓު އިގްތިސާދު ކުރުމަށް ހޭލުންތެރިކުރުވުމުގެ ގޮތުން ސްޓެލްކޯއިން ކުރިޔަށް ގެންދާ "އެނާޖީ ސޭވިންގ" ކެމްޕެއިންގެ ދަށުން ހުކުރު ދުވަހުގެ ހަވީރު ހުޅުމާލޭ ސެންޓްރަލް ޕާކުގައި ބޭއްވި ކުޑަކުދިންގެ ހަވީރަށް ހޫނު ތަރުހީބެއް ލިބިއްޖެއެވެ.
ސްޓެލްކޯއިން ބުނި ގޮތުގައި، އެ ކެމްޕެއިނުގެ ދަށުން ކުރިއަށް ގެންދިޔަ ކުޑަކުދިންގެ ހަވީރުގައި ވަނީ، ރަނގަޅު ގޮތުގައި ކަރަންޓު ބޭނުން ކުރުމުގެ މުހިއްމުކަމާއި، ކަރަންޓު އިގުތިސާދު ކުރުމަށް ކުރެވިދާނެ ކަންކަމުގެ މައުލޫމާތު ކުޑަކުދިންނަށް ދިނުމުގެ އިތުރުން އެކުދިންގެ ހުނަރު ދައްކާލުމާ އެކު، ތަފާތު އެކި ކުޅިވަރުތަކާއި ހަދިޔާތައް ވެސް ދީފައެވެ.
މި ހާއްސަ ހަވީރުގައި ވަނީ ކަރަންޓު ހަރަދު ކުޑަ އެލްއީޑީ ބޮކި ބެހުމުގެ އިތުރުން ރޮބޯމޭންގެ ހަރަކާތްތަކާއި، ކަޕްކޭކާއި، ކުޑަކުދިންނާ ގުޅުން ހުރި އެކި ކަހަލަ ގޭމްތައް ކުޅުމުގެ ފުރުސަތު ވެސް ލިބިގެން ގޮސްފައެވެ.
ސްޓެލްކޯގެ ފަރާތުން އެނާޖީސޭވިން ކެމްޕެއިން ކުރިޔަށްދާ އިރު، މިފަދަ އިތުރު ހަރަކާތްތައް ވެސް ކުރިޔަށް އޮތް ދުވަސްތަކުގައި ބޭއްވުމަށް އެކުންފުނިން ވަނީ ނިންމައިފައެވެ. އެ ހަރަކާތްތަކުގެ މައުލޫމާތު ސްޓެލްކޯއިން މީސް މީޑިއާއާއި، މާސްމީޑިއާ މެދުވެރިކޮށް އިއުލާން ކުރާނެ ކަމަށް ވެސް އެ ކުންފުނިން ބުނެއެވެ.
