ނޭވާ ހޮޅީގައި ކަރަންފުލެއް ތާށިވެ، ވެންޓިލޭޓަރަށްލި ކުއްޖަކު ސަލާމަތްވެއްޖެ!
ނޭވާ ހޮޅީގައި ކަރަންފުލެއް ތާށިވެ، ސީރިއަސް ހާލަތަކަށް ދިޔަ ދެ އަހަރުނުވާ ކުއްޖަކު ނުރައްކަލުން ސަލާމަތްވެ ރަނގަޅުވެފައިވާ ކަމަށް އައިޖީއެމްއެޗްގެ ފުއްޕާމޭގެ ހާއްސަ ޑޮކްޓަރ މުހައްމަދު އަލީ ވިދާޅުވެއްޖެއެވެ.
ޑރ. މުހައްމަދު މިއަދު ވިދާޅުވީ ކަރަންފުލަކީ ކުޑަކުދިންނަށް ވަރަށް އާންމުކޮށް ދެވޭ އެއްޗެއް ކަމަށާއި އާންމުކޮށް ވަރަށް ފަސޭހައިން ކުޑަކުއްޖަކު އަމިއްލައަށް ތަނަކުން ނަގައިގެން ވެސް އަނގަޔަށް ލައިފާނެ އެއްޗެއް ކަމަށެވެ.
ޑރ. ވިދާޅުވީ އެ ކުއްޖާ ކެއި ކަރަންފޫ ދިޔައީ ނޭވާލާ ހޮޅި ތެރެއަށް ކަމަށާއި ކަރަންފޫ ނެގުނީ ވަރަށް އުނދަގުލުން ކަމަށެވެ. އަދި އެ ކުއްޖާ ވެންޓިލޭޓަރަށް ވެސް ލާންޖެހުނު ކަމަށް ޑރ. ވިދާޅުވިއެވެ. ނަމަަވެސް މިހާރު ފަރުވާއަށް ފަހު އެކުއްޖާ ހޮސްޕިޓަލުން ދޫކޮށްލައިފައިވާ ކަމަށް ޑރ. މުޙައްމަދު ވިދާޅުވިއެވެ.
ޑރ. އިތުރަށް ވިދާޅުވީ ކަރަންފޫ ކަހަލަ އެއްޗިއްސަކީ އެއަށް ފެން ދަމާ އެއްޗިހި ކަމަށާއި އެ ކުއްޖާ ކެއި ކަރަންފޫ އޮތީ ފެންދަމާ ފުފިފަކަމަށެވެ. އަދި ކަރަންފޫ ތާށިވީ ވާތް ފަރާތު ނޭވާލާ ހޮޅީގައި ކަމަށް ޑރ. މުޙައްމަދު ވިދާޅުވިއެވެ.
މި ހާދިސާ ހިއްސާކުރައްވަމުން ޑރ. މުޙައްމަދު ވަނީ ކުޑަކުދިންނަށް ކަރަންފޫ ކަހަލަ އެއްޗިހި ނުދިނުމަށާއި ކާ އެއްޗިހި އަނގަޔަށް ލައިގެން، ހީ، ސަކަރާތް ޖަހާ، ދުވެ އުޅުނަ ނުދިނުމަށް އިލްތިމާސްކޮށްފައެވެ.
Ads by STO
