އުމުރު ދުވަހު އެކީ އުޅެން ވައުދުވި ލޯބިވެރިޔާ މިހާރު ކޮބާ؟
އުޑާއި ބިމާ ހެކިކޮށް ރައްޓެހި ވެގެން އުޅުނު ކުއްޖާއާ އެކީ އުމުރު ދުވަހު އުޅުމަށް ވައުދާއި އަހުދުތައްވީ ދުވަސް މަތިން ހަނދާން ވޭ ހޭއްޔެވެ؟ ހަނދާއި ހުރިހާ ތަރިތައް ހެކިކޮށް ލޯބިވެރިޔާ ދޫކޮށްފައި ނުދާނަން ކަމަށް ބުނި ބަސްތައް މަތިން ވެސް އެހާ އަވަހަށް ހަނދާން ނެތުނީ ހެއްޔެވެ؟ ލޯބިވެރިޔާ ނޫން އެހެން މީހަކާ ދިމާއަށް މަރު ދުވަހާ ހަމަޔަށް ވެސް ލޯބީގެ ނަޒަރުން ނުބަލާނަން ކަމަށް ވައުދު ވި ޒަމާން މިހާރު ހަނދާނަކު ނެތް ދޯއެވެ؟
ޒުވާން އުމުރުގައި ގިނަ ކުދިން އާއިލާއަށް ސިއްރުން ނޫނީ ފާޅުގައި ލޯބިވެރިން ގެންގުޅެއެވެ. އެއްބަޔަކު ތިމާ އާއި އެއް އުމުރެއްގެ ކުދިންނާއި ލޯބީގެ ގޮތުން ގުޅިގެން އުޅުނު އިރު، ދެން ތިބި ކުދިން ގެންގުޅޭނީ އެކުއްޖާއަށް ވުރެ ދެތިން ހަތަރު އަހަރު ދޮށީ ލޯބިވެރިންނެވެ. ކިޔަވާ ދުވަސްވަރު ލޯބިވެރިއެއް ނަގައިގެން އޭނަ ފަހަތުން ދުވަން ހަދައިގެން ގިނަ ފަހަރަށް އޮންނަނީ، ކިޔަވަން ޖެހޭ ވަގުތު ނުކިޔެވިފައެވެ. ގްރޭޑް ހަތެއް ގައި އުޅޭ ދަރިވަރު ވެސް ފިލާވަޅު ދަސްކުރުމުގެ ބަދަލުގައި ބައެއް ފަހަރު ލޯބިވެރިޔާއާއި އެކީ މުޅި ހަޔާތް ވޭތު ކުރާނެ ގޮތް ރާވައެވެ.
ހަގީގަތަކީ ޒުވާން އުމުރުގައި ލޯބީގެ ގޮތުން ގުޅޭ ބައިވެރިޔާއާއި ކައިވެނި ކުރުމުގެ ފުރުސަތު ލިބެނީ މަދު ބަޔަކަށެވެ. ގިނަ ފަހަރަށް އަންހެން ކުއްޖާ ނުވަތަ ފިރިހެން ކުއްޖާ އެހެން މީހަކު ފެނިގެން އެއްކަލަ ސުކޫލު ދައުރުގައި ގެންގުޅުނު ލޯބިވެރިޔާ ދޫކޮށްލާފައި ދެއެވެ. ދޫކޮށްލާފައި ދާއިރު، ފަހު ނޭވާއާ ހަމައަށް އެކީ އުޅެން މީހަކު ގާތު ވައުދުވީ ކަމެއް ހަނދާން ވެސް ނުހުންނާނެއެވެ. ދެމީހުން ރުޅިވާ ފަހުން އެކަކު އަނެކަކު ފެނުނަސް ދެނެ ހުރި ކަމަށް ވެސް ނުހަދާނެއެވެ. އެހެން ވީމާ އެންމެ ޒުވާން އުމުރުގައި ތި ގެންގުޅުނު ލޯބިވެރިޔާ ވީ ހަގީގީ ލޯބިތޯ ނޫނީ ފޭކް ލޯބިތޯ ވިސްނާލުން ރަނގަޅެވެ.
އަބަދުވެސް ފުރަތަމަ އިސްކަމެއް ދޭންވީ ދިިރިއުޅުން ބާއްޖަވެރިކުރަން މުހިންމު ކަންކަން ކުރުމަށެވެ. ކިޔަވާ ނިމުމުން ވެސް ލޯބިވެރިއެއް ލިބިދާނެއެވެ. ގިނަ ފަހަރަށް ޒަވާޖީ ހަޔާތެއް ފަށަނީ ކިޔަވާ ދައުރު ނިންމާފައި ވަޒީފާގެ މާހައުލުން ދިމާވާ މީހާއާއެވެ. އެހެން ކަމުން ސުކޫލު ދައުރު ގައި ނުވަތަ އެންމެ ޒުވާން ދުވަސްވަރު ކިޔެވުމަށް ފަރުވާ ކުޑަކޮށްފައި ލޯބިވެރިޔާގެ ފަހަތުން ދުވުމަކީ ބޭކާރު ކަމެކެވެ. ޒުވާން ދުވަސްވަރު އެމީހަކަށް ޓަކައި މަރުދަން ޖެހުނު މީހާ މިހާރު މީހަކާއި އިނދެގެން ދެތިން ދަރިން ނެތް ކަމެއް ވެސް ނޭނގެއެވެ.
Ads by STO
