ކުރެވުނު ކުށަށް ކިޔަމަންތެރިކަމާ އެކު އަދަބު ލިބިގަތް، 9 އަހަރު ފަހުން އަނެއްކާ ވެސް އަދަބު!

ކުށް ކުރެވޭނީ އިންސާނުންނަށެވެ. ބައެއް މީހުން އެމީހުންނަށް ކުރެވުނު ކުށް ފާފަތަކުގައި އަދިވެސް ދެމިތިބޭއިރު، ގިނަ މީހުންނަކީ އެމީހުންގެ އެ ފަދަ އުޅުންތައް އިސްލާހުކޮށް، ދިރިއުޅުމަށް މުޅިން އައު ހެޔޮ ބަދަލެއް ގެނައުމަށް ހިންމަތާއި މިންނަތުން މަސައްކަތް ކުރާ މީހުންނެވެ.

Ads by Sosun Fihaara

ޅ. ނައިފަރުގެ މިސްކިތެއްގައި ވޭޖް އުސޫލުން މަސައްކަތް ކުރަމުން ދިޔަ އިބްރާހިމް ރަޝީދަކީ ވެސް އެފަދަ މީހެކެވެ. ނައިފަރު ކައުންސިލުން އޭނާގެ ވަޒީފާ މިދިޔަ އަހަރުގެ ޑިސެމްބަރު މަހު ދާއިމީ ކުރުމަށް ފަހު އޭގެ ދެ މަސް ފަހުން ވަނީ އޭނާ އެ ވަޒީފާއިން ވަކިކޮށްފައެވެ. ސަބަބަކަށްވީ އޭނާ މީގެ 9 އަހަރު ކުރިން ކުރި ކުށެއްގެ އަދަބު ނުނިމި އޮތް ކަމަށް މޯލްޑިވްސް ކަރެކްޝަނަލް ސާވިސްގައި އޮތުމުންނެވެ.

އޭނާއާ މެދު ކަންތައްވެފައިވާ ގޮތް ފޭސްބުކް މެދުވެރިކޮށް ވަރަށް ސާފުކޮށް އިބްރާހިމް ރަޝީދު ވަނީ ކިޔައިދީފައެވެ. އެ ގޮތުން އޭނާ ބުނީ، އޭނާއަކީ މީގެ 9 އަހަރު ކުރިން، ކަރެކްޝަންސްގެ ބެލުމުގެ ދަށުން ޖަލު ހުކުމެއް ތަންފީޒު ކުރަމުން ދިޔަ ގައިދީއެއް ކަމަށެވެ.

ނަމަވެސް ހުކުމް ތަންފީޒުކޮށް ނިންމުމަށް އެންމެ 23 ދުވަހަށްވެފައި ވަނިކޮށް ޑްރަގް ކޯޓުގެ ދަށުން ނޭޝަނަލް ޑްރަގް އޭޖެންސީއާ އޭނާ ހަވާލު ކުރިއެވެ. އަދި ފަރުވާ ފުރިހަމަ ކުރުމަށް ކ. ހިންމަފުށީ ރީހެބިލިޓޭޝަން ސެންޓަރަށް ފަރުވާކޮށް ނިމުމުން 21 އޮކްޓޯބަރ 2015ގައި ޑްރަގް ކޯޓުން އެއްވެސް ޝަރުތަކާ ނުލައި މިނިވަން ކުރަން ހުކުމްކޮށް، އިބްރާހިމް ރަޝީދު މިނިވަން ކުރިއެވެ.

"އެދުވަހުގެ ފަހުން އަޅުގަނޑު މުޖުތަމައުގައި އުޅޭތާ 7 އަހަރު ވެފައިވާ އިރު އެއްވެސް ކުށެއްގައި ހައްޔަރު ކޮށްފައެއް ނުވާނެއެވެ. އަދި ޕޮލިސް ރިޕޯޓުގައި ވެސް ކުށެއް ނެތެވެ. ދޫކޮށްލި ފަހުން މުޖުތަމައުއަށް ފައިދާ ކުރަނިވި މީހަކަށްވުމަށް އަޅުގަނޑު ވިލާ ކޮލެޖުގައި ކިޔަވަން ފެށީމެވެ. ޒަވާޖީ ހަޔާތެއް ފަށައި، އެ ކައިވެންޏަށް ހަތަރު އަހަރު ފުރި، މިހާރު އެއް އަހަރާ 9 މަހުގެ ދަރިއަކު ވެސް ވަނީ ލިބިފައެވެ." ދިރިއުޅުމަށް ގެނައި ބަދަލުތައް ކިޔައިދެމުން އިބްރާހިމް ރަޝީދު ބުންޏެވެ.

އިބްރާހިމް ރަޝީދު ބުނީ އޭނާ ވިލާ ކޮލެޖުން ހަދަމުން ދިޔަ ކޯސް ނިމުމުން، އިތުރު ކޯހެއް ހަދާނެ ތަނަވަސްކަން އެއިރު ނެތުމުން، އާމްދަނީ ހޯދަން މަސައްކަތް ކުރުމުގެ ގޮތުން މަހަށް ދާން ފެށި ކަމަށެވެ. އެގޮތުން ދެ އަހަރު ދުވަހު މަސްވެރިކަމުގައި އުޅެފައި ނައިފަރު ކައުންސިލުން އިއުލާނު ކުރި އެ ރަށު މިސްކިތެއްގެ (ވޭޖް އުސޫލުން) މަސައްކަތު މީހެއްގެ ވަޒީފާ އޭނާއަށް ލިބުނެވެ. އެ ވަޒީފާ ލިބުމުން އިބްރާހިމް ރަޝީދު މަސްވެރިކަން ހުއްޓައިލީ އަނެއްކާ ވެސް ކިޔަވަން ދިޔުމުގެ ނިޔަތުގައެވެ.

"އަޅުގަނޑު ޒިކުރާ އިންޓަނޭޝަނަލް ކޮލެޖުން އެޑްވާންސް ކޯހެއް ހެދުމަށް ފަހު ސަރުކާރުގެ ހިލޭ ޑިގްރީ ޕްރޮގްރާމެއްގެ ދަށުން ވެސް ކޯސް ހެދީމެވެ." އިބްރާހިމް ރަޝީދު ކިޔައިދިނެވެ.

ނަމަވެސް އޭގެ މާގިނަ ދުވަސްތަކެއް ނުވެ، އިބްރާހިމް ރަޝީދުގެ ދިރިއުޅުމަށް އައީ އޭނާގެ ހިތަށް މީގެ ކުރިން ދުވަހަކު ވެސް ނުގެނެވޭ ބޮޑު ތޫފާނެކެވެ. ނައިފަރު މިސްކިތެއްގައި އަދާކުރަމުން ދިޔަ ވަޒީފާގައި ތިން އަހަރާ ގާތްވެފައި ވަނިކޮށް އޭނާއަށް ލިބުނީ ވަޒީފާއިން ވަކިކުރި ޗިޓެވެ. ސަބަބަކަށްވީ އިބްރާހިމް ރަޝީދުގެ ކުށުގެ ރިކޯޑު ސާފު ކުރި އިރު އޭނާގެ ނުނިމި އޮތް މައްސަލައެއް ކަރެކްޝަންސްގައި އޮތުމުން ކަމަށް ޗިޓްގައި އޮތެވެ.

"ކުށުގެ ރިކޯޑު އޮތްކަން އެނގުނު ދުވަހުން ފެށިގެން އަޅުގަނޑު އެކި މުއައްސަސާތަކަށް ގުޅައި ސިޓީ ފޮނުވައި ކަންތައް ކުރިއިރު އެއްވެސް ތަނަކުން މި ކަމަށް އެކްޝަނެއް ނަގައިފައެއް ނުވެއެވެ. ގިނަ ދުވަސް ވެގެން ދާތީ އަޅުގަނޑަށް އިތުރު ވަޒީފާއެއް ލިބޭކަށް ނެތް." އިބްރާހިމް ރަޝީދު ކިޔައިދިނެވެ.

އަޅުގަނޑު 23 ދުވަހަށް ޖަލަށް ދާން އެއްވެސް ވަރަކަށް ހާސްވަނީކީ ނޫން. ނަމަވެސް އަޅުގަނޑު ހަދަމުން އައި ކޯސް ގެއްލި، ވަޒީފާ ގެއްލި، އާއިލާއަށް ލިބުނު ނިކަމެތިކަމުގެ ބަދަލު ދޭނީ ކޮން މުއައްސަސާއަކުންތޯ؟ ރަށުތެރޭ މީހުންނަށް އާންމު އުނދަގޫކޮށް، މީހުންގެ މުދަލަށް ގެއްލުންދީ، މުޖުތަމައުއަށް ހުރި ބިރެއްގެ ގޮތުގައި އުޅެންތޯ އަޅުގަނޑުވީ؟

މިކަމާ ގުޅޭގޮތުން "ދެން"އިން ސުވާލު ކުރުމުން މޯލްޑިވްސް ކަރެކްޝަނަލް ސާވިސަސްގެ ތަރުޖަމާނު އަހުމަދު ނަސީމް ވިދާޅުވީ އިބްރާހިމް ރަޝީދަށް ޑްރަގް ކޯޓުން ހުކުމް ކުރީ އެހެން މައްސަލައެއްގައި ކަމަށެވެ.

"އެހުކުމަށް ފަރުވާއަށް އޭނަ ފޮނުވީ. އެހެންވީމަ ވާގޮތަކީ ފަރުވާއަށް ދާ ހިސާބުން ފެށިގެން ހުއްޓިފައި އޮންނާނީ ތަންފީޒު ކުރަމުން ދިޔަ ހުކުމް. އެހެންވީމަ ޑްރަގް ކޯޓުން އޭނަ މިނިވަން ކުރިޔަސް ކުރިން ތަންފީޒު ކުރަމުން ދިޔަ ހުކުމް އޮންނާނެ" ނަސީމް ވިދާޅުވިއެވެ.

މީގެ އިތުރުން ނަސީމް ވިދާޅުވީ އެ ސަބަބާ ހުރެ ކުރިން ކޮށްފައިވާ ހުކުމް ނިމޭނީ އެ ހުކުމް އެއްކޮށް ތަންފީޒުކޮށް ނިންމުމުން ކަމަށެވެ.