ވަކި މީހަކަށް ޕާޓީ މިލްކުކޮށްދޭން މަސައްކަތްކުރާ މީހުންނާ މެދު ފިޔަވަޅު އަޅަން ޖެހޭ: ރީކޯ މޫސަ
އިސް މަގާމުތަކުގައި ތިބެގެން ވަކި މީހަކަށް ޕާޓީ މިލްކުކޮށްދޭން މަސައްކަތްކުރާ މީހުންނާ މެދު ފިޔަވަޅު އަޅަން ޖެހޭ ކަމަށް އެމްޑީޕީގެ ކުރީގެ ޗެއަރޕާސަން ރީކޯ މޫސާ މަނިކު ވިދާޅުވެއްޖެއެވެ.
މޫސަ މިފަދައިން ވިދާޅުވީ މި ސަރުކާރުގެ ކެބިނެޓުގައި ހިމެނޭ ބައެއް ވަޒީރުން ބޭނުން ވަނީ އެމްޑީޕީގެ ރައީސް މުހައްމަދު ނަޝީދު އެ ޕާޓީން އެކަހެރިކޮށް، އެހެން އެމްޑީޕީއެއް އުފެއްދުމަށް ކަމަށް ހެންވޭރު ހުޅަނގު ދާއިރާގެ މެންބަރު ހަސަން ލަތީފު މިއަދު ވިދާޅުވުމާ ގުޅިގެންނެވެ.
މިކަމާ ގުޅިގެން މޫސަ މިރޭ ވިދާޅުވީ ދަޢުލަތުގެ ފައިސާއިން ހިނގާ ސިޔާސީ ޕާޓީތަކުގެ އިސްމަޤާމް ތަކުގައި ތިބެގެން ޕާޓީތައް ހަލާކުކޮށް ފިތުނަކޮށް އަދި ވަކި މީހަކަށް ޕާޓީ މިލްކުކޮށްދޭން މަސައްކަތްކުރާ މީހުންނާ މެދު ހަރުކަށި ފިޔަވަޅުއަޅަން ޖެހޭ ކަމަށެވެ.
މިއަދުގެ މަޖިލިސް ޖަލްސާގައި ވާހަކަދައްކަވަމުން ލަތީފް ވިދާޅުވީ ސަރުކާރަށް އެއްބާރުލުން ދީގެން، ސަރުކާރުން ބޭނުންވާ ބިލުތަކާއި މަސައްކަތްތައް ފުރިހަމަކޮށްފައިވާ ކަމަށެވެ. ނަމަވެސް މަޖިލީހުން ސަރުކާރަށް ހުރަސް އަޅާކަމަށް ބައެއް ވަޒީރުން ވިދާޅުވާ އިރު، އެއީ ކަންބޮޑުވާކަމެއްކަމަށް ހަސަން ވިދާޅުވިއެވެ.
Ads by STO
