ޖައިލަމްގެ މަރު: ކުށް ސާބިތެއް ނުވި
ހ. ހަންޑްރެޑް ފްލާވާސް/ ޖައިލަމް އަހްމަދު ޝާކިރު މަރައިލި މައްސަލައިގައި ދައުވާ އުފުލައިފައިވާ ހަތަރު މީހުންގެ މައްޗަށް އެ މައްސަލަ ސާބިތު ނުވާ ކަމަށް ކްރިމިނަލް ކޯޓުން މިއަދު ކަނޑައަޅައިފިއެވެ.
ފެބްރުއަރީ، 2015 ގައި ދަރުބާރުގެ ކައިރީގައި ޖައިލަމަށް ތޫނު އެއްޗެހިން ހަމަލާދީ މަރައިލި މައްސަލައިގައި ދައުލަތުން ދައުވާ އުފުލައިފައި ވަނީ ސ. ފޭދޫ/ ވީނަސްވިލާ ނަސީބު ސައީދާއި، ވ. ސިނަމާލެ އިސްމާއިލް އަނީގު އަދި ޏ. ފުވައްމުލައް/ ޖަމްނާ އަލީ އިރުފާންގެ އިތުރުން ގއ. ވިލިނގިލީ ފިޔަޖަހާގޭ މުހައްމަދު ހުމައިދުގެ މައްޗަށެވެ.
ގަސްތުގައި މީހަކު މަރައިލުމުގެ ދައުވާ މި މީހުންގެ މައްޗަށް އުފުލައިފައިވާ އިރު، އެ މީހުން މި ކުށުން ސަލާމަތްވެފައި ވަނީ ދައުލަތުން ހުށަހަޅައިފައިވާ ހެކިންގެ ހެކިބަސް ނުނެގުމާއި، ގިނަ ކިތާބީ ހެކި ހޯދައިފައިވާ ގޮތާއި އަދި ތަހުގީގުގައި ފުލުހުން އަމަލުކޮށްފައިވާ ކަންކަމަށް ރިއާޔަތްކުރުމަށް ފަހުގައެވެ.
ކްރިމިނަލް ކޯޓުގައި މިއަދު ބޭއްވި އަޑުއެހުމުގައި ހުކުމް އިއްވަވަމުން އެ މައްސަލަ ބެއްލެވި ގާޒީ އިސްމާއިލް ޝަފީއު ވިދާޅުވީ ދައުވާ ލިބޭ ނަސީބު ސައީދާއި އަނީގުގެ އިތުރުން އިރުފާނާ ދެކޮޅަށް ހެކިބަސް ދިނީ އެންމެ ހެކިވެރިއަކު ކަމަށާއި ދެން ތިބި ހުރިހައި ހެކިންނަށް އެ މީހުން އެ ހާދިސާ ހިނގި ސަރަހައްދުން ފެނިފައި ނުވާ ކަމަށެވެ. އަދި މަންޒަރު ދުށް ކަމަށް ބުނި ހެކިވެރިޔާ ވެސް، ފަހުން ހެކިބަސް އަނބުރާ ގެންދަން ބޭނުންވާ ކަމަށް ބުނެ ކޯޓަށް ސިޓީ ފޮނުވައިފައިވާ ކަމަށް ވެސް ގާޒީ ޝަފީއު ވިދާޅުވިއެވެ.
