ކަޒްމިކްގެ "ދަރަކަ" : ސިޔާސީ ވާހަކައެއްތަ، ނޫނީ އާއިލީ މައްސަލަގަނޑެއްތަ؟
ދިވެހި ފިލްމީ ދާއިރާއަށް ބަލައިލާއިރު މިހާރު އެންމެ ގިނަ ބަޔަކު އިންތިޒާރު ކުރަމުންދާ އެއް ޕްރޮޖެކްޓަކީ، ދާއިރާގައި މިހާރު ކުރިއަރަމުން އަންނަ ކަޒްމިކް އިންޓަނޭޝަނަލްގެ އެންމެ ފަހުގެ އުފެއްދުން ކަމަށްވާ "ދަރަކަ" އަށެވެ.
ގިނަ ތަރިންތަކެއް ފެނިގެންދާ "ދަރަކަ"އަކީ، އެތައް ބައެއްގެ މަގުބޫލުކަން ލިބުނު ކާމިޔާބު ފިލްމު "ބަވަތި"ގެ ޑައިރެކްޓަރ އިލްޔާސް ވަހީދު ވެސް ޕްރޮޑިއުސްކޮށްފައިވާ ވެބްސީރީޒެކެވެ. މި ސީރީޒް ޑައިރެކްޓު ކޮށްފައި ވަނީ މީގެ ކުރިން ބައެއް މަޝްހޫރު ލަވަތައް ޑައިރެކްޓުކޮށްފައިވާ އަޒްހާން އިބްރާހިމެވެ.
ޖުމްލަ އަށް އެޕިސޯޑުގެ މައްޗަށް އެކުލެވިގެންވާ "ދަރަކަ" އަކީ ކްރައިމް ތްރިލަރއެކެވެ. މި ސީރީޒްގެ ޓްރެއިލަރ މިދިޔަ ބުދަ ދުވަހު ރިލީޒް ކޮށްފައިވާ އިރު، މީޑިއާނެޓް މެދުވެރިކޮށް މި އަންނަ އޭޕްރިލް މަހުގެ 8ވަނަ ދުވަހު މި ސީރީޒް ރިލީޒް ކުރާނެކަމުގެ އުފާވެރި ޚަބަރު ވެސް ކަޒްމިކްއިން މިހާރު ވަނީ ދީފައެވެ.
ޓްރެއިލާއިން ފެންނަ ގޮތުގައި މިއީ ސިޔާސީ ގޮތުން ނުފޫޒު ގަދަ މީހެއްގެ އާއިލާއަށް ކުއްލިއަކަށް ދިމާވާ ހާދިސާތަކެއްގެ މައްޗަށް ބިނާކޮށްފައިވާ ސީރީޒެކެވެ.
ދަރަކައިގައި ހަރަކާތްތެރި ވަނީ "ބަވަތި"ގައި ވެސް ކުޅަދާނަ އެކްޓިންއެއް ފެނިފައިވާ އަޙުމަދު އިފްނާޒް ފިރާގްއާއި، އަރަމުން އަންނަ ތަރި ވާޝިޔާ މުޙައްމަދުގެ އިތުރުން ސޫސަން މުޙައްމަދުފުޅު، އައިޝާ އަލީ، އިބްރާހިމް ޖިހާދު، އަލީ އުސާމް (ދޮނާ)، ނަތާޝާ ޖަލީލް، މުޙައްމަދު އަފްރާހް، އިސްމާއިލް ވަހީދު، ފާތިމަތު ވިސާމާ އަދި އަދުހަމް ލަޔާލް ގާސިމްއެވެ. ދަރަކައަކީ ވިސާމާ މި ދާއިރާއިން އަލަށް ފެނިގެންދާ ޕްރޮޖެކްޓުކަން ވެސް ކަޒްމިކްއިން ވަނީ ފާހަގަކޮށްފައެވެ.
