ކެމްޕެއިނަށް ފައްޔާޒު ހުވަދުއަތޮޅަށް!
އެމްޑީޕީގެ ޗެއަރޕާސަންގެ އިންތިޚާބުގައި ވާދަކުރައްވާ އިކޮނޮމިކް މިނިސްޓަރު ފައްޔާޒު އިސްމާއީލް ކެމްޕެއިން ދަތުރުފުޅެއްގައި ހުވަދުއަތޮޅަށް ވަޑައިގެންފިއެވެ.
މި ދަތުރުފުޅުގައި އެމްޑީޕީ އަންހެނުންގެ ރޫހު އިންތިހާބުގެ ކެނޑިޑޭޑް ރައްޔިތުންގެ މަޖިލީހުގެ މީދޫ ދާއިރާގެ މެމްބަރު ރޮޒެއިނާ އާދަމް ވެސް ބައިވެރިވެ ވަޑައިގެންނެވިއެވެ. މީގެ އިތުރުން ފައްޔާޒުގެ ކެމްޕެއިންގައި އިސްކޮށް އުޅުއްވާ ބޭފުޅުން ވެސް ބައިވެރިވެވަޑައިގެންނެވިއެެވެ. ފައްޔާޒު ވަނީ މީގެ ކުރިން އައްޑޫ ސިޓީއާއި ފުވައްމުލައް ސިޓީއަށް ވެސް ވަޑައިގެންފައެވެ.
ފައްޔާޒުއާއި ރޮޒައިނާގެ ކެމްޕެއިން ޓީމުން ބުނީ ގއ. އަދި ގދ. އަތޮޅަށް ކުރައްވާ މި ކެމްޕެއިން ދަތުރުގައި މި މަހުގެ 31ވަނަ ދުވަހާ ހަމައަށް އެ އަތޮޅުގެ އެކި ރަށްރަށަށް ދަތުރުކުރަން ހަމަޖެހިފައިވާ ކަމަށެވެ.
ފައްޔާޒާ އެކު ދެން ޗެއާޕާސަން ކަމަށް ވާދަކުރައްވަނީ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީއެވެ.
އެމްޑީޕީގެ ޗެއަރޕާސަން ހޮވުމަށް ބާއްވާ އިންތިޚާބު ފަސްކުރަން އެ ޕާޓީގެ ޤައުމީ މަޖިލީހުން ވަނީ ނިންމައިފައެވެ. ކުރިން މި އިންތިޚާބު ބޭއްވުމަށް ހަމަޖެހި އޮތީ އޭޕްރީލް 16ވަނަ ދުވަހުއެވެ. ނަމަވެސް މިހާރު އެ އިންތިހާބު ބޭއްވުމަށް ކަނޑައަޅައިފައި ވަނީ ރަމަޟާން މަސް ނިމި ޝައްވާލްމަހުގެ ވެސް ފުރަތަމަ ހަތް ދުވަސް ނިމުމަށް ފަހު، މެއި މަހުގެ 14ވާ ހޮނިހިރު ދުވަހުގައެވެ.
Ads by STO
