ކުޑަކުއްޖަކު ރޭޕް ކުރިކަމަށް ތުހުމަތު ކުރެވޭ އަނީސް އޮރިޔާންކާޑު ގެންގުޅުނުކަން ސާބިތުވެއްޖެ
މާލޭގެ ގެސްޓްހައުސްއަކަށް ގެންގޮސް އުމުރުން 11 އަހަރުގެ ކުޑަ ކުއްޖަކު ރޭޕް ކުރިކަމުގެ ތުހުމަތުގައި ހައްޔަރުކުރި ހއ. ބާރަށު ސިލްސިލާގެ، އަނީސް ހިލްމީ އޮރިޔާންކާޑު ގެންގުޅުންކަން ސާބިތުވެއްޖެއެވެ.
ދެހާސް ވިހިވަނަ އަހަރުގެ ޖޫން މަހުގެ 10 ވަނަ ދުވަހު ކުޑަ އަންހެން ކުއްޖަކު ގެސްޓްހައުސަކަށް ގެންގޮސް ރޭޕް ކުރިކަމުގެ ތުހުމަތުގައި އަނީސް ކޯޓު އަމުރެއްގެ ދަށުން ހައްޔަރުކުރީ އެމަހުގެ 12ވަނަ ދުވަހުގެ ރޭ، އޭނާ ދިރިއުޅޭ ގެއިންނެވެ.
މި މައްސަލައާ ގުޅިގެން އަނީސަށް ދައުލަތުން ކޮށްފައިވަނީ ތިން ދައުވާއެކެވެ. އެއީ:
▪︎ ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ގަސްދުގައި އަތްލުމުގެ ކުށުގެ ދައުވާ. (އަދަބު: 10 އަހަރާއި 14 އަހަރާ ދެމެދުގެ ޖަލު ހުކުމެއް)
▪︎ ކުޑަކުއްޖަކަށް ޖިންސީ ގޯނާކުރުމަށް ޓަކައި އެކުއްޖާ ގްރޫމްކުރުމުގެ ކުށުގެ ދައުވާ. (އަދަބު: 10 އަހަރުގެ ޖަލު ހުކުމެއް)
▪︎ އޮރިޔާންކާޑު ގެންގުޅުމުގެ ކުށުގެ ދައުވާ. (އަސާސީ އަދަބު: 1 މަހާއި 6 ދުވަހަށް ޖަލަށްލުން)
މި ދައުވާތަކުގެ ތެރެއިން މިހައިތަނަށް އަނީސްގެ މައްޗަށް ސާބިތުވެ، ހުކުމް ކޮށްފައި ވަނީ އޮރިޔާންކާޑު ގެންގުޅުނުކަމުގެ ކުށުގެ ދައުވާއަށެވެ.
