ހަ އަހަރުގެ ކުޑަ ކުއްޖާއަށް ކުރި ޖިންސީ ގޯނާގެ މައްސަލަ: އިދާރާތައް ކޮމިޓީއަށް ހާޒިރުކުރަނީ
އައްޑޫގައި އުމުރުން ހަ އަހަރުގެ ކުޑަ ކުއްޖަކަށް ޖިންސީ ގޯނާ ކުރި މައްސަލައިގައި، އެކަމާ ގުޅުން ހުރި އިދާރާތައް އަންނަ ބުދަ ދުވަހު ހާޒިރުކުރުމަށް ރައްޔިތުންގެ މަޖިލީހުގެ ޖެންޑާ އެންޑް ހިއުމަން ރައިޓްސް ކޮމިޓީން ނިންމައިފިއެވެ.
އުމުރުން ހަ އަހަރުގެ ކުޑަ ކުއްޖަކަށް ޖިންސީ ގޯނާ ކުރި މައްސަލައިގައި ކަން ހިނގައިފައިވާ ގޮތް އޮޅުން ފިލުވުމަށް އެދިވަޑައިގަތީ އައްޑޫ މީދޫ ދާއިރާގެ މެންބަރު ރޮޒައިނާ އާދަމްއެވެ.
މި މައްސަލައިގެ ތުހުމަތުގައި އުމުރުން 59 އަހަރުގެ އަންހެނަކު ވަނީ ޝަރީއަތް ނިމެންދެން ބަންދުކޮށްފައެވެ. ނަމަވެސް އެ ކުއްޖާއަށް ޖިންސީ ގޯނާކުރީ ކުއްޖާގެ ކާފަ ކަމަށާއި އާއިލާއިން އެކަން ސިއްރުކޮށް، އެހެން މީހަކު ފްރޭމްކޮށްފައިވާ ކަމަށް ބުނެ އައްޑޫގައި މުޒާހަރާ ވެސް ކުރިއެވެ.
ސޯޝަލް މީޑިއާގައި އެކި ގޮތްގޮތަށް އެ ވާހަކަ ދައްކައި، އެ މައްސަލަ ސިޔާސީކުރާކަމުގެ ތުހުމަތު ރޮޒައިނާ ކުރައްވައެވެ.
މި މައްސަލަ ކޮމިޓީއަށް ހުށަހަޅުއްވަމުން ރޮޒައިނާ ވިދާޅުވީ މިދިޔަ ބުދަ ދުވަހު އެކަމުގެ މައުލޫމާތު ސާފުކުރުމަށް ކަމާ ބެހޭ އިދާރާތަކަށް ހުށަހަޅައިފައިވާ ކަމަށާއި އެއީ ރައްޔިތުންގެ ކަންބޮޑުވުން އިންތިހާއަށް އޮތް މައްސަލައެއް ކަމަށެވެ.
"އެ މައްސަލަ ސިޔާސީކުރެވި ދައުލަތުގެ ވަޒީރުންނާ ދިމާލަށް މިކަމުގައި ނުފޫޒު ފޯރުވައިފައިވާ ކަމަށް ބުނެ، ވާހަކަތައް ދެކެވެމުންދާއިރު މިވަގުތު މިކަން ހިނގާދިޔަ ގޮތް ވީހާ ވެސް އަވަހަކަށް އެ ބޭފުޅުން ހާޒިރުކޮށްގެން ކުރިއަށް ގެންދިއުމަކީ މުހިއްމު ކަމެއް،" ރޮޒައިނާ ވިދާޅުވިއެވެ.
މީގެ އިތުރުން ރޮޒައިނާ ވިދާޅުވީ ސޯޝަލް މީޑިއާގައި ދެކެވޭ ވާހަކަތަކާ ހެދި އެކި މީހުންނަށް އިނގިލި ދިއްކުރަމުންދާ ކަމަށެވެ.
